Ölkə futbolu
Kasıbçılıqdakı kəramət
Hər pisdə bir yaxşı axtarmağa dəyər. Bu səbəbdən neftin ucuz…
Hər pisdə bir yaxşı axtarmağa dəyər. Bu səbəbdən neftin ucuzlaşmasında da kəramət var. Qara qızılın dəyərdən düşməsi ölkəmizin iqtisadiyyatına mənfi təsir göstərsə də, məmurların, biznesmenlərin, səlahiyyət sahiblərinin fikirləşməsi, daha optimal variantları seçməsi üçün zərurət yaratdı.
Azərbaycanda bir qrup futbolçu var ki, yatmadıqları qapı yoxdu. “Xəzər Lənkəran”ın imkanlı vaxtlarında Mübariz Mənsimovun pullarının işığına yığışıblar, “Bakı”nın büdcəsi aşıb-daşanda Hafiz Məmmədovun. Ümumiyyətlə, hansı klubda pul-para məsələsi peşəkarlıqdan daha önəmli olubsa, onlar da orada zühur ediblər. Elə “Neftçi”, “Qəbələ”, “İnter”, vaxtilə “Şəmkir” və “Karvan” da onlar üçün həyatının komandası olub.
İndi çaylar quruyub. Daha istədiyi pulla səviyyəsi uyğun gəlməyən Saşa Yunisoğlu, Rail Məlikov, Branimir Subaşiç, Amit Quluzadə, Vaqif Cavadov, Mahir Şükürov dayaz sularda üzmür. Kamran Ağayev də belə etdi. Adı az qala hər mövsüm bir xarici klubla yanaşı hallanan, amma evdə milyonlar qazandığı üçün o təkliflərə gözünün ucu ilə də baxmayan millinin qapıçısı baş götürüb getdi.
Bunu neçə illərdi deyirik. Güclü milli komandamız olmasını istəyiriksə, yaxşı legionerlərimiz olmalıdı. Ola bilsin, heyətə düşmək baxımından çətinlik çəkəcəklər, uyğunlaşa bilməyəcəklər, amma istənilən halda bu olmalıdı. Evdə arzuladığı pulları rahat şəkildə ala bilməyirlərsə, onu qazanmaq üçün can qoyacaqlar. Necə ki, bunu Vaqiflə Mahir edir. Ərköyünlüyə öyrənən Kamran da qazanmaq üçün Qəbələdə, Lənkəranda şelləndiyi günləri yaddan çıxarıb əsl futbol oynamalıdı. Artıq əziyyətsiz qazanılan yüzminlər olmayacaq, ancaq oynayıb, nəsə əldə etməlidi.
Hələ 1-2 oyunçu da ölkədən qovulmalıdı. Yalnız layiq olduğu pulu təklif etməklə Əfran İsmayılovu, Nizami Hacıyevi, Elvin Məmmədovu, Ruslan Abışovu, Araz Abdullayevi, Rauf Əliyevi, pul bolluğundan azğınlaşan Elnur Allahverdiyevi də yola salmalıyıq. Belə olsa, onlardan kimsə məcbur qalıb, özünü göstərəcək, daha yaxşı klublara transfer olunacaq, yaşı ötən və potensialı olmayanlar isə Saşa Yunisoğlu kimi Bakı küçələrində veyillənəcək. Onların əvəzində Məqsəd İsayev, Nurlan Novruzov, Rəhman Hacıyev, Elvin Camalov, Elnur Cəfərov və başqaları yetişəcək.
Ümumiyyətlə, bizim futbolçuların ölkədən getməsi üçün sanki nəsə fövqəladə şeylər olmalıdı. Məlum qalmaqal üzündən ölkə çempionatı dayanan zamamı xatırlayın. O vaxt indi yaxınına gedə bilmədiyimiz Ukraynada 10 futbolçumuz çıxış edirdi. Rəqabət nəticəsində onların bir neçəsi özünü sübut da edə bildi. Hamının başına and içdiyi Kamal Quliyev “Volın”da azarkeşlərin sevimlisi idisə, Tərlan Əhmədov, Fərrux İsmayılov daim məşqçilərin güvəndiyi adlara çevrilmişdi. Mahmud Qurbanov “professor” ləqəbini, Samir Əliyev Rusiya çempionatına dəvəti orada aldı. Hələ o vaxt üçün nisbətən zəif futbolçularımızın İran çempionatını Azərbaycan birinciliyinə çevirdiyini də unutmayaq.
Sonra nə oldu? Azərbaycanda futbola böyük sərmayələr qoyuldu, həmin oyunçular təcili vətənə qaçdı. Beləcə Samir potensialına xəyanət edib, “Xəzər Lənkəran”ın verdiyi böyük pullara aldandı, digər biri “Karvan”ı, nə bilim daha hansı komandanı seçdi. Hamı böyük pullar qazandı, əvəzində ölkə futbolu bir addım da inkişaf etmədi, hamının qapazaltısı olduq. Və bir gün – neft ucuzlaşanda anladıq ki, bu futbolçulara böyük pullar verməklə həm onları məhv etmişik, həm də özümüzü.
P.S.: O da maraqlıdı ki, həmişə hansısa problem üzündən ölkədən getməyə məcbur olan futbolçulardan istedadı olanlar xaricdə baş çıxarıb. Rusiyada iz qoyan, “Betis” azarkeşlərinin ürəyinə yol tapan, hətta Portuqaliyada da oynayan Vəli Qasımovu, Rusiyada “Spartak”ın hakimiyyətinə son qoyan, Vladiqafqazın fəxri olan Nazim Süleymanovu xatırlayın. Onlar “Neftçi”dən küsdürüldükdən sonra böyük futbolçu oldu. Elə İsgəndər Cavadov da Moldovada istedadını göstərə bildi.
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar