Milli komanda
Elxan Məmmədovun "Rəvan"a daha bir qərəzi
19 yaşadək futbolçulardan ibarət milli komandamız İrlandi…
19 yaşadək futbolçulardan ibarət milli komandamız İrlandiyada təşkil olunan təlim-məşq toplanışında ilk yoxlama matçına çıxıb. Yığmamız irlandiyalı həmyaşıdlarına birabıçı hesabla məğlub olub – 0:6.
Maraqlıdı ki, bu qarşılaşmadan sonra seçməmizin baş məşqçisi Nikolay Adam darmadığını şərh edərkən, “belə oyunla heç bir futbolçunun yığmanın formasını geyməyə haqqı çatmır” deyib. AFFA-nın baş katibi Elxan Məmmədov da irlandlara biabırçı məğlubiyyətə görə məyusluğunu gizlətməyib. O, U-19-a görə məsuliyyət daşıyan Adamı vicdanlı olmağa səsləyib, öz narazılığını bildirib və alman çalışdırıcıdan hesabat tələb edib. Məmmədov inanır ki, Nikolay Adam müqaviləsinin sonunadək öz işinin öhdəsindən vicdanla gələcək.
Əslində, bu işdə Nikolay Adamın nə qədər günahı olub-olmadığını dəqiq bilmirik. Çox güman ki, alman çalışdırıcı toplanışa gedəcək heyəti özü müəyyənləşdirmir. Çünki özünə hörmət qoyan məşqçi cari mövsümdə 1 dəqiqə belə meydanda olmayan futbolçunu təlim-məşq toplanışına dəvət etməz. Maraq üçün qeyd edək ki, Finlandiyada başlayıb İrlandiyada qurtaracaq hazırlıq prosesinə “Neftçi”nin əvəzedici heyətindən 3 futbolçu cəlb olunub. Bunlar Fəhmin Muradbəyli, Mirkamil Həşimli və Sənan Əlizadədi. 22-ci tura qədər Mirkamil meydanda 622, Fəhmin 698 dəqiqə olduğu halda, Sənanın rəsmi matçda ayağı bir dəfə də olsun belə topa dəyməyib.
Ümumiyyətlə, U-19-a futbolçuların hansı qaydalara əsasən cəlb oldunduğunu söyləmək də çətindi. Sözügedən birabırçı məğlubiyyətdə “Bakı”nın əvəzedicilərində çıxış edən Təyyar Məmmədov meydana əsas heyətə çıxıb. O Təyyar ki, cari mövsümdə “Bakı”nın əvəzedicilərinin heyətində cəmi 361 dəqiqə meydanda olub. Düzdü, ola bilər ki, Nikolay Adam toplanışa cəlb etdiyi futbolçunu iş başında görmək istəyib. Buna görə də ona əsas heyətdə şans verib. Bəs, görəsən, alman çalışdırıcı onu milliyə çağırmamışa qədər iş başında görübmü?
Milliyə çağırılan digər futbolçuların da statistikasına nəzər yetirsək, Adamın da dediyi kimi, yığmanın formasını geyməyə layiq olmayan oyunçuların olduğuna şahidlik edə bilərik. Fikrimcə, bu işdə AFFA-nın baş katibi Elxan Məmmədov U-19-un çalışdırıcısının obyektiv qərar verməsinə mane olur. Məsələ burasındadı ki, U-19 Sank-Peterburqda təşkil olunan Qranatkin turnirində iştirak edəndə yığmaya cəlb olunan futbolçuların arasında “Rəvan”ın hücumçusu Əlibəy Məmmədli də var idi. Xatırladaq ki, Əlibəy cari mövsümdə “sarı-qırmızı”lı forma ilə birinci divizion matçına çıxıb, hətta qol vurmağı da bacarıb. Ötən ilin U-17 liqasının ən yaxşısı seçilən Məmmədlinin yığmadan kənar qalmasına heç cür anlam vermək olmur. Onu da qeyd edək ki, cari mövsümdə 7 oyuna 10 qol vuran Əlibəy həm də “Qarabağ”ın baş məşqçisi Qurban Qurbanovun nəzarət etdiyi futbolçulardandı, onu öz klubuna aparmaq niyyətindədi.
Bundan başqa “Rəvan”da Urfan İsmayılovla Elgün Nəbiyev də U-19-da çıxış etməli futbolçulardı. Görünür, son günlərdə assosiasiyanın baş katibi Elxan Məmmədovun “Rəvan” haqda çarpıçı açıqlamalar verməsi, klubu uşaq futboluna baxa bilməməsi ilə suçlaması qərəzli addım imiş. Belə olmasaydı, AFFA-nın təşkil etdiyi U-19 Liqasının 49 xalla lideri olan, çempionluğa gedən “Rəvan”dan heç olmasa, bir futbolçu milliyə cəlb olunardı. Göründüyü kimi, baş katibin qərəzli mövqeyi həm yığmamızın, həm də gənc futbolçuların inkişafına mane olur.
EMİN SƏFƏROV