Ölkə futbolu
"Simurq"un son mövsümü
Topaz Premyer Liqasının son turunda “Qəbələ”yə məğ…
Topaz Premyer Liqasının son turunda “Qəbələ”yə məğlub olan “Simurq” Avropa Liqasına çempionatdan vəsiqə qazanmaq şanslarını xeyli azaltdı. 4-cü pillədəki əsas rəqibi ilə xal fərqi xeyli artan zaqatalalılar indi diqqətini ölkə kubokuna yönəltməyə, bu titulu əldə etməyə məcburdu.
Əslində, avrokuboka vəsiqə “Simurq”un yaşaması üçün yeganə şansdı. Əks halda komanda fəaliyyətini dayandıra bilər. Beynəlxalq Bankın İdarə Heyətinin sabiq sədri Cahangir Hacıyev postunu itirəndən və ölkəni tərk etməyə məcbur olandan sonra Zaqatala klubu bunu göz önünə alıb.
Hacıyev “İnter”in fəxri prezidenti olsa da, hər iki “qardaş”a hamilik edirdi. O, Zaqatala klubunu həyat yoldaşı bu bölgədən olduğu üçün yaratmışdı və rayonda da bir sıra şirkətləri var idi. Amma Cahangir bəy “devalvasiya oyunları”na görə postunu itirəndən sonra hər şey əlindən çıxmaq üzrədi və onun hansısa qazanc götürmədiyi ölkədə klub saxlayacağı mümkünsüzdü.
Artıq “İnter”in taleyi bəllidi. Mövsüm bitən kimi klub prezidenti Georgi Nikolov postunu tərk edəcək. Hacıyev tərəfindən ölkəmizə gətirilən bolqar Beynəlxalq Bankın, eləcə də klubun yeni rəhbərlərinin güvənməyəcəyi şəxsdi. Bundan başqa, artıq klub büdcəsinin yarıbayarı azaldılacağı dəqiqləşib.
“İnter”ə ayrılan maliyyənın belə azaldılması isə təbii ki, “Simurq”un, ümumiyyətlə, fəaliyyətini dayandırması ilə nəticələnəcək. Zaqatalalıların prezidenti Anar Bəkirov klubda sadəcə, kassir rolunu oynayır, Hacıyevin göndərdiklərini komandaya paylamaqla məşğul olurdu. İndiki halda Cahangir bəy yoxdusa, Bəkirova, ümumiyyətlə, gərək qalmır.
“Simurq” yalnız o halda yaşaya bilər ki, komanda kubokun qalibi olsun və belədə ona yeni hami tapılsın. Zaqatalalıların yarımfinalda çempion “Qarabağ”la oynayacağını, ağdamlıları yenəcəyi halda “Neftçi” – “İnter” cütünün qalibi ilə oynayacağını nəzərə alsaq, bu, çətin məsələ kimi görünür. Hacıyevin postundan istefasından sonra pulsuz qalan futbolçuların oyununda aşkar geriləmə olduğunu, komandanın uğursuz nəticələrə imza atdığını da bunun üstünə gəlsək, “Simurq” nağılının sona yetmək üzrə olduğunu deyə bilərik.
Ola bilər ki, yeni mövsümdə “Simurq” ianələr hesabına iddiasız bir komanda kimi mövcudluğunu davam etdirsin. Ancaq o dəqiqdi ki, prezident Anar Bəkirov, baş məşqçi Georgi Çixradze, eləcə də digər aparıcı futbolçular Zaqatalada qalmayacaq.
FƏRİD
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- I Liqa2024-04-30 14:45
“Araz Saatlı”nın məşqçisinə 2 oyunluq cəza
- Dünya futbolu2024-04-30 11:32
“Real” Kurtuanı türk qapıçı ilə əvəz etmək istəyir
- Ölkə futbolu2024-04-30 11:25
“Qarabağ” – “Neftçi” oyununun stadionu dəyişib