Premyer-liqa
Zaqatalada kəpənəkli gecə
Topaz Premyer Liqasının 9-cu turu çərçivəsində əya…
Topaz Premyer Liqasının 9-cu turu çərçivəsində əyalətdə baş tutan qarşılaşmalardan biri də “Simurq” – “Araz Naxçıvan” komandaları arasında keçirildi. Dağların qoynunda yerləşən şəhərdə oyun günü əsl futbol havası var idi. Təbiət də öz şıltaqlığını oyundan sonraya saxlamışdı. Belə ki, qarşılaşmadan sonra Zaqatalada elə bir yağış yağmağa başladı ki…
Matç öncəsində qonaqların durumu elə də yaxşı deyildi. Naxçıvan təmsilçisi şimal-qərb zonasına müdafiə xəttinin iki aparıcı üzvü olmadan gəlmişdi. Aqil Nəbiyev xəstələndiyi, Saşa Yunusoğlu isə ötən tur zədələndiyi üçün “Simurq”la oyund iştirak etmədi. Sözsüz ki, bu da heyət baxımından yoxsul olan “Araz Naxçıvan”ın oyununa mənfi təsir etməli idi. Elə gözlənilən kimi də oldu.
Azarkeşlərin tribunalara biganə qalmadığı oyunda “Simurq” debütanta göz verib, işıq vermədi. Rəqibini topa tutan Zaqatala təmsilçisi qələbini vurduğu 4 cavabsız qolla qeyd etdi. İlk hissədə “Simurq”un serbiyalı legioneri Marko Stanoyeviç tribunaya toplaşanları ayağa qaldırdı. “Araz Naxçıvan”ın qapıçısı Kamal Bayramov 26 yaşlı yarımmüdafiəçini uzaqdan öldürücü zərbəsi qarşısında aciz qaldı – 1:0.
İlk hissədə üstünlük “Simurq”da idi. Yerli komanda açıq-aşkar oyunda diqtə edən tərəf idi. Qonaq komandadan yalnız Ruslan Zubkovu və Bəxtiyar Soltanovu fərqləndirmək olar ki, onların da fəallığı məğlubiyyətdən qaçmaq üçün yetərli olmadı. Rəşad Eyyubov ilk hissədə ötən tur “İnter”lə oyunda olduğu kimi topu özündə çox saxlasa da, topla lüzumsuz hərəkətlər etsə də, ikinci yarıda tamam fərqli oyun nümayiş etdirdi. Rəşad 47, 56 və 90+3-cü dəqiqələrdə qol vurmaqla het-trikini rəsmiləşdirdi. Amma Eyyubov bununla kifayətlənməməli, arxayınlaşmalı deyil. Aktivində 6 qol olan Premyer Liqanın bombardiri nəzərə almalıdı ki, o, iddialı sayıla biləcək komandalardan yalnız “Xəzəər Lənkəran”ı məyus edə bilib. Bundan başqa “Qəbələ”yə vurduğu qol isə xal qazanmaq üçün yetərli olmayıb. Qarşısına qoyduğu məqsədə çatmaq üçün öz üzərində daha da çalışmalıdı. “Simurq”un gürcü baş məşqçisi Georgi Çixradzedə də oyundan sonra Rəşad Eyyubovdan çox şey gözlədiklərini etiraf etdi.
“Araz Naxçıvan”ın problemlərini dəfələrlə qabartmışıq. Komandanın hələ də birinci divizion gücündə olması baş məşqçisi Əsgər Abdullayevin görəcəyi işə mane olur. Heyətdə sıxıntıları olan debütantın qışda güclənməsi şərtdi. Əks halda “Araz Naxçıvan” gələcək mövsümü aşağı dəstədə keçirməli olacaq.
Bütün bu məsələləri klub rəhbərliyi ilə müzakirə etməyə çalışsaq da, “Araz Naxçıvan” rəsmiləri nədənsə müsahibə verməkdən boyun qaçırırlar. Görünür onlar da, durumun acınacaqlı olduğunu qəbul ediblər. Və yaxud da danışmaq üçün komandalarının uzun müddətdi həsrət qaldığı qələbəsini gözləyirlər. Ciddi addımlar atılmasa, Naxçıvan rəhbərliyi intizarında olduqları qələbəni çox gözləməli olacaq.
Qonaqların çalışdırıcı Əsgər Abdullayev durumun ürəkaçan olmadığını qəbul etdiyi üçün oyundan sonra çox danışmağa üstünlük vermədi. Çünki yenidən nəyisə demək təkrarçılıq olacaqdı. Görünən kəndə bələdçi lazım deyil ki…
P.S. Qarşılaşmanın sonlarına yaxın stadionun projektorlarının işığına kəpənəklər də yığışmışdı. Nəzərəçarpacaq şəkildə görünən kəpənəklər də sanki iki hissəyə bölünmüşdü. Onlar da öz aralarında futbol oyanyırdı. Oyunu yüksək səviyyədə idarə etməyi bacaran Əliyar Ağayevin final fiti səslənəndə kəpənəklər matçlarına əlavə olunmuş hissələri oynayırdı. Yarım saatdan sonra stadionun projektorunun işıqları sönəcəkdi…
EMİN SƏFƏROV, Bakı – Qəbələ – Zaqatala – Bakı
- Milli komanda2024-05-03 08:00
Vay(ss) bizim halımıza?
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq