Premyer-liqa
“Bakı” futbolçuları digər klubların maraq dairəsinə düşmək üçün oynayacaqlar”
Premyer Liqa sona yaxınlaşır. Finişə az qaldığı üç…
Premyer Liqa sona yaxınlaşır. Finişə az qaldığı üçün hərə öz iddiasına görə mübarizəsini davam etdirir. Bu gün bizi 4 gərgin oyun gözləyir. Bununla bağlı Məşqçilər Komitəsinin Sədri və futbol mütəxəssisi Vaqif Sadıqovun fikirlərini öyrəndik.
"(“Neftçi” – “Qəbələ”) Avroliqaya vəsiqə qazanmaq üçün mübarizəyə qoşulan “Qəbələ” qalib gələcəyi təqdirdə mükafatçılar sırasına düşmək şansı əldə edəcək. Hər iki komandanın son matçlarında uğurlu çıxış etdiyini nəzərə alsaq, fikrimcə, bu gün çox maraqlı oyunun şahidi olacağıq. Məncə, ilk qolu vuran komandanın oyunu qalib kimi bitirmək şansı yüksəkdi. Həlledici görüş olduğu üçün matçın çox gərgin keçəcəyini deyə bilərəm. Mənə elə gəlir ki, hər iki komandanın şansları bərabərdi.
(“Bakı” – “İnter”) Fikrimcə, “İnter”in bundan sonrakı oyunlarda xal itirməyə haqqı yoxdu. Qarşıdakı hər bir matçda qalib gəlmək üçün öz iddialarını ortaya qoymalıdılar. Məncə, görüşün qalibi “İnter” olacaq. Baxmayaraq ki, “Bakı” komandasından hər qarşılaşmada surpriz gözləmək olar. Onlar bu gün öz nüfuzları qorumaq və Premyer Liqada çıxış edən digər klubların maraq dairəsinə düşmək üçün mübarizə aparırlar. Elə də asan olmayacaq, ancaq yenə də deyirəm “İnter” bu görüşdə üstün tərəf kimi görünür.
(AZAL – “Sumqayıt”) Çox maraqlı oyun olacaq. Deməzdim, hər iki komanda hazırda istənilən oyunu sərgiləmir, sadəcə, lazımı nəticəni qazana bilmirlər. Bu onlar üçün vacib amildi. Müsbət nəticə əldə edən tərəf bundan sonrakı qarşılaşmalarda bunun davamını da gətirə bilər. AZAL bundan sonra xal itkisinə məruz qala bilməz. Avroliqaya düşmək uğrunda mübarizə aparması baxımından komanda bu gün mütləq qələbə qazanmalıdı. “Sumqayıt” isə “qara zolaq”dan çıxmaq üçün oynayacaq. Komanda lazımi nəticə qazanmaq üçün psixoloji üstünlük əldə etməlidi. Mən bu matçda qalib tərəf görmürəm. Fikrimcə, qarşılaşma heç-heçə başa çatacaq.
(“Simurq” – “Qarabağ”) Məncə, ən gərgin oyunlardan biri də məhz bu qarşılaşma olacaq. Çoxları bu görüşdə “Qarabağ”ı favorit sayır. Ancaq “Simurq”un əsas məqsədi Avroliqaya vəsiqə qazanmaqdı. Düzdü, ölkə kuboku yarışlarında da onların şansları hələ də qalır və rəqib yenə də ağdamlılardı. Çempionatda da demək olarki, şansları hələ də var. Bu qarşılaşma onlar üçün çox həlledici bir matç olacaq, nəinki “Qarabağ” üçün. Qurban Qurbanovun yetirmələri “Neftçi” və “İnter”lə oyunlara kimi xal itkisinə yol verməməlidi. Məncə, “Qarabağ” həmin qarşılaşmalara qədər xal fərqini qoruyub saxlamaq üçün mübarizə aparacaq. Bu görüşdə heç kimi qalib tərəf kimi görmürəm və fikrimcə, qarşılaşma heç-heçə başa çatacaq".
ELMAR ABDULLA-ZADƏ
- Milli komanda2024-05-03 08:00
Vay(ss) bizim halımıza?
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq