Premyer-liqa
Axı, kimsə cəzalanmalıydı…
Dünən AFFA İntizam Komitəsinin qərarları açıqlansa d…
Dünən AFFA İntizam Komitəsinin qərarları açıqlansa da, son turda baş verən qalmaqal cəzasız qaldı. Cavid Hüseynovun “Bakı”nı azarkeşləri ilə yaşadığı insidentə görə heç bir tərəfə cəza verilmədi. Halbuki, olay matçdan sonra baş versə də, stadion ərazisində reallaşmışdı.
Düzdü, bu məsələyə görə konkret kimisə günahlandırmaq olmur. Çünki bunun üçün cəza mexanizmi yoxdu. Bir sıra ölkələrdən fərqi olaraq, bizdə matçdan sonra baş verən belə olaylara görə kiməsə cəza kəsilmir. Əslində, kəsilir, amma yalnız kiməsə lazım olanda. Məsələn, ötən il “Simurq” – “Neftçi” oyunundan sonra AFFA Hakimlər Komitəsinin sədri Xaqani Məmmədovla dalaşdığı üçün bakılıların rəsmisi Elnur Əşrəfoğlu cəzalandırıldı. İndi isə olaya hüquqi qiymət verilmir.
Doğrusu, çox pis şəkildə təhqir olunan Cavid Hüseynovu bu hadisəyə görə günahlandırmağı mənəvi cəhətdən düzgün hesab etmirik. Çünki azarkeşlər sadəcə, onun səbrini daşırdılar. Amma qaydaya görə, futbolçu buna qarşılıq verməməlidi. Belə hərəkətlər pis presedent yaradır. Heç azarkeşin də kiminsə hissiylə oynamağa haqqı yoxdu. Normal ölkədə həmin adamı tapıb stadioa girişinə qadağa qoyurlar. Bizdə isə olayın hər iki iştirakçısı cəzasız qaldı.
İstənilən halda əgər hər hansı bir hadisə olubsa, buna hüquqi qiymət verilməlidir. Qiymət verilməyəcəyi təqdirdə AFFA nümayəndəsi oyuna niyə göndərilir, onlar raportunda nə yazırlar? İntizam Komitəsi təqdim olunan raporta əsasən cəza kəsir. Orada bu insident qeyd olunmayıbsa, deməli, AFFA da belə olaylara göz yumur və onların təkrarlanmasında maraqlıdı. Tutaq ki, Cavid Hüseynov günahkar deyil. Belə olan təqdirdə, ixtişaş yaratdığına görə “Bakı”nın azarkeşlərinə cəza verilməli idi. Ümumilikdə isə, hər hansı bir cəzanın verilməsi labüd idi.
Hər hansı bir cəzanın verilməməsi ilə bağlı AFFA İntizam Komitəsinin sədri Tofiq Fətullayevlə əlaqə saxladıq. Sədr bu məsələyə fikir bildirməyərək, məsuliyyəti Məlik Həsənovun üzərinə atdı. Amma Peşəkar Futbol Liqasının Texniki İdman Şöbəsinin rəisi də dəqiq bir söz deməkdə çətinlik çəkdi. Belədə, oyuna təyin olunmuş AFFA nümayəndəsi Adil Nadirovla danışdıq. O isə yenidən çarxı AFFA-ya tərəf çevirdi: “Mən nə görmüşəmsə, yazıb, AFFA-ya göndərmişəm. Sizə nə lazımdırsa, AFFA-dan öyrənin”.
Gördüyünüz kimi, olay cavabdeh şəxslərin məsuliyyətdənqaçma üçbucağında itib-batır. Arada qalan isə valideynləri təhqir olunan Hüseynov, futbolçudan eyni cavabı alan azarkeş və bundan pis nümunə götürən digərləridi. Kimsə günahkardı, gəl ki, belə məsuliyyətsiz yanaşma üzündən hamı həm günahkar, həm də günahsız sayılır. Belədə, problem həllini tapmır, üstü torpaqlanaraq, keçilir, bu isə sabah daha böyük fəsadlara, daha ciddi qarşıdurmalara, bəlkə də faciələrə səbəb olacaq.
Rəsmilərdən ürəkdən tikan çıxaran bir açıqlama ala bilmədik. Amma bəlkə də, bu cəzanı hamıdan çox AZAL gözləyirdi. Çünki Cavid Hüseynovun cəzalanması növbəti turda Qəbələyə səfər edəcək komandanın işinə yaraya bilərdi. Görək “təyyarəçilər”in vitse-prezidenti Vaqif Qasımov bu məsələ bağlı nə düşünür: “Onlar boş şeylərdi. Kim oynadı və ya oynamadı – AZAL üçün fərqi yoxdu. Mən hansı hadisənin baş verdiyini tam olaraq bilmirəm. AFFA İntizam Komitəsinin verdiyi qərara münasibət bildirə bilmərəm. Çünki mən orada olmamışam və nə olduğunu görməmişəm”.
ZAMİN ALLAHVERDİYEV