Premyer-liqa
32 min manatlıq “Araz Naxçıvan”
“Araz Naxçıvan” səs-küylə birinci diviziond…
“Araz Naxçıvan” səs-küylə birinci diviziondan elitaya yüksələndə bu xamırın çox su aparacığını tez-tez qeyd edirdik. Klub rəhbərliyinin hələ də aşağı dəstə ab-havasından ayılmamasını onların Premyer Liqaya qeyri-peşəkar yanaşması sübut edirdi.
Naxçıvanlılar bundan öncə də çempionatda çıxışını dayandırmaqla bağlı bəyanat yaymış, daha sonra bunun zarafat olduğunu bildirmişdi. Yəni, klub özü öz yaydığı bəyanatı təkzib etmişdi. Peşəkar Futbol Liqası ilə çilik-qoz oynayan debütant bu gün də klub saytı vasitəsi ilə bəynat yayıb, bir cümlə ilə fəaliyyətini dayandırdığını bildirib.
Klub rəsmən fəaliyyətini dayandırsa, məsələ çoxunun başını ağrıdacaq, ölkə futbolunu biabırçı durumla üz-üzə qoyacaq.
Araşdırmalarımız nəticəsində məlum oldu ki, “Araz Naxçıvan”ın aylıq büdcəsi 32 min manatdan artıq deyil. Bu, məbləğ elitada çıxış edən ortabab klubun iki səfər matçına xərclənən pul qədərdi. Bu pulla həm futbolçuların maaşı verilməli, həm də səfər və ev oyunlarına çəkilən xərc qarşılanmalıdı.
Klubda 4-5 futbolçu 1500, 6-7-si isə 1000 manat maaş alırmış. Qalan digər futbolçular daha az maaşla təmin olunub. Üstəlik, futbolçuları məğlubiyyətə görə cərimə də kəsirlərmiş. Belə ki, hər məğlubiyyətə görə futbolçular 100-150 manat dəyərində cərimə olunurmuş.
İş burasındadı ki, “Araz Naxçıvan”ın əvəzedici komandası da əsaslardan geri qalmır. Belə ki, 100-200 manat alan gənc futbolçuların 5 aydı ki, maaşları verilmir. Buna görə də uşaqların məşq etməyə imkanı olmayıb. Hətta futbolçuların məşqə gəlmək üçün avtobusa verməyə pulları da yox imiş.