Digər idman növləri
27 illik əməkdaşlıq bitdi
Əfsanəvi amerikalı qolfçu Tayger Vudsun “Nike” ilə 27 il (1996-cı ildən) davam edən və ona 460 milyon dollardan çox qazanc gətirən əməkdaşlığı başa çatıb. Şirkətin isə Vuds ilə müqavilə müddətində əldə etdiyi gəlir milyardlarla dollar təşkil edir.
“27 il əvvəl ən məşhur brendlərdən birinin bir hissəsi olmaq mənə qismət oldu. Bu müddət gözəl xatirələrlə doludur. Fil Naytın (şirkətin baş direktoru və təsisçisi) sayəsində “Nike Golf” layihəsi yarandı. Buna görə də şəxsən ona, eləcə də bütün heyətə və digər idman xadimlərinə təşəkkür etmək istəyirəm. Sizinlə işləməkdən zövq aldım. İnsanlar məndən yeni layihənin olacağını soruşmağa başlayacaq. Bəli, mütləq olacaq. Los-Ancelesdə görüşənədək! Tiger”, – deyə Vuds sosial şəbəkə hesabında qeyd edib.
“Siz rəqabətə, stereotiplərə, konvensiyalara, köhnə düşüncə tərzinə meydan oxudunuz. Siz bütün qolf təşkilatına meydan oxudunuz. Bizə meydan oxudunuz. Və ən əsası, özünüzə meydan oxudunuz. Və bu çağırışa görə biz sizə minnətdarıq”, – deyə “Nike” Taygerə cavab olaraq yazıb.