Ölkə futbolu
“Xəzər Lənkəran”: Alternativ variantımız hazırdı
FİFA “Xəzər Lənkəran”a transfer cəzası tətbiq edib…
FİFA “Xəzər Lənkəran”a transfer cəzası tətbiq edib. Buna Veldin Muharemoviçin cənublulardan şikayət etməsi səbəb olub.
Maraqlıdı ki, Lənkəran klubunun rəsmiləri bu iddianı qəbul etmir. Saytımıza danışan “Xəzər Lənkəran”ın mətbuat xidmətinin rəhbəri Hüseyn Cəbrayıloğlu növbəti dəfə Veldinin iddiasının FİFA tərəfindən qəbul edilmədiyini bildirib: “Mən məsələ ilə yenidən maraqlandım. Kluba daxil olan son məlumatda yazılıb ki, Veldin Muharemoviçin tələbi qəbul olunmadı. Amma bu iş növbəti dəfə araşdırılacaq. Vəziyyət indi belədi. Bundan sonra necə olacağını bilmirəm. Aldığım məlumata görə, bizim tələblərimizə əsasən Veldinin tələbi qəbul olunmayıb. Bizdə o adam meydana çıxmayıb. Sonradan da transferindən imtina edilib. Amma futbolçu və meneceri tələbində israrlıdı. Buna görə də araşdırma gedir. Son olaraq, qadağa ilə bağlı heç nə yoxdu. Belə olsaydı, Ukraynadan baxışa futbolçu dəvət etməzdik ki”.
“Bosniyalı futbolçu açıqlamasında cənublulara qadağa qoyulduğunu təsdiqləyib axı” sualını isə Cəbrayıloğlu belə cavabladı: “Bilirəm. Qərar verilibsə belə, bu barədə kluba məktub daxil olmayıb. İnanmırıq ki, bununla bağlı qadağa qoyulsun. AFFA-ya gələn məktubda da futbolçunun tələbinin qadağan olunmadığı yazılıb. Mənə sadəcə, bir şey çatmır. Bu məsələyə görə gəncləşdirmə siyasətinə əl atmışıq iddiaları ilə heç cür razılaşmıram. Məgər məntiq nəzəriyyəsini bilmirlər? Mən əgər kluba transfer qadağası qoyulacağını bilirəmsə, əlimdə olan futbolçuları niyə göndərirdim? Əgər futbolçu alacağımı bilmirdimsə, heyətimi qoruyardım da. Gələn il iddialı olacağamsa, futboçuları göndərməzdim də. Əgər belə bir şey varsa, transfer edə bilməyəcəyimi bilirdimsə, niyə bu cür addım atırdım? Bunun məntiqi yoxdu axı”.
Bəs görəsən, “Xəzər Lənkəran” üçün xoş olmayan qərar qəbul olunsa, cənublular özünü müdafiə etməyə hazırdımı? Cəbrayıloğlu məsələyə belə aydınlıq gətirdi: “Bu, Azərbaycan səviyyəsində inqilaba bərabər bir şeydi. Elə bir klub yoxdu ki, CAS-dan gələn qərarı dəyişdirsin. Biz sadəcə, doğru olduğumuzu isbat etmişik. Hər ehtimala qarşı qeyri bir şey baş verə biləcək duruma da hazırıq. Bizim alternativ variantımız hazırdı. Düzdü, mən hüquqşunas deyiləm. Klubun mətbuat xidmətinin rəhbəri kimi müəyyən prosesləri öyrənib, ictimaiyyətə açıqlayıram”.