Əfsanəvi pilot Jil Vilnövün 1982-ci ildə San Marino Qran-Prisindəki son yarışında geyindiyi dəbilqəsi hərracda 1,25 milyon dollara satılaraq yeni dünya rekordunu qırıb. Bu barədə “Motorsport” nəşri xəbər yayıb.
Əvvəlki rekord Ayrton Sennanın 1992-ci ildə Belçika Qran-Prisində geyindiyi dəbilqəyə məxsus idi və bu dəbilqə 720 000 funt sterlinqə (təxminən 829 000 avro) satılıb. Vilnövün dəbilqəsi 30 il idi ki, şəxsi kolleksiyada saxlanılırdı. Həmin yarışda kanadalı sürücü komanda yoldaşını keçərək ikinci yeri tutmuşdu. İki həftə sonra Vilnöv Belçika Qran-Prisində həlak olmuşdu. Həmin qəza zamanı onun dəbilqəsi fərqli idi.
“GPA modelinin özü kolleksiyaçılar dünyasında olduqca nadirdir. Bundan əlavə, bu, hələ də mövcud olan cəmi beş – bəlkə də daha az – Jil Vilnöv yarış dəbilqəsindən biridir”, – deyə Şöhrət Zalı Kolleksiyasının rəhbəri Darren Cek bildirib.
Dəbilqə qara zolaqları olan qırmızı rəngdədir və arxasında stilizə edilmiş qırmızı V hərfi var.
