Milli komanda
Berti Foqtsun xələfi Tuqay Kərimoğlu ola bilər (ÖZƏL)
Hazırda futbol üzrə milli komandadan göndərilən Berti Fo…
Hazırda futbol üzrə milli komandadan göndərilən Berti Foqtsun xələfinin kim olacağı ilə bağlı müzakirələr davam edir. Futbolinfo.az xəbər verir ki, AFFA rəhbərliyi yığmanı müvəqqəti olaraq millidə köməkçi məşqçi kimi çalışan Mahmud Qurbanova tapşırıb.
Maraq üçün bildirək ki, yığmanın yeni məşqçisinin əcnəbi olması ehtimalı yüksəkdi. Artıq bu yöndə işlər də aparılır. Ölkə daxilində nicat tapmayan ali qurum rəhbərliyinin elə də çox vaxtı yoxdu. Norveç yığması ilə oyuna az vaxtın qalması da prosesin sürətlənməsinə təkan verir.
Maraq üçün bildirək ki, milli komandanın yeni məşqçisi Türkiyədən ola bilər. Etibarlı mənbədən əldə etdiyimiz məlumata görə namizədlər arasında qardaş ölkə futbolunun tanınmış siması da var. Bu, Türkiyə yığmasının sabiq üzvü, eyni zamanda "Qalatasaray"ın məşqçisi olmuş Tuqay Kərimoğludu. Georgi Haci və Roberto Mançininin "sarı-qırmızılar"a rəhbərlik etdiyi dönəmdə onların köməkçisi olmuş Kərimoğlu hazırda işsizdi. Prandelli türk klubuna məşqçi təyin ediləndən sonra Tuqay bəy işindən ayrılıb. Artıq onun namizədliyi AFFA-nın baş katibi Elxan Məmmədova təqdim olunub. İş burasındadı ki, sabiq "Qalatasaray"lı özü də ölkəmizdə çalışmağa razıdı. Məsələyə yaxın günlərdə tam aydınlıq gətiriləcək.
Qeyd edək ki, Tuqay Kərimoğlu Türkiyə milli komandasında da çalışıb. O, ölkəsinin 20 yaşlı futbolçulardan ibarət yığmasının da baş məşqçisi olub.
EMİN SƏFƏROV