Premyer-liqa
Çingiz Abdullayev: "Bu axmaq söhbətlər yığışdırılmalıdı"
“Neftçi” klubunun Müşahidə Şurasının səd…
“Neftçi” klubunun Müşahidə Şurasının sədri, yazıçı Çingiz Abdullayev ANS telekanalında yayımlanan “Günə baxan” verilişinin qonağı olub. Futbolinfo.az xəbər verir ki, Bakı təmsilçisinin yeni rəhbəri söhbət əsnasında “Xəzər Lənkəran” və “Neftçi” komandaları arasında baş tutan və "Böyük oyun" adlandırılan qarşılaşmalaradan da danışıb.
Xalq yazıçısı tərəflər arasındakı gərginliyi belə şərh edib: “Bu həftə baş tutacaq Lənkəran səfərinə komanda ilə mən də gedəcəm. İnanmıram ki, hər hansı gərginlik olsun. Klublar arasında idman gərginliyi olmalıdı. “Talış”, “Bakı” kimi axmaq söhbətlər lazım deyil. Biz hamımız azərbaycanlıyıq, bir millətik. Keçən dəfə stadionu da yandırıblar. Biz dərk etməliyik ki, bu futboldur, idmandır. Kim daha yaxşı oynayırsa, o qalib gəlsin. Bu axmaq söhbətlər yığışdırılmalıdı. Onsuz da, 1993-cü ildə Azərbaycanı bölürdülər. Talış-Muğan Respublikası, Ləzgilər, o biri tərəfdə də ermənilər… Onsuz da, Azərbaycanı parçalamaq istəyirlər. Unutmayaq ki, biz azərbaycanlıyıq”.
Abdullayev “Neftçi" uduzsa, futbolçuları hansı cəza gözləyir?” sualını da zarafatyana cavablandırıb: “Futbolçuları heç bir cəza gözləmir. Özüm də gedəcəyəm. Görsəm ki, “Neftçi" uduzur, meydana çıxacam. Bəlkə, qol da vurdum”.
Qeyd edək ki, Topaz Premyer Liqanın növbəti – 29-cu turunda baş tutacaq “Xəzər Lənkəran” – “Neftçi” qarşılaşması aprelin 9-da start götürəcək.