Ölkə futbolu
Gəncəlilər "Kəpəz"in Bakıya köçməsindən narazıdı
"Kəpəz"in Topaz Premyer Liqasında oynaması üç…
"Kəpəz"in Topaz Premyer Liqasında oynaması üçün lisenziya almasını xəbər vermişdik. AFFA-nın Lisenziyalaşdırma Komissiyasının iclasında Gəncə təmsilçisinin lehinə müsbət qərar verilmişdi. Ancaq gəncəlilər bu qərara tam sevinə bilmirlər. Çünki Gəncə şəhər stadionu bərbad gündə olduğundan oranın təmirə ehtiyacı var. Bu durumda isə "Kəpəz" məcburiyyətdən ev oyunlarını başqa arenada keçirməlidi. Artıq ev matçları üçün "Dalğa Arena"nın nəzərdə tutulması açıqlanıb.
Bəs görəsən, gəncəli azarkeşlərin məlum qərarı, həmçinin sevimli komandalarının paytaxta köçməsini necə qarşılayır? "Xəmsə" fan-klubunun rəhbəri Adil Məmmədov son günlər yaşananlara belə şərh verdi: "Düzdü, "Kəpəz"ə lisenziya verilməsi qərarını gənc nəsil yaxşı qarşıladı. Lakin yaşlı nəsildə bir az narazılıq oldu. Yəni istəməzdik ki, komanda bu cür Premyer Liqaya çıxsın. Başqa sözlə, "Kəpəz" öz gücünə elitaya çıxsaydı, daha yaxşı olardı. Yəni komanda çempion olub, vəsiqə qazanardı. Yaxşı haldı ki, Gəncə futbolu diqqətdən kənarda qalmadı. Sözün düzü, komandamızın en oyunlarını "Dalğa Arena"da keçirəcəyini eşidəndə bu xəbəri pis qarşıladıq.
Mən də daxil olmaqla azarkeşlərin çoxu narazıdı. Hələ ki, gözləmə mövqeyindəyik. Bir neçə gündən sonra bununla bağlı "Xəmsə" fan-klubun saytında açıqlama verəcəyik. Belə baxanda, mən Bakıda yaşayıram. "Dalğa Arena"ya yollanmaq mənə daha yaxındı. Lakin mən yalnız özümü düşünmürəm. Ümumilikdə Gəncə azarkeşinin marağını düşünürəm. Fikrimcə, ev qarşılaşmaları Gəncəyə yaxın bölgələrdə keçirilməlidi. Bildiyiniz kimi, "Karvan" fəaliyyətini dayandırıb. Ən yaxşı variant görüşlərin Yevlaxda keçirilməsidi. Bundan başqa Tovuz və Şəmkirdə də oynamaq olar. Əgər Gəncə futbolunun adı hallanırsa, bu Gəncədə hallanmalıdı, Bakıda yox. Yenə deyirəm, Gəncədə stadionu təmirə dayandırılırsa, onda yaxın bir bölgəyə baş vurmaq lazımdı. Göygöl Olimpiya stadionu da var. Klub prezidenti Mehman Allahverdiyevlə də danışmışam. Mehman müəllim qeyd etdi ki, Göygöldə stadionun xarici görünüşü yaxşıdı. Ancaq orda olan süni örtük yaxşı salınmayıb. Birbaşa betonun üzərinə salındıqdan futbolçuların zədə almaq ehtimalı böyükdü. Hazırkı çempionatı Bakı çempionatı da adlandırmaq olar. Onsuz da, paytaxtda oyunlara azarkeş gəlmir. Yalnız derbi matçlarında 1000-2000 azarkeş olur".
"Gəncəlilər artıq "Kəpəz"in elitada çıxış edəcəyinə inanırmı, yoxsa yenə də müəyyən şübhələr var?" sualına Adil bəy belə cavab verdi: "Mən AFFA-ya çox da bel bağlamıram. Bir də gördün fikirlərini dəyişdilər və "Kəpəz"i yox, başqa komandanı elitaya çıxardılar. Onlar buna kimi o qədər qərar verib, sonradan dəyişiblər ki… Ona görə də adam iki daşın arasında qalır. İnanım və ya inanmayım. Hər şey ola bilər. "Neftçala"ya lisenziya verərlər, "Kəpəz" "ofsayda düşər" (gülür). Bilmirəm, heç nə demək olmaz. Sponsor tapılmasa, ola bilsin fikirlərini dəyişdilər. "Kəpəz" hazırda Premyer Liqada oynamağa hazır deyil. Onsuz da, komanda birinci divizionda qapazaltı idi. 0:3 hesabı ilə uduzurdusa, indi elitada 0:10 məğlub olar. Yaxşı oyunçular olsaydı, komanda indi çempionatda 9-cu yerdə olmazdı. Onlar Gəncənin adına görə oynamırdılarsa, heç olmasa, öz adlarına görə oynayardılar. Çünki gəncdilər, yüksəklərə qalxmaq üçün yaxşı futbol sərgiləməlisən. Hazırda heyətdə olan futbolçulardan 1-2-ni komandada saxlamaq olar. Futbolçular məndən inciməsin, mən sözün düzünü deyirəm. Qalan uşaqları əvəzedicilərə göndərmək lazımdı. Çünki "Kəpəz" elitada çıxış etsə, onun əvəzedici komandası da olacaq. Bu arada, gələn mövsüm komandanın başında kimin duracağı da maraqlıdı. Aldığım məlumatlara görə, namizədlər arasında Mahmud Qurbanovla Vaqif Sadıqov da var".
TAHİR MƏMMƏDOV