Premyer-liqa
Rəqibləri “Araz Naxçıvan”ın qalmasını istəyir
“Araz Naxçıvan”ın fəaliyyətini dayandırması t…
“Araz Naxçıvan”ın fəaliyyətini dayandırması təkcə tərtib etdiyi təqvimi dəyişmək məcburiyyətində qalacaq Peşəkar Futbol Liqasının başını ağrıtmayacaq. Premyer Liqada iştirak edən digər klublar da bu durumdan əziyyət çəkəcək. Hər dəfə hansısa komanda turu buraxmalı olacaq ki, bu da onların oyun ritminə mənfi təsir göstərəcək.
Bundan başqa bəzi klublar “Araz Naxçıvan”la oyunlarda qazandıqları xalların itirilməsi ilə barışmalı olacaq. İlk turda uduzan “Neftçi” isə bəlkə də bu duruma görə məmnundu. Bunu nəzərə alıb klub rəsmilərinin gündəmi zəbt edən məsələylə bağlı fikirlərini öyrəndik.
“Neftçi”: Qərara hörmətlə yanaşırıq
Elnur Məmmədov, “Neftçi”nin vitse-prezidenti: “ Əlbəttə ki, mövsümün ortasında çempionatda komandaların sayının azalması sevindirici hal deyil. Bilirsiz ki, klublar müstəqildi. Bizim də müstəqil komanda olaraq digər klubun işlərinə müdaxilə etməyimiz düzgün olmaz. Bu baxımdan “Araz Naxçıvan”ın verdiyi qərara hörmətlə yanaşmalıyıq. Bu məsələ Peşəkar Futbol Liqası və klub arasında tənzimlənməlidi”.
AZAL: Bizim hakimlər şükürlüdü
Vaqif Qasımov, AZAL-ın vitse-prezidenti: “Bu haqda nə deyə bilərəm ki? Niyə gəlmişdilər, niyə gedirlər? Əlbəttə ki, “Araz Naxçıvan”ın elitanı tərk etməsini iztəməzdim. Səbəb kimi hakimləri ön plana çəkirlər. Halbuki, hakimlərin münasibti hamıya eynidi. Dünən Çempionlar Liqasının oyunlarına baxdım. Ən yüksək yarışda belə hakim səhvləri var. Amma heç kim məsələyə bu cür münasibət bildirmir. Belə baxanda bizim hakimlər onlardan şükürlüdü. Naxçıvan təmsilçisinin çempionatdan çıxması bizim planlarımıza heç cür təsir etməyəcək. Hamıya eyni qaydada təsir edir. “Qəbələ” 6 xal itirir, digərləri də elə olacaq. Naxçıvanda futbolun olması yaxşı olardı. Azərbaycanın gözəl güşəsi Naxçıvanın adı-sanı var. Amma qərarı özləri qəbul edir”.
“Qəbələ”: 3 qələbəsi olsaydı…
Zaur Əzizov, “Qəbələ”nin baş meneceri: “ Çempionatın reytinqi, imici üçün belə vaxtda klubun yarışı tərk etməsi böyük zərbə olar. Burada hansısa komandanın daha çox xal itərəcəyindən söhbət getmir. Söhbət Azərbaycan, bölgə futbolunun inkişafından gedir. Uzun müddət Naxçıvanda futbol yox idi. Komandanın oyununa neçə min azarkeş toplaşır. Naxçıvan azarkeş baxımından əksər bölgələrimizdən irəlidədi. Sözsüz ki, hər klub uğurlu çıxış etmək istəyir. Amma bunun üçün məyyən bir vaxt lazımdı. Yəqin ki, klub rəhbərliyi Premyer Liqada uğur qazanmağın asan olduğunu fikirləşib. İlk dəfə olmasına baxmayaraq, Naxçıvan səfəri bizim üçün də çətin keçmişdi. Mənə elə gəlir ki, bir qədər səbr edib, çempionatda çıxışlarını davam etdirməlidilər. “Araz Naxçıvan”ın elitanı tərk etməsi futbolumuz üçün böyük zərbə olar. Hətta Gürcüstanda belə halları eşidəndə məsələyə təəccüblə baxırıq. Açığı, “Araz Naxçıvan”da pis vəziyyətin olduğuna inanmıram. Sadəcə, uğursuzluq var. Bütün komandaların enişli-yoxuşlu qrafiki olur. Çempionatda sıradan komanda yoxdu ki. Əminəm ki, “Araz Naxçıvan”ın 3 qələbəsi olsa idi, bu gün bu məsələni müzakirə etməzdik. Çempionatın yarıdan çox oyunu qarşıdadı. Komandanın çempionatda çıxışını davam etdirəcəyinə əminəm. İnanıram ki, “Araz Naxçıvan” rəhbərliyi komandasını yarıyolda qoymayacaq”.
“Qarabağ”: Uduzanlar irəli düşəcək
Əmrah Çəlikəl, “Qarabağ”ın icracı drektoru: “ Bu məsələnin Peşəkar Futbol Liqası tərəfindən təsdiqlənməsi lazımdı. Bizim üçün pis haldı. Deyilənə görə, qazanılan xallar silinəcək. Ancaq dünyada belə deyil. Əksinə, qarşıdakı oyunlarda rəqiblərə texniki qalibiyyət verirlər. Bizdə isə qalib gələn komandalardan 3 xal çıxılır. “Araz Naxçıvan” görə xallar silinirsə, bu komandaya məğlub olan klublar irəli düşmüş olacaq. Bu da məntiqlə düz gəlmir. Düzdü, nizamnamə bunu tələb edir. Bizə mənfi təsir edəcək, xal itkisinə yol verəcəyik. Xeyirlisi nədirsə, o da olsun. Bizim bu məsələdə edəcəyimiz heç nə yoxdu. Qərar qəbul olunsa, əlimizdən heç nə gəlməz. “Araz Naxçıvan”ın və yaxud da başqa bir komandanın çempionata necə başlayıbsa, elə də başa vurmasına ümid edirik”.
“Xəzər Lənkəran“: Getməsələr, daha yaxşı olar
Yunis Hüseynov, “Xəzər Lənkəran”ın idman direktoru: “ Açığı “Araz Naxçıvan”ın hansı səbəbdən çempionatdan çıxışını dayandırdığını deyə bilmərəm. Amma bölgələrimizdə futbolun olmağı Azərbaycan futbolunun inkişafıdı. Biz nə qədər bölgələrdə futbolu çoxaltsaq, bir o qədər də bu sahə inkişaf edərdi. Neçə illərdi ki, Naxçıvan futboldan bir az uzaqda qalmışdı. Ötən il birinci divizionda çıxış etdilər. Futbolun yenidən Naxçıvana qayıtması sevindirici haldı. Çempionatı tərk etməsələr, daha yaxşı olar. İnanıram ki, Naxçıvan təmsilçisi çempionatı sonadək davam etdirəcək. Əks halda, bir komanda hər tur istirahət edəcək. Bu da mənfi təsir edəcək”.
“Sumqayıt”: Emosional qərardı
Kamran Quliyev, “Sumqayıt”ın prezidenti: “Bizim növbəti turda oyunumuz “Araz Naxçıvan”ladı. Premyer Liqada 18, 20 yox, cəmi 10 komanda çıxış edir. Ötən il “Araz Naxçıvan” əziyyətlə birinci divizionun qalibi olub. Bu qədər yol gəldikdən sonra nəinki, “Araz Naxçıvan”ın, heç bir klubun bəyanat yaymasını istəməzdim. Klubların sayı çoxalmalıdı. Ola bilsin ki, emosianal bir qərardı. Hesab edrəm ki, “Araz Naxçıvan” elitada çıxışını davam etdirəcək. Ancaq bu, məndən asılı olan məsələ deyil. Təbii ki, belə halların olmasını istəmərik”.
“Simurq”: Daxili işlərinə qarışa bilmərik
Vaqif Əliyev, “Simurq”un vitse-prezidenti: “Araz Naxçıvan”ın çempionatdan çıxmağı məqsədəuyğun deyil. Naxçıvanda futbol neçə ildi ki, yox idi. Normal, döyüşkən, çempionata rəng qatan komandadı. Əlbəttə, məsələyə mənfi baxırıq. Çempionatda iştirak etsələr, daha yaxşı olar. Düzdü, onların daxili işlərinə qarışa bilmərik. Komandanınn elitanı tərk etməsi ilə bağlı qərar qəbul olunsa, bu, qanunauyğundursa, biz heç nə deyə bilmərik. 3 xal öz yerində, ancaq komadanın planları pozulur. 11 komanda – hər turu hansısa klub buraxmalıdı. 12 komandanın iştirakı ilə normal çempionat gedir. Düzdü, məğlub olurlar, amma bunlar müvəqqətidi. Biz onlarla kubok oyununda da qarşılaşmışıq. Normal, gənc futbolçuların olduğu döyüşkən komandadı. Gələcəkdə normal komanda yaradıb, çempionata rəng qatarlar. Azarkeşlər də komandaya dəstək olur. Ancaq nə məqsədlə çempionatdan çıxdıqlarını demək çətindi. Şəxsən “Araz Naxçıvan”ın elitanı tərk etməsinin əlehinəyəm”.
“İnter": Hamıya mənfi təsir edəcək
”Georgi Nikoliv, “İnter”in prezienti: “Araz Naxçıvan” komandasının son qərarı ümumilikdə Premyer Liqada çıxış edən bütün komandalara mənfi təsir göstərəcək. “İnter” də vacib 3 xaldan məhrum ola bilər. Buna görə də Naxçıvan təmsilçisinin son qərarı məyusluq doğurur. Məsul qurumların vəziyyətdən çıxış yolu tapacağına ümid edirik. Hesab edirik ki, idman mübarizəsi baxımından elitada iştirak edən komandaların sayı reqlamentə uyğun olmalıdı. Bu məyusedici vəziyyətin qısa zaman kəsiyində yaxılığa doğru dəyişəcəyinə ümid edirik”.
“Bakı”dan isə rəhbər şəxsi tapmaq bizim üçün çətin oldu. Əslində, “zolaqlılar”ın da “Araz Naxçıvan”ın durumunda olduğunu desək, yanılmarıq.
EMİN SƏFƏROV
P.S. Vaqif Əliyevin fikirlərini olduğu kimi yazmışıq. Görünür, cənab Əliyev hələ də bilmir ki, çempionatda 12 yox, 10 komanda iştirak edir.
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Milli komanda2024-04-12 18:00
Millinin Gürcüstanla oyunlar üçün heyəti açıqlandı