Milli komanda
Prosneçki üçün arzuolunmaz tendensiya
Sabah Avropa çempionatının seçmə mərhələsi ç…
Sabah Avropa çempionatının seçmə mərhələsi çərçivəsində Azərbaycan milli komandası Maltanı qonaq edəcək. Bu matç yığmamızın 2015-ci ildə keçirəcəyi ilk rəsmi oyundu. İndiyə qədər millimiz qrupda keçirdiyi 4 qarşılaşmada xala həsrət qalıb ki, bu da xərclənən milyonların qarşılığnda AFFA rəsmilərinə heç də baş ucalığı gətirən hal deyil.
Qarşılaşmanı əlamətdar edən bir neçə hadisə də var. Əvvəla, bu oyun millimizin baş məşqçisi Robert Prosineçki üçün debüt matçı olacaq. Xorvat çalışdırıcı "cırtdanlar"la görüşdə qələbə qazanmaqla Azərbaycan futbol tarixinə düşə bilər. Belə ki, indiyə qədər millimizi çalışdıran məşqçilərdən heç biri seçmə oyunlardakı debüt matçında qələbə qazana bilməyib. Bu mənada Prosineçkinin əlinə əla fürsət düşüb. Yalnız Karlos Alberto Torres ilk qarşılaşmasında – Uelslə oyunda heç-heçə edə bilib.
Həmçinin qazanılacaq qələbə, həm futbolçularda özünəinamı qaytara, həm də millidən küsmüş azarkeşləri sevindirə bilər. “Məmməmdağa vur qabağa” taktikasından istifadə edərək, necə gəldi müdafiə olunan xələfi Berti Foqtsdan fərqli olaraq, Prosineçkinin hücum futbolunu sevdiyi deyilir. Bu baxımdan sabahkı görüş xorvat çalışdırıcının bacarığını göstərməsi üçün gözəl şansdı.
Matçı maraqlı edən faktlardan biri də seçmə komandamıza uzun fasilədən sonra “Neftçi”nin heyətindən heç bir futbolçununun dəvət olunmamasıdı. Bundan əlavə, komandamız 2 il 2 gündən sonra Tofiq Bəhramov adına Respubilka stadionuna qayıdır. Yığmamız sonuncu dəfə bu arenada 26 mart 2013-cü ildə Dünya çempionatının seçmə mərhələsi çərçivəsində Portuqaliyanı qəbul etmişdi. Ötən müddətdə Bakıda keçirilən 6 görüşün hamsı “Bakcell Arena”da baş tutub. Maraqlısı budu ki, məhz bu 6 matçdan biri də maltalılara qarşı olub və komandamız həmin qarşılaşmada rəqibini 3:0 hesabı ilə üstələyib. Sabahkı qarşılaşmada Prosineçkininin yetirmələrinin arxayınlaşmamalıdı. Rəqib bir neçə gün öncə bizdən bir baş üstün olan Gürcüstan yığması ilə oyunda inadkar şəkildə qapsının toxunulmazlığını qoruya bilsələr də, yalnız son dəqiqələrdə buraxdıqları qollarla meydandan məğlub ayrılıblar. Bundan başqa qrupda bizimlə eyni sayda oyuna çıxan adalılar millimizdən fərqli olaraq bu görüşdə cəmi 7 qol buraxıblar və bizim Bakıda məğlub olduğumuz bolqarlardan səfərdə 1 xal ala biliblər.
Həmçinin millimiz indiyə qədər seçmə oyunlarda öz meydanında "cırtdan ölkə"lərə qarşı keçirdiyi oyunlarda elə də uğurlu çıxış edə bilmir. Misal olaraq Luksenburq və Lixtenşteynlə görüşləri yada salmaq kifayətdi. Bu tip matçlarda komandamız adətən bütün görüşü hücumda keçirsə də, 3 xal qazanmaq mümkün olmur. Xal itkisi bizim üçün faciə sayılacaqsa, maltalılar meydana məğlub olmamaq üçün çıxacaqlar.
Rəqibin heyətində ən böyük itki hücumçu Maykl Mifsudun olmamasıdı. Belə ki, yığmada keçirdiyi 108 matçda 39 dəfə rəqib qapılarına yol tapmaqla ölkəsinin bütün dövrlər üzrə ən yaxşı bombardiri olan hücumçu, cəza səbəbindən qaşılşamada iştirak edə bilməyəcək. Maraq üçün qeyd edək ki, Mifsud 2002-ci ildə Maltanın Azərbaycan üzərində qazandığı son qələbədə millisinin yeganə qolunun müəllifi olmuşdu.
ELMAR ABDULLA-ZADƏ