Premyer-liqa
Futbolinfo.az “Araz Naxçıvan”a əvəzedici axtarır (TƏKLİF)
“Araz Naxçıvan”ın klub saytı vasitəsi ilə fəa…
“Araz Naxçıvan”ın klub saytı vasitəsi ilə fəaliyyətini dayandırdığını rəsmən bəyan etməsi bir az gözlənilən, bir az qəribə alındı. Ona görə gözlənilən ki, bu komandanın Premyer Liqaya hazır olmaması hələ hazırlıqlarının səviyyəsindən aydın idi; ona görə qəribə ki, ilin-günün bu vaxtında küsüb qaçmaq acizlərə yaraşan hərəkətdi. Əldə ciddi əsasın olmaması isə göstərir ki, naxçıvanlılar sadəcə, peşəkar deyillər və planlarını düzgün qurmayıblar. Elə bu səbəbdən də indi ortalıqda qalıb gülünc vəziyyətə düşüblər – heç kim onların bəhanələrini ciddiyə almır, klub özü də fəaliyyətini dondurmasını əsaslandıra bilmir.
Debüt ilində naxçıvanlıların hakim haqqsızlıqlarına görə çempionatda iştirakını dayandırması inandırıcı deyil, əksinə, gülməlidi. İkinci dövrənin başlanğıcında belə bir durumun yaranması əsl birabırçılıqdı və bu, beynəlxalq aləmdə Azərbaycan futbolu adına böyük ləkə olacaq. Heç soruşmazlarmı ki, millinizə 3 milyon dollara məşqçi axtarıldığı, “Qarabağ”ın Avropa Liqasının qrup mərhələsində uğurlu çıxış etdiyi bir vaxtda Premyer Liqada bu, nə biabırçılıqdı?
Bəs, bu biabırçılıqdan necə qurturmalı, vəziyyətdən çıxış yolu nədi?
Futbolinfo.az olaraq bəlkə də reallaşması çətin olan bir təklif irəli sürməyi lazım bildik. Naxçıvanlıların nazıyla oynamaqdansa, təqvimin bərbad duruma düşməməsi üçün başqa çıxış yolu var. Düzdü, hələ də “Araz”ın geri qaytarılacağına inananlardanam. Amma ehtiyat üçün başqa variantlar da fikirləşmək lazımdı.
Naxçıvan təmsilçisinin Premyer Liqada debüt ilindəcə fəaliyyətini dayandırması birbaşa maliyyə sıxıntısı ilə bağlıdı. Buna görə də komandanı “işıqlı” gələcəyə doğru apara bilmirlər. Vəziyyətdən çıxmaq üçün ilk olaraq komandaya yeni sponsor cəlb olunmalıdı. Sponsorun xahişi və təklifi ilə komandanın adı da dəyişdirilə bilər. Amma futbolçuların ortalıqda qalmaması üçün heyət mütləq şəkildə saxlanılmalıdı. Heyətdə çıxış edən futbolçuların az maaş alması da yeni sponsorun marağına səbəb ola bilər.
Maraq üçün bildirək ki, “Araz Naxçıvan”da çıxış edən 4-5 futbolçu ayda 1500, 6-7-si 1000, qalanları isə ondan aşağı maaşla təmin olunur. Komandanın ev və səfər oyunları, futbolçuların maaşları, ümumi xərclər də daxil olmaqla buna qədər “Araz Naxçıvan”a bir ay üçün 32 min manat xərclənilirdi. Çempionatın 2015-ci ilin may ayına qədər davam edəcəyini nəzərə alsaq, bu müddətdə komandaya xərclənən pulun miqdarı 192 min manatdan artıq olmayacaq.
Vəziyyəti bir qədər də yaxşılaşdırmaq üçün komandanın ev oyunları Bakıda da keçirə bilər. Bu durum Premyer Liqada çıxış edən digər klubların da işinə yarayacaq ki, ən azından hər dəfə uzaq məsafə qət etməyəcəklər. Yeni adla fəaliyyət göstərəcək klub ev oyununu keçirmək üçün “Bayıl Arena”ya da üz tutmalıdı. Bəs, sözügedən arenanın pulu necə veriləcək? Cavab isə çox sadədi: Rəqib komandalar Naxçıvana getmək üçün yola xərclədikləri vəsaiti klubun hesabına köçürəcək və problem aradan qaldırılacaq. Bu həm də rəqib klubların yol yorğunluğunu aradan qaldıracaq.
Komandanın məşqləri Azərbaycan Dövlət Bədən Tərbiyəsi və İdman Akademiyasının stadionunda keçirilsin. Klubun mövsümün sonuna qədər məskunlaşması üçün Bakıda fəaliyyət göstərən Olimpia Kompleksinlərindən birinə müraciət olunsun.
Maraq üçün bildirək ki, “Kapital Bank” buna qədər “Sumqayıt”ın ev oyunlarını keçirdiyi arenaya bankın adının verilməsi üçün 200 min manat müqabilində sponsorluq müqaviləsi imzalayıb. Mövsümün sonuna qədər Premyer Liqada çıxış edən bir kluba öz adının verilməsi üçün hər hansı bir şirkət, bank niyə 192 min manatından keçməsin ki?
Onsuz da “Araz Naxçıvan”ın iddiası elə ilk turlardan bəlli idi. Komandanın bu gedişlə axırıncı pillədən qurtulmağı da inandırıcı deyildi. Ölkə futbolunun başbilənləri bunu nəzərə alaraq, yalnız və yalnız öz şirkətinin reklamını güdən adamlarla əlaqə yaradıb, komandanı çempionatın axırına qədər Premyer Liqada saxlamasına nail ola bilər. Mövsüm başa çatdıqdan sonra isə futbolçulara azad agent statusu veriləcək, aşağı dəstədən elitaya yüksələn komanda bu biabırçı durumu ört-bastır edəcək.
EMİN SƏFƏROV