Ölkə futbolu
"Astana" və "Qafqazın Cırtdanı"nın fərqi
Qazaxıstan "Astana"sı astanada dayanmadı. Çempionl…
Qazaxıstan "Astana"sı astanada dayanmadı. Çempionlar Liqasının pley-off mərhələsinə vəsiqə əldə edən əslində Asiya, reallıqda isə Avropanın yeni təmsilçisi, bu fürsətdən dərhal yararlandı. Yararlanan kimi də illik büdcəsinin 50 faizini UEFA qaytarıb verdi özlərinə… ÇL-in qrup mərhələsinə düşən tək Qazaxıstan klubu olduğuna görə 14 milyon avro! Allah bərəkət versin, xeyir işlərə xərcləsinlər.
Bəs "o əjdahadan bizdə niyə yoxdu"? Məgər "Qafqazın "Çelsi"sinin sahibi Mübariz Mənsimov "Xəzər Lənkəran"a heç vaxt 30 milyonluq büdcə ayırmayıb? Bu məlumatı "7 qıfıl arxasında” saxlayan klubun idarəçiliyinə bilavasitə cavabdeh olan Mais Mənsimovla Tuyqun Nadirov indiyədək yeganə sponsorununun nə qədər vəsait ayırdığını heç vaxt açıqlamayıb.
Ancaq tək futbolçularla bağlanan müqavilələrdə yol verdikləri fırıldaqçılığa görə dəfələrlə cərimələnən komandanın idarəediciləri kassaya ildə nə qədər vəsait daxil olduğunu əla bilirlər. Həmin vəsait ünvanına xərclənsəydi, "Xəzər Lənkəran" çoxdan Çempionlar Liqasının qrup mərhələsinin daimi sakininə çevrilmişdi.
Futbolçularla bağlı fırıldaqları əbəs yerə qabartmadıq. Ancaq üzə çıxan xəbərləri topladıqda insanı vahimə basır. Bəs üzdə olmayan, mətbuata sızmayan müqavilələr? Üçüncü sort futbolçuları "ekstra" adıyla kluba sırıyan idarəçiləri ÇL qrupu maraqlandırmır. Büdcəsinə görə "Qafqazın "Çelsi"si olmaqla iş bitsəydi, lənkəranlı futbosevərlər "Neftçi"nin, "Qarabağ"ın, “Qəbələ”nin Avropa Liqasına düşməsini gülümsəməklə qarşılayardı. Ancaq bu çılğın fanat dəstəsinin layiq olduğu uğurun qarşısını kəsən tandem klub haqda ədalətli olaraq, "Avropanın qapazaltısı" imici formalaşdırıb.
Ambisiyalarına görə cəmi bir dəfə çempionluq qazanmaq heç daxili arenada da hansısa əlahiddə nəticə sayılmır. Amma avrokuboklarda göstərilən nəticələr, klub adına bir yana, Azərbaycan üçün rüsvayçılıqdı!
2005-ci ildən qitəmiqyaslı yarışlara qatılmağa başlayan "Xəzər Lənkəran" tarixində ilk avrokubok qələbəsini 2012-ci ildə (!!!) əldə edib. Elə həmin mövsümdə də ilk dəfə mərhələ adlayıb. Əcəba, "Qafqazın "Çelsi"si nəyə görə tarixində heç vaxt heç olmasa, 2 mərhələ keçə bilməyib? Axı, hətta sınıq-salxaq "İnter" belə buna nail olmağı bacarıb. Cəmi 2-ci dəfə avrokuboklara qatılan "Qəbələ" isə "Xəzər Lənkəran"ı artıq toza basıb. Nəyin hesabına? Ancaq və ancaq idarəçiliyin düzgün qurulmasının və büdcənin həqiqətən kluba xərclənməsinin.
Qoy "Qəbələ" və digər klubların azarkeşləri inciməsin, bu gün Lənkəran fanatları ilə ayaqlaşa biləcək yalnız Gəncə təmsilçisidi. Bəs nəyə görə ən sadiq fanatlara bu qədər rəzalət yaşadılmalıdı? İsrail "Makkabi"sindən Lənkəranda alınan 8 cavabsız "şapalağ"a nə ad verək? İndiyədək avrokubok səviyəsində cəmi bircə dəfə Lənkəranda qələbə qazanan klubun (o da "cırtdan" Malta "Slima"sı üzərində 1:0) idarəediciləri nə qədər Mübariz Mənsimovu talan etməlidilər ki, baş sponsor bunu görsün? Moldovanın kənd komandası, Ataki "Nistru"sunu keçə bilmirsənsə, bu gün nəyə ümid edə bilərsən?
Bu cür idarəedicilər nə qədər ki, "Xəzər Lənkəran"ın başındadı, onlar avrokuboklara vəsiqə əldə etməsələr, yaxşıdı. Çünki "Qarabağ", "Qəbələ", "İnter", "Neftçi", "Bakı"nın çoxdan bacardıqlarına 11 ildi pulu havaya sovuran "Xəzər Lənkəran" heç yaxın belə düşə bilmir. Baş məşqçiləri "əlcək kimi" dəyişən, gəlib-gedən legionerlərin sayına görə ölkədə rekord vuran klubda ortada itirilən pulları bir yerə toplasaq, yəqin ki, cari mövsümdə Topaz Premyer Liqasında çıxış edən komandaların büdcələrinin cəmindən çox olar.
Bax, buna görə "Xəzər Lənkəran"dan sonra yaranan, heç 10 ilin komandası olmayan "Astana" bu gün Çempionlar Liqasının qrup mərhələsindəki rəqiblərini tanıyır, Tuyqun Nadirov isə sədri təyin olunduğu Klublar Komitəsinin növbəti iclasındakı dahiyanə qərarlardan dəm vurur. Bax, buna görə avrokuboklarda "Xəzər Lənkəran"la qarşılaşacağını bilən istənilən komanda bunu toy-bayram kimi qəbul edir. Siz Allah, "Çelsi"nin adını biabır etməyin. Nə olsun ki, London təmsilçisinin də yüksəlişi 2004-dən, Joze Mourinyonun gəlişindən sonra başlayıb. "Xəzər Lənkəran" ancaq 2004 təvəllüdü ilə "Çelsi"ylə müqayisə oluna bilər. Nə qədər ki, Mübariz Mənsimov "Xəzər Lənkəran"ın idarəediciliyində bu tandemə güvənəcək, komanda avrokuboklarda "Qafqazın Cırtdan"ı adını daşıyacaq.
CEYHUN ƏLİYEV