Premyer-liqa
Kardozo olayı iki AFFA rəsmisini üz-üzə qoydu
Topaz Premyer Liqasının 28-ci turu çərçivəsində Zaq…
Topaz Premyer Liqasının 28-ci turu çərçivəsində Zaqatalada baş tutan “Simurq” – “Neftçi” matçında qonaqların müdafiəçisi Karlos Kardozo rəqibinə bilərəkdən zərbə yetiridiyinə görə matçın baş hakimi İnqilab Məmmədov tərəfindən birbaşa qırmızı vərəqəyə layiq görülüb. Qarşılaşmanın protokolunda da braziliyalının “sarı-qaralar”ın üzvü Cihan Özkaraya bilərəkdən zərbə vurduğu təsdiqlənib.
Maraqlıdı ki, birbaşa qırmızı vərəqə görən futbolçu növbəti 2 oyunu buraxmalı olduğu halda, AFFA İntizam Komitəsi fərqli qərar qəbul edib. İK Karlosu 3 oyunluq, amma ikisi şərti olmaqla, cəzalandırıb. Futbolçuya 6 ay sınaq müddəti verilib ki, özünü bu müddət ərzində ağıllı aparmasa, həmin 2 oyunluq cəza da qüvvəyə minəcək.
Əslində, burada İK 3 oyunluq cəzanı ictimaiyyətin gözünə soxmağa çalışır. Nəzərə alaq ki, 7 oyundan, yəni 50 gün sonra mövsüm başa çatır. Müdafiəçinin “Neftçi”də qalıb-qalmayacağı isə bəlli deyil. İK mövsümün başa çatacağını nəzərə alaraq, cəzanı ən azından növbəti mövsümün ilk aylarına da şamil etməli idi.
Bundan başqa, birbaşa qırmızı vərəqənin standart cəzası 2 oyundusa, bu futbolçu niyə 1 matçı buraxmalıdı? Yoxsa “Neftçi”nin yeni rəhbərliyi işə AFFA-ya təzyiq göstərməkdən, sifariş verməkdən başlayıb?
Məsələ ilə bağlı İntizam Komitəsinin sədri Tofiq Fətalullayevlə əlaqə saxladıq. Əvvəlcədən də proqnozlaşdırdığımız kimi, Tofiq bəy Peşəkar Futbol Liqasının baş direktoru Məlik Həsənovla əlaqə saxlamağımızı məsləhət gördü və bununla əmr qulu olduğunu, formal vəzifə sahibi olduğunu isbatladı.
Məlik bəy isə açıqlamasında oyunun baş hakimi İnqilab Məmmədovu suçladı. O, gənc referinin həmin epizodda tələsik qərar verdiyi gizlətmədi: “İntizam Komitəsinin iclasında “Simurq” – “Neftçi” matçının videoyazısına baxılarkən müəyyən olundu ki, Karlos Kardozo faktiki olaraq rəqibinə zərbə vurmayıb. Baş hakim bu epizodda tələsib. Qəsdən kobudluq olmadığından belə qərar qəbul olunub. Orda zərbə yoxdu, sadəcə, oyunçuya tərəf əllə hərəkər var. Baş hakim həmin epizodda sarı vərəqə ilə kifayətlənə bilərdi. İntizam Komitəsi bütün bunları nəzərə alaraq, Kardozo haqda bu cür qərar çıxardı. Hakim də insandı, səhv edə bilər. Səhv yox, sadəcə, belə qərar qəbul edib. Biz oyunun komissarı, hakimləri və hakim-inspektorlarla bağlı mütəxəssisləri dinlədik. Onlar bir ağızdan dedilər ki, baş hakim bu epizodda tələsib. Cəza 1 oyunluqdu, 2-si isə şərtidi. Bizdə əvvəl də belə praktika olub. Məsələn, Lənkərandakı oyunda da baş hakim qərarında tələsmişdi. Əslində, biz İntizam Komitəsinin qərarını şərh etməli deyilik. Sadəcə, hər şeyi dəqiq müəyyənləşdirmək istədiyinizdən sizə vəziyyəti izah etdim”.
Doğrudandamı, İnqilab Məmmədov tələsik qərar qəbul edib? Məlik Həsənovun fikri ilə Hakimlər Komitəsinin sədri Xaqani Məmmədov heç cür razılaşmır: “Sözügedən epizoda baxmışam. Qısa olaraq bildirim ki, oyunun baş hakimi İnqilab Məmmədov düzgün qərar qəbul edib. Tələsib? Niyə tələsib ki? Hakim nəyi gözləməliydi? Karlos Kardozo həmin epizodda rəqibini bilərəkdən vurub”.
Göründüyü kimi, bir səhvi, qərəzi, cinayəti gizlətmək istəyənlər digərinin ortaya çıxmasına səbəbkar olur. Hər kəs də öz işinin düzgün olduğu qənaətindədi. Ortada isə qazanan “Neftçi”di – ikili standartlardan faydalanan “Neftçi”.
EMİN SƏFƏROV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib