Premyer-liqa
"Qəbələ"nin məşqçisi: "Hazırda futbolçularımızda özünəinam böyükdü"
"Qəbələ"nin baş məşqçisi Roman Qriqorçuk…
"Qəbələ"nin baş məşqçisi Roman Qriqorçukun köməkçisi Mixaylo Savka klubun qəzetinə maraqlı açıqlamalar verib. Futbolinfo.az xəbər verir ki, Azərbaycanda ilk dəfə olan ukraynalı mütəxəssis gördüklərindən razı qalıb:
“Qəbələ”də 3 aydı işləsək də, bu müddət futbolçulara oyun fəlsəfəmizi tam aşılamaq üçün yetərli deyil. Təbii ki, hər bir yeni oyunçuya adaptasiya üçün vaxt lazımdı. Əsas odur ki, Qəbələdə çalışmaq üçün əla şəraitə malikik. Kiçik, ancaq rahat stadionumuz var. Məşqlər yüksək səviyyədə keçir, futbolçular var-gücləri ilə çalışırlar”.
53 yaşlı məşqçi yeni futbolçuların meydanda gördüyü işi dəyərləndirir və mütəxəssislərin bunu daha yaxşı müəyyən etdiyini deyir: “İşgüzarlığa görə bütün futbolçularımıza minnətdaram. Verilən tapşırıqları vicdanla yerinə yetirirlər. Ola bilər, bəzi futbolçularımız ağır yükləmələrə tam hazır deyillər. Əslində, Türkiyə toplanışında da onlara çətin olduğunu görürdük. Ukrayna futbolunda fiziki hazırlığa xüsusi diqqət verilir. Ona görə də, bizimlə gələnlər bu planda daha üstündürlər. Ancaq artıq bütün futbolçularımız fiziki hazırlıq səviyyəsini yüksəldiblər və oyunlarda 90 dəqiqə tam gücləri ilə oynayırlar”.
Oyun quruculuğu məsələsinə toxunan çalışdırıcı məşqçi korpusunun “Qəbələ”də uğuru futbolçuların fərdi ustalığında deyil, komanda oyununda axtardığını bildirdi: “Çempionatda öndə gedən komandalar oyunlarını, əsasən, lider futbolçular üzərində qurur. Bizdə isə yanaşma fərqlidi. Baş məşqçimiz çalışır ki, “Qəbələ” komanda oyunu ilə uğur qazansın. Oyunçu fərdi planda güclü olsa da, istənilən halda, seçilən taktikaya uyğun oynamalı, məşqçilərin tələblərinə tabe olmalıdı. Komanda hamılıqla həm müdafiəyə çəkilməli, həm də hücum etməlidi”.
Savka məşqlərdə daha çox müdafiəçilərlə çalışır. Bu da təsadüfi deyil. Axı onun özü də vaxtilə müdafiəçi olub: “Doğrudu, yarımmüdafiədə də oynasam, müdafiəyəmeylli futbolçu olmuşam. Hazırda “Qəbələ”nin müdafiə xəttində ciddi problemlərin olduğunu demək düz olmaz. Hazırkı məşqçilər korpusu cəmi 2-3 aydı “Qəbələ”ilə çalışır. Razıyam, uğursuz oyunlarımız olub. “Neftçi” və “Simurq”dan 3 top buraxdığımız matçlarda rəqiblər “hədiyyələrimiz”dən yararlandılar.“Simurq”la Qəbələdəki kubok matçında isə qapıçımız Dmitri Bezotosnının günü deyildi. Heç bir futbolçu, komanda səhvlərdən sığortalanmayıb. Səhvlər təkrarlanmasın deyə ciddi çalışırıq”.
Məşqçinin fikrincə, komandanın sabit çıxış etməsi, ilk növbədə, futbolçuların psixoloji durumundan asılıdı: “Hazırda futbolçularımızda özünəinam böyükdü. Ardıcıl qələbələrdən sonra futbolçuların əhval-ruhiyyəsi xeyli yaxşılaşıb. Uğurlu çıxış davam etdikcə, rəqiblər “Qəbələ”ylə oyuna daha ciddi motivasiya ilə çıxacaqlar. Bu isə işimizi daha da çətinləşdirəcək. Ona görə də, yaxşı nəticə qazanmağımız bundan sonra psixoloji durumdan çox asılıdı. Əminliklə deyə bilərəm ki, komandamız hər oyunda maksimal nəticə qazanmağa çalışır. Şanslarımız haqda isə danışmaq istəməzdim. Hər şeyin sonda bizim üçün uğurlu bitəcəyinə ümid edirik”.
Sonda veteran futbolçu “Qəbələ”ni “Çernomorets”lə müqayisə etdi. Lakin o, bunun çətin olduğunu dedi və fikrini belə əsaslandırdı: “Ukrayna Premyer Liqasının Azərbaycan çempionatından səviyyəcə üstün olmasını nəzərə almaq lazımdı. İşlədiyimiz bu 2 komandada futbolçuların fərdi oyun keyfiyyətləri də fərqlidi. Məncə, “Qəbələ”ylə nəyəsə nail olmalıyıq ki, sonra müqayisə aparaq. İndi bunu etmək mənasızdı”.
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- I Liqa2024-04-30 14:45
“Araz Saatlı”nın məşqçisinə 2 oyunluq cəza