Ölkə futbolu
AFFA-dan növbəti absurd: 8 futbolçu 21 yaşlı olmalıdı
Avqustda AFFA-nın İcraiyyə Komitəsinin (İK) iclası keçiri…
Avqustda AFFA-nın İcraiyyə Komitəsinin (İK) iclası keçiriləcək. Artıq İK-nın verəcəyi qərarlardan biri məlumdu.
Futbolinfo.az saytının əldə etdiyi məlumata görə, AFFA Premyer Liqa komandalarının heyətlərinə də “barmaq” etməyi qərara alıb. Elita iştirakçıları İK-nın çıxaracağı qərarla bağlı artıq məlumatlandırılıblar.
Doğrudu, qeyri-rəsmi. Ancaq nə fərqi? Bir aydan sonra rəsmi don da geyindirib, edəcəklər “ciciş” qərar.
Məsələnin mahiyyəti isə bu cürdü. Komandaların start heyətində mütləq minimum 1 futbolçu 1994 təvəllüdlü olmalıdı. Oyunun iştirak ərizəsinə də, yəni “18-liy”ə 1996-cı və ya bundan da gec dünyaya göz açmış minimum 1 futbolçunun adı daxil edilməlidi.
Doğrudu, bu iki qərara bənzər vəziyyət ötən il də mövcud idi. Ancaq yenilik də var. Premyer Liqa iştirakçıların əvəzedici komandalarının start heyətində minimum 8 futbolçu 21 yaşı tamam olmayanlar yer almalıdı.
Birinci divizonu gənclər liqasına döndərib səviyyəsizləşdirən AFFA indi Premyer Liqanı da addım-addım bu yola sürükləyir. Məgər əvəzedici komandada neçə gənc futbolçunun çıxış etməsi klubun daxili işi deyil? Deyək ki, komandanın 2 aparıcı futbolçusu zədədən yeni qurtulub, ikisi sarı vərəqə limitinə görə əsas komandasının iştirakı ilə oyunu buraxmalıdı, 2 oyunçunu da baş məşqçi cəzalandıraraq, əvəzedici komandanın düdşərgəsinə göndərib. İndi bu oyunçuları ha dürtün start heyətinə, görüm necə sığışdıracaqsınız!?
Absurd qərarın arxasında 2020-ci ildə bir neçə oyunu Bakıda təşkil olunacaq Avropa çempionatının final mərhələsinə vəsiqə qazanmaq məqsədi dayanır. Ancaq bu, daha çox süni mayalanmanı xatırladır. Deməli, oyunçular meydançaya performansına yox, şəxsiyyət vəsiqəsinə görə çıxacaqlar. Rəqabətə tab gətirə bilməyən, ayağı ayağına dolaşan futbolçuyabənzər 90 dəqiqə yuxarı-aşağı qaçmaqla peşəkar olacaq? Ay-hay!
Bax, bədbəxtçilik bundadı! Sabah İK bu qərarı səsləndirib, çəpik çala-çala qəbul edəcək. İxtiyarları nədi əleyhinə səs versinlər? Bu, bir daha sübut edir ki, Azərbaycan futbolu ilə bağlı qərarları İcraiyyə Komitəsi vermir. İK üzvlərinin qabağına nə qoyulursa, onu da dəstəkləyirlər.
CEYHUN ƏLİYEV
- Ölkə futbolu2024-04-25 17:10
Klublar çətin vəziyyətdə: AFFA yardımları dondurub
- Ölkə futbolu2024-04-26 08:00
Juninyo – Avropanın ən yaxşı braziliyalısı
- Ölkə futbolu2024-04-26 09:08
“Qarabağ”ın ildən-ilə böyüməsi məni qətiyyən təəccübləndirmir”
- Ölkə futbolu2024-04-26 10:17
Samir Abasov Laporta ilə görüşdü