Premyer-liqa
Çingiz Abdullayev üçün Zaqatala şousu
“Simurq” – “Neftçi” oyununa ezam …
“Simurq” – “Neftçi” oyununa ezam olunmağım gözlənilən idi, çünki hər həftə hansısa bölgəyə yollanırıq. Mən isə artıq ikinci dəfə idi ki, Zaqatalaya gedirdim. Avtobusa minərkən uzun yolun mənim üçün darıxdırıcı keçəcəyini düşünürdüm. Lakin bəlkə də, təsadüfdən avtobusda rastlaşdığım yol yoldaşlarımdan ikisinin futbolçu olması məni sevindirdi.
Beləliklə, veteran və gənc futbolçu ilə yol əsnasında maraqlı söhbətlərimiz və müzakirələrimiz oldu. Onların futbolumuzla bağlı ümumi dedikləri reallığı əks etdirirdi. Müzakirələrimiz o qədər maraqlı keçmişdi ki, artıq Zaqatalada olduğumuzun fərqinə varanda saat 16:00-ı göstərirdi. Oyunun başlamasına 1 saat vaxt qalmışdı, artıq stadionda idim. Matç başlayanadək stadiona toplaşan azarkeşlər istər-istəməzə diqqətimi çəkirdi. Zaqatalada azsaylı “Neftçi” fanatlarını görmək mümkün olsa da, yerlilərin üstünlüyü açıq-aşkar idi.
Baş hakim İnqilab Məmmədov start fitini səsləndirdi, oyun başladı. Amma hər iki tərəfdə bir neçə əsas oyunçunun yoxluğu elə ilk dəqiqələrdən özünü göstərdi. Xüsusilə də, “Simurq”da Draqan Çeran və Samir Zərgərovun yoxluğu komandanın məğlubiyyətini şərtləndirdi.
İlk hissə o qədər maraqlı keçmədi. Daha çox hücum edən zaqatalalılar olsa da, Rəşad Eyyubovla Stepan Polyak imkanları sağa-sola xərcləyirdilər. Fasilədən sonra isə paytaxt klubunun baş məşqçisi Arif Əsədov bir neçə dəyişikliyə əl atdı ki, bu da öz sözünü dedi. Flavinyonun meydançaya daxil olması “Neftçi”nin oyununa sanki can verdi. “Simurq”lu futbolçular isə mütləq qol şanslarından yararlanmaq niyyətində “deyildilər” – bacarmırdılar. Eyyubov şansları dəyərləndirə bilsəydi, bəlkə də bombardirlər siyahısında ilk pilləyə qalxardı. O, həvəskar futbolçu kimi çıxış edir, Çeranın yoxluğunu hər an hiss etdirirdi.
74-cü dəqiqədə İnqilab Məmmədov “ağ-qaralar”ın müdafiəçisi Karlos Kardozonu rəqib futbolçunu vurduğuna görə oyundan qovdu. Elə oyunda gərginlik də bundan sonra başladı. Düzü, olduğum mövqedən Kardosonun Cihan Özkaranı vurub-vurmadığı dəqiq görünmürdü, həm də futbolçuların üzü əks tərəfə idi. Amma sonradan videoyazını izlədim və həmişə çılğınlığı ilə seçilən braziliyalının İntizam Komitəsindən də cəza almalı olduğunu düşünürəm. Adam dəlidi, dəli…
Bundan sonra 10 nəfərlə qalan “Neftçi”nin müdafiəyə oturacağı gözlənilsə də, Nikolas Kanales yenə özünü göstərdi. Artıq neçənci dəfədi ki, bu hücumçu vurduğu qollarla komandasının bərbad oyununu arxa plana atırdı. 76 dəqiqə meydanda varlığı ilə yoxluğu bəlli olmayan çilili forvard rəqib müdafiənin səhvindən istifadə edərək, “sarı-qaralar”ı məyus etdi. “Peşəkar ovçu” bununla meydan sahiblərinin Avroliqa arzusuna da ciddi zərbə vurdu.
Oyundan dərhal sonra “Neftçi”nin yarımmüdafiəçisi Julius Vobay olay çıxardı. O, rəqib komandanın azarkeşləri tərəfə gələrək, “Simurq”lu fanatlara qarşı qeyri-etik jestlər göstərdi. Təəssüf ki, o, bunu bir neçə dəfə təkrar etdi. Bundan ara qızışdı, məzhəb itdi. Zaqatalalı azarkeşlər meydançaya daxil olmaq istəsə də, asayiş qoruyucuları buna imkan vermədilər. Ancaq futbolçular arasında münaqişə davam edirdi. Bir-birlərinin ünvanına elə söyüşlər yağdırırdılar ki, sanki bülbül cəh-cəh vururdu. Baş verən xoşagəlməzlik məşqçilərin işə qarışması ilə sakitləşdi.
Zaqatalalı fanatlar sən demə, bayırda Vobayı gözləyirlərmiş. “Simurq”lularla “Neftçi”nin mühafizəçilərinin söhbətinin qızışmasını görən qonaqların icraçı direktoru Elnur Məmmədov qarşıdurmanın geniş vüsət almaması üçün araya girdi. Polislərlərin də məsələyə qarışmasından sonra söz-söhbətə son qoyuldu.
Amma “sarı-qaralı” fanatlar bununla kifayətlənmək istəmirdilər. Onlar təhqir olunduqlarını deyərək, Vobayın üzr istəməsini tələb edirdilər. Onlar haqlı idilər. Çünki məsələ heç də “Neftçi”nin rəsmi saytı vasitəsi ilə təqdim olunan videogörüntülərlə bitmir. Syerra-leoneli legioner həmin videomaterialda ola bilər ki, komanda yoldaşları ilə zarafatlaşırdı, ancaq ədəbsiz jestləri azarkeşlər qarşısında təkrarlaması məqsədliydi. Fanatlar bir yana, hətta “Neftçi”nin oyunçularının da bu hərəkətləri zarafat kimi qəbul etməsi adamı məəttəl qoyur. Matçın sonlarında irqçi təzyiqlərə məruz qalan Juliusun hədəfinin azarkeşlər olduğu o, soyunub-geyinmə otağına gedərkən dəqiqləşdi. Çünki futbolçu şortunu azarkeşlərə acıq verircəsinə aşağı çəkdi.
Bəlkə də, bu epizodu “Neftçi”nin baş məşqçisi Arif Əsədovun görməməsi mümkündü. Amma çalışdırıcının mətbuat konfransında Kardosonun intizamsızlığını da dəqiq görmədiyini deməsi maraqlı oldu. Görəsən, meydan məşqçilər skamyasından bir o qədər pis görünür? Ümid edirik ki, tərbiyəsizləri qovacağını vəd edən Çingiz Abdullayev ən azı videogörüntülərə baxdıqda ilk qurbanlarını müəyyənləşdirəcək. Axı, “Neftçi”nin yeni rəhbəri söz verib…
ZAMİN ALLAHVERDİYEV, Bakı – Zaqatala – Bakı