Premyer-liqa
“Neftçi” yenə intizamsızlıq yuvasıdı
“Neftçi”də hər şey dəyişir. Baş məşqç…
“Neftçi”də hər şey dəyişir. Baş məşqçi də, vitse-prezident də, müşavir də – yaxınlarda klubun prezidenti də başqasıyla əvəz olunmalıdı. Amma bircə flaqmanın xasiyyəti dəyişmir. Sadıq Sadıqovun yaratdığı qoçular klubunda sanki intizamsızlıq qana hopub.
Son turun “Sumqayıt”la oyunu bu baxımdan daha bir nümunə oldu. Mövsümün ilk oyunlarında Ernest Nfor Böyükağa Hacıyevə cavab qaytarmışdısa, bu dəfə Araz Abdullayev “fərqləndi”. Əvəzlənməsindən Arif Əsədova etiraz jestiylə məmnun qalmadığını göstərən yarımmüdafiəçi bununla tərbiyəsizliyini də göstərdi.
İndi Əsədov Araz haqda sərt ölçü götürüləcəyini deyir. İnanan daşa dönsün. Avtoş Abdullayev maşınla adam öldürüb səhəri oyuna çıxan adamdı, Sadıqov kimi hamisi var, kimdi onu cəzalandıran? Əsədov elə növbəti oyunda ona şans verməyə məcbur olacaq. Dədə canı…
“Neftçi”nin yeni vitse-prezidenti Elnur Məmmədov da deyəsən, kluba söz sahibi kimi yox, elə AFFA-nın baş katibi Elxan Məmmədovun istinad nşqtəsi kimi gəlib. Bu cavan oğlanın iki gün öncə çəkdirdiyi bir çəkili görüb anladım ki, Sadıq bəy onun böyüməsinə imkan verməyəcək. Day-dayı Xorvatiyadakı biabırçı nəticədən sonra qınına çəkildiyi bir zamanda Elnur bəyi də azarkeşlərlə işləməyə göndəriblər. AFFA-da fan-klublarla bağlı işlərə cavabdeh olmuş kiçik Məmmədov “Neftçi”də də elə bayrağ, şeypur paylamağa gəlib. Azarkeşlərlə görüşdə nə vəd etdiyini də bilmirəm, amma ondan da bakılılara bir məlhəm olmayacaq.
Qurban Qurbanova dəvət göndərməyən, amma guya onun millidən imtina etməsi barədə məqsədli informasiya yaydıran baş katibin başı nə qədər ki, ona pul qazandıracaq əcnəbi axtarışına qarışıb, yəqin ki, Elnur bəy də elə qıraqda yeyib qıraqda gəzəcək. Ona görə də vitse-prezident Məmmədovun da Abdullayevin xətrinə dəyə bilməyəcəyi dəqiqdi. Araza ancaq baş məşqçinin təqdimatı əsasında prezident cəza verə bilər. O isə Əsədova görə gözmuncuğu istedada toxunmaz.
AĞA
P.S.: Araz Abdullayev Xorvatiyada 0:6 hesabıyla uduzan millinin üzvüdü və həmin görüşdən sonrakı ilk oyununda belə etdi. İlahi, görəsən, Osiekdə millimiz Arazın həlledici qoluyla qələbə qazansaydı, nə olardı?