Premyer-liqa
“Qardaşlar”a xüsusi nəzarət olmayacaq
Premyer Liqanın 24-cü turu çərçivəsində "?…
Premyer Liqanın 24-cü turu çərçivəsində "İnter" “kiçik qardaş”ı "Simurq"u qəbul edəcək. Bu oyun daim diqqət mərkəzində olsa da, indi daha da aktuallaşıb. Buna isə AFFA-nın baş katibi Elxan Məmmədovun son açıqlaması səbəb olub.
Məmmədov müsahibəsində "İnter" – "Simurq" oyunlarının nəticəsinin şübhəli olduğunu deyib: "Ən böyük şübhəmiz "Simurq" və "İnter" arasında keçirilən oyunlaradı. Amma son dövrlərdə keçirilən matçlarda daha çox heç-heçə qeydə alınır".
Əslində, bu açıqlamanın özündə təzad var. Baş katib öncə “Simurq” – “İnter” oyunlarından şübhələndiklərini deyir, daha sonra isə bu matçlarda heç-heçə qeydə alındığını vurğulayır. Halbuki elə heç-heçə də bəzən “qardaşlar”a sərf etdiyindən bu nəticələr də şübhəli sayıla bilər.
AFFA əvvəllər “İnter” – “Simurq” görüşlərini şübhəli bilib, bəzi qarşılaşmalara xüsusi komissiya da göndərirdi. Ancaq həmin vaxt heç nə sübut edilmədiyindən baş katibin indi belə açıqlama verməsi maraq doğurur. Görəsən, sabah baş tutacaq oyunda yenə xüsusi təftişçilər olacaqmı?
Baş katibin açıqlamasından sonra aktuallaşan məsələ bizi AFFA-nın İnformasiya və İctimaiyyətlə Əlaqələr departamentinin rəisi Mikayıl Nərimanoğluya üz tutmağa vadar etdi. Görəsən, baş katibin “siqnal”ından sonra yenidən “qardaşlar”a xüsusi nəzarət olacaqmı? Mikayıl bəy görüşə AFFA tərəfindən heç bir komissiya göndərilməyəcəyini bildirdi: “Elxan müəllim bildirib ki, əvvəllər şübhəli məqamlar var idi. Son illərdə bu komandalar arasında keçirilən oyunlarda şübhəli nəticələr öz təsdiqini tapmayıb. Bu səbəbdən də sabahkı oyuna komissiya göndərilməyəcək”.
ZAMİN ALLAHVERDİYEV