Ölkə kuboku
Azərbaycan kuboku: Derbi və ilk
Sabah Azərbaycan kuboku uğrunda yarımfinal mərhələsinin ilk oyun…
Sabah Azərbaycan kuboku uğrunda yarımfinal mərhələsinin ilk oyunları keçiriləcək. Futbolinfo.az xəbər verir ki, hər iki qarşılaşma Bakıda oynanılacaq.
Sözügedən mərhələ paytaxt derbisi ilə start götürəcək. Belə ki, “Neftçi” öz meydanında “İnter”i qəbul edəcək. Artıq indidən matçın gərgin keçəcəyini düşünmək olar. Çempionluq yarışında günü-gündən şansları azalan hər iki komanda üçün mövsümü major notda başa vurmaq baxımından bu yarış vacib əhəmiyyət daşıyır. “Ağ-qaralar” kubokun son sahibi kimi titulunu qorumağa çalışacaqsa, artıq mövsüm sonunda komandadan ayrılacağı dəqiqləşən Kaxaber Sxadadze isə burda işlədiyi 6 il ərzində heç vaxt qazana bilmədiyi ölkə kubokunu qazanıb, qalib kimi vidalaşmaq niyyətindədi. Flaqmanın son görüşlərdə bu rəqibinə qarşı qalib gələ bilməməsi, həmçinin “bankirlər”in ötən tur meydana çıxmaması və qarşılaşmaya daha yaxşı hazırlaşması “göy-ağlar”ın xeyrinə olan məqamdı. Bundan əlavə geridə qalan turda “Xəzər Lənkəran” səfərində böyük üstünlüyü əldən verən Arif Əsədovun yetirmələrinin əhval-ruhiyyəsinin yerində olmaması da onların əleyhinə olan bir məqamdı. Tarixə nəzər salsaq, görərik ki,“İnter” kubok yarışlarında rəqibindən üstündü. İndiyə qədər bu turnir çərçivəsində 12 dəfə qarşılaşan komandaların oyunlarında "bankirlər" 4 dəfə qalib gəlib, 2 dəfə məğlub olubsa, 6 matçda da bərabərlik qeydə alınıb. Elə topların fərqində də onların üstünlüyü var – 11:8.
Mərhələnin digər qarşılaşmasında isə “Qarabağ” və “Simurq” komandaları üzləşəcəklər. Təbii ki, bu görüşün favorit ağdamlılar olsa da, qarşılaşmanın onlar üçün çox çətin keçəcəyini proqnozlaşdırmaq olar. Belə ki, ölkə çempionatında avrokuboklara vəsiqə uğrunda əsas rəqibi “Qəbələ”dən 5 xal geridə qalan zaqatalalılar üçün kuboku qazanmaq bu baxımdan, bəlkə də son şansdı. Düzdü, rəqib çətin olsa da, “sarı-qaralar” “atlılar”a həmişə çətinlik yarada bilib. Bundan əlavə, matçın süni örtüklü meydançada keçirilməsi də zaqatalalılar üçün üstünlük sayıla bilər. Rəqibindən fərqli olaraq onlar evdə keçirdikləri görüşləri məhz süni meydançada keçirirlər. Maraqlıdı ki, bu komandalar indiyə qədər kubok yarışlarında heç vaxt üz-üzə gəlməyiblər. Bu baxımdan sabahkı qarşılaşma bir ilk sayılacaq.
Azərbaycan kuboku
Yarımfinalın oyunları
Yarımfinalın oyunları
13 aprel (bazar ertəsi)
19:00. “Neftçi” – “İnter”
“Bakcell Arena”
“Bakcell Arena”
18:00. “Qarabağ” – “Simurq”
“İnter Arena”
“İnter Arena”