2024 gözləntiləri: Olimpiadaya lisenziya sayı az olacaq

Yenicə başlayan 2024-cü il Azərbaycan idmanı üçün necə olacaq? Hazırda idman ictimaiyyətini düşündürən ən vacib sual məhz budur.

Son illərdə ölkə idmanında tənəzzülün baş verməsi heç kimdə sirr deyil. Əslində, belə hallar bir çox ölkədə baş verir. Buna idmanda nəsildəyişmə prosei deyilir. Ancaq bu proses daha çox komanda idman növlərində baş verir. Ümumilikdə idmana bunu tam olaraq aid etmək düzgün deyil.

İlin sonunda verilən idman hesabatı bir çox insanı ümidləndirə bilər. Yenə də qazanılan qələbələr, podiumlar və nailiyyətlərlə dolu bir il arxada qaldı. Ancaq bu uğurların ciddi olub-olmaması sual altındadır. Qazanılan nailiyyətlərin ciddiliyini Olimpiya Oyunları göstərməlidir.

Yayda 4 ilin ən vacib idman hadisəsi olacaq. Azərbaycan idmançısı və idmanı üçün əsas meyar Olimpiadadır. Bunu təkcə ölkəmizə aid etmək olmaz. Ümumiyyətlə, həvəskar idmançı üçün pik nöqtə Olimpiya Oyunları sayılır. Buna görə də biz idmanımızın hansı səviyyədə olmasını söyləmək üçün yayı gözləməliyik.

İyul ayında başlanacaq oyunlara ümidlərimiz hər zamankı kimi böyükdür. Ancaq əvvəlki illərlə müqayiəsədə əndişələr də çoxdur. Bunun da əsas səbəbi qazanılan lisenziyaların azlığı və daim güclü olduğumuz idman növlərində geriləməyimizdir. Müstəqillik qazandığımızdan sonra Olimpiadalardakı çıxışlarımıza nəzər salıb iştirakçı sayına diqqət yetirsək, əndişələrimizin həqiqətdən doğduğunu görmüş olarıq.

Atlanta Olimpiadasından başlayaraq hər bir növbəti oyunlarda iştirakçı sayında artım müşahidə edilirdi. Tokioda bu tendensiya qırıldı. Bu dəfə deyəsən, tariximizin iştirakçı sayı baxımından ən zəif Olimpiadası olacaq.

1996-cı ildə ölkəmizin 23 üzvü yarışlarda iştirak edirdi. Bu günə qədər qazanılan lisenziyaların sayı 9-a bərabərdir. Bundan sonra da, bir neçə növdə vəsiqələr əldə ediləcək. Böyük ehtimalla antirekord olmayacaq, amma ənənəvi olaraq geniş heyətlə təmsil edildiyimiz növlərdə böyük geriləmələrə şahidlik edəcəyik.

Birinci növbədə boks və güləşdəki vəziyyət acınacaqlıdır. Güləşdə yenidən müəyyən qədər dirçəlişi hiss etsək də, boks haqqında bunu söyləmək mümkün olmur. Vaxtilə, demək olar ki, bütün çəki dərəcələrində təmsil edildiyimiz Olimpiadalar olub. Ancaq indi vəziyyət kəskin şəkildə faciəvi hal alıb.

Azərbaycan idman tarixində ən çox medalı güləşçilərimiz qazanıb. Boks yalnız güləşə məğlub olmaqla ikincidir. Bu günə qədər boks idman növündə Olimpiya Oyunlarında 9 medalımız olub. İndi isə kiminsə medal qazanacağını təsəvür etmək də olmur.

Güləş və boksla müqayisədə cüdoda vəziyyət bir qədər normal görünür. Çox güman ki, lisenziya sayına görə cüdo başqa idman növlərini qabaqlayacaq. Medal üçün ümidlərimiz cüdoçularımızadır.

Bütün bunlar ilin əvvəlindəki mənzərədir. Yaya qədər hansısa dəyişikliklərin olacağı istisna deyil. Ancaq onu da yaddan çıxartmamalıyıq ki, idmanda qısa zaman kəsiyində möcüzə olmur.

İLQAR AĞAYEV

Yazı Azərbaycan Respublikasının Medianın İnkişafı Agentliyinin maliyyə dəstəyi ilə hazırlanıb.

Sahə: Uşaq və gənclərin fiziki və mənəvi inkişafında idmanın rolu