Premyer-liqa
Kişi sözlü Pantiç Sadıqovu özündən çıxardı
Bir gün Molla Nəsrəddindən yaşını soruşurlar. Molla cavab?…
Bir gün Molla Nəsrəddindən yaşını soruşurlar. Molla cavabında 50 deyir. Üstündən bir neçə il keçir. Yenə Molla Nəsrəddindən yaşını soruşanda 50 cavabını verir. Molladan yaşını soruşan "Necə olur ki, bir neçə il keçir, amma sənin yaşın dəyişmir" sualını verir. Molla isə cavabında "Kişinin sözü bir olar" deyir.
Bu misalı əbəs yerə yazmadım. Premyer Liqamızın 10-cu turunda AZAL 850 azarkeş qarşısında ev sahibi "Bakı"ya futbol dərsi keçdi. 22 dəqiqəyə qapısında 2 top görən Vaqif Sadıqovun yetirmələri əzmkarlıq göstərərək Milinko Pantiçin komandasını yıxdı – 2:2. Hər halda səfər oyununda qapısından iki top buraxıb, rəqibdən bir xal almaq az şey deyil. Məsələ isə nə "təyyarəçilər"in əzmkarlığı, nə də "Bakı"nın xal itirməsi deyil. O boyda "Bakı"nın bu boyda Pantiçi yenə narazıdı.
Məğlub olduğu oyunlarda hakimlərə ədalət dərsi verən serbmütəxəssis bərabərliyi məğlubiyyət hesab edir. Deməli, dünən paytaxt təmsilçisi iki xal itirdi. Bunu Pantiç Premyer Liqanın 7-ci turunda "İnter"lə 2:2 bitən oyundan sonra demişdi: "Mənim üçün bu heç-heçə məğlubiyyətə bərabərdi. İki xal itirdiyimizi düşünürəm. İtirdiyimiz xalları qarşıdakı oyunlarda bərpa etməyə çalışacağıq".
Bakı derbisindən sonra 3 oyun keçirən bakılılar 4 xal qazanıb. "Sumqayıt" (1:0) üzərində qələbə, "Qarabağ" (0:3) məğlubiyyəti və AZAL (2:2) bərabərliyi.
Əvvəlcə Pantiçin dünən oyundan sonra dediklərinin bir hissəsinə nəzər yetirək: “Belə oyundan sonra sevinə bilmərəm. 2:0 irəlidə olan zaman rəqib hesabı bərabərləşdirdi. 90 dəqiqə ərzində bəxtimiz gətirmədi. Futbolçularım sona qədər mübarizə apardı. Növbəti dəfə həm mən, həm də yetirmələrim soyunub-geyinmə otağına girəndən sonra hakimlikdən narazılıqlarını bildirdilər. Dedilər ki, biz nə edək ki, hakimlik normal olsun? İdmançıyam, Azərbaycanın futboluna fayda vermək üçün bura gəlmişəm. Çox pis oluram ki, soyunub-geyinmə otağında 28-30 yaşlı futbolçularım mənə deyirlər ki, nəvaxta kimi bu belə davam edəcək?"
Doğrusu, serb məşqçinin məntiqi gülməlidi. Bacarıqsız futbolçuların bəhanəsini niyə həqiqət kimi qəbul edirsən ki? Yoxsa işinə yarayır? Hafiz Məmmədova hesabatı onların sözləriylə verirsən?
Rəhim Həsənovdan narazı qalan Milinko bu sözləriylə AZAL-ın də əziyyətini heç edir. Guya bərabərlik Sadıqovun komandasının zəhməti sayəsində yox, Rəhimin sayəsində olub. Pantiçin bu fikirlərinə münasibət öyrənmək üçün Vaqif Sadıqovla da əlaqə saxladım. Əsəbləşən Sadıqov AZAL-a hakim köməyinin olmadığını söylədi: "Bizə heç vaxt hakim köməyi olmayıb. Onda biz nə deməliyik? Mən heç vaxt hakimlikdən narazılığımı bildirməmişəm. Biz öz oyunumuzu göstərdik və qələbə qazandıq".
Sadıqovun sərt reaksiyasından sonra ona "Axı siz də bir neçə dəfə məğlubiyyətdən sonra hakimlikdən narazı qalmısınız" deyə bilmədim. Çünki həmkarının açıqlamasından elə hirslənmişdi ki, yalnız öz dediyini eşidirdi. Dişim dilimi dişlədi və sağollaşdım. Ancaq ən yaxın keçmişdə elə o da tez-tez hakimlərdən narazılığını dilə gətirib. Halbuki nədənsə hakimlər həmişə uzursuz oyunlardan sonra yada düşür, indiyədək kimsənin hakim sayəsində qələbə qazandığını dediyini eşitməmişik.
Bundan başqa Pantiç məğlubiyyətdən sonra verdiyi açıqlamada Azərbaycan futbolundakı istedadları üzə çıxaracağını bildirib. Çox güman Milinko "istedad" deyəndə paltardəyişmə otağında "Nəvaxta kimi bu belə davam edəcək" deyən 28-30 yaşlı futbolçuları nəzərdə tutmur. Kişinin sözü bir olar, istedad-zad axtarmayın, gənc futbolçuların yarıtmaz əcnəbilərin kölgəsində qalmasını da hakimlərin ayağına yazın…
RÖVŞƏN ƏHLİMANOĞLU