Milli komanda
Problemlər fonunda Maltada zəfər ümidi
Milli komandamızın Xorvatiya ilə oyunu bir sıra gerçəklər…
Milli komandamızın Xorvatiya ilə oyunu bir sıra gerçəkləri göz önünə sərdi. Çatışmazlıqlar, problemlər, eyni zamanda sevindirici məqamlar, ümid verən epizodlar yetərincə idi.
Qırmızı damalar!
Tamaşaçı tutumu elə də çox olmayan “Bakcell Arena”nın tam dolmaması onu göstərir ki, təbliğat düzgün aparılmayıb. Hətta iki oyunluq məğlubiyyətsiz seriyamızdan sonra da tribunaların diş ağartması yaxşı hal deyildi. Xorvatiya ilə oyunumuzda azarkeşdən daha çox tamaşaçı vardı. Fan-klubları çıxmaq şərti ilə yerdə qalan digərləri ancaq yan keçən zərbəyə təəssüflənməklə məşğul idilər.
Həmin zərbələrin sayı çox olmasa da, milli komandamız bəlkə də tarixinin ən cəsarətli görüşlərindən birini keçirdi. Baş məşqçi Robert Prosineçki ideal olmasa da, ideala yaxın heyət seçməyi bacarmışdı. Döyüşkən futbolçulardan ibarət heyət formalaşdıran məşhur xorvat futbolçularından tam istifadə etməyi bacarır. Misal üçün, Əfran İsmayılov Rəşad Abdullayev və Zaur Tağızadədən sonra Azərbaycanın ən şıltaq yarımmüdafiəçisidir. Geri qayıdıb, top götürməklə heç arası olmayan İsmayılovu bu dəfə tez-tez müdafiəyə baş vuran görürdük. Əfranla bağlı danışarkən onu da deyim ki, futbolçu dünən bir daha sübut etdi ki, formada olduğu vaxt çox təhlükəlidir. Əfran xorvatları təzyiqdə saxlamağı bacardı. Qonaqlarımız artıq düşünməyə başladılar ki, hər zaman çağırılmamış qonağımız ola bilər.
Rəşad özünə bənzəmədi, sonra manqasını düzəltdi
Start heyətində yer alan Rəşad Sadıqovu və sonradan meydançaya daxil olan adaşını nəzərə almasaq, futbolçularla artıq dost olmağı bacaran Robert Prosineçki kifayət qədər gənc heyətə şans vermişdi. Sözsüz, oyunun gedişində hiss olunurdu ki, Məhəmməd Qurbanov, Məhəmməd Mirzəbəyov, Arif Daşdəmirov kimi futbolçular hələ ki, bu tip sınaqlara hazır deyillər. Digər tərəfdən belə bir reallıq var ki, oyunçu keşməkeşdən keçib bişməlidir. Ən vacib sual isə odur ki, bu tip futbolçulara həmin şansı yaratmaq olarmı? Bax bu zaman çox sayda fikirlər ortaya çıxır.
Hər halda, səhvsiz oyunçu olmur. Elə ən təcrübəlimiz kapitan Rəşad Sadıqovun oyunun ilk 10 dəqiqəsində özünə bənzəməməsi, əvəzetmə zamanı meydançaya daxil olan Rəşad Sadiqovun isə ilk 5 ötürməni ünvanına çatdırmaması onu göstərir ki, səhvlər mütləqdir. Amma futbolçularımız məşqçinin güvəni sayəsində bu çaşqınlığı aradan qaldıra bildirdilər. Xüsusən də, Rəşad həm öz səhvlərini düzəltdi, həm də məsləhətləri ilə manqasının üzvü Arif Daşdəmirovu oyuna kökləyə bildi.
Ehtiyatlı, amma qorxaq olmayan futbol
Azərbaycan futbolunda, eləcə də onun əsas güzgüsü olan milli komandamızda o qədər çatışmazlıq var ki, bunu saymaqla bitirmək olmaz. Amma Xorvatiya kimi güclü komandaya qarşı oyunda qazanılan 1 xal müsbət məqamlar ortaya çıxarır. Xüsusən də, məşqçi amilini ön plana çıxarmalıyıq. Gəldiyi gündən adlara yox, futbolçuya güvənən Robert Prosineçkinin rəhbərliyi altında keçirilən 3 oyunun hər birində milli komandamızın xal qazanmasını vurğulamalıyıq. Prosineçki bəlkə də Azərbaycan futbolçusuna “Real”da çıxış edən həmyerlisi Modriç qədər güvənir. Futbolçu oyunu öz bacarığına, qoyulan mükakata görə oynayırdısa bu gün baş məşqçiyə görə də mübarizə aparır. Prosineçki millimizdə bəlkə də uzun müddətdir ki, olmayan kollektiv ruhunu yarada bilib, əhsən!
Millimiz dünən həm ehtiyatlı oynadı, həm də qorxmadan mübarizə apardı. Meydançada əsl mübarizə vardı. Arxada oturan futbolçuya tez bir zamanda irəli atılmağı tapşıran baş məşqçi bəzi hallarda Bədavi Hüseynovun meydançanın rəqibə aid hissəsinə keçməsini tələb edirdi. Bədavi bəzi hallarda baş məşqçiyə baxıb duruxdu, suallı gözlərini zillədi və məşqçinin reaksiyasını görüncə irəli getdi! Bəli, yolu budur, qalib gəlmək üçün irəli getməlisən!
Hücumçusuz, 10 nömrəsiz millimiz!
Deyə bilərsiniz ki, müasir futbolda oyun qurucusu anlayışı artıq yoxdur. Müəyyən mənada razıyam. Amma futbolu ilk növbədə ağılla oynamaq lazımdır. Bu mənada bizim yarımmüdafiəçilərin üzərinə böyük yük düşür. Amma çox təəssüf ki, hazırda millimizdə çalışan Mahmud Qurbanovdan və “Sumqayıt”da çalışan Ceyhun Sultanovdan sonra bir ötürmə ilə hücumçunu qapıçı ilə görüşdürənimiz yoxdur?
Hücumçumuz varmı? Qəti yoxdur! Rauf Əliyevin formasından uzaq olmasından sonra biz demək olar ki, hücumçusuz oynayırıq. Meydançaya çıxan hücumçuların isə adları var, özləri yox… Bütün bu çatışmazlıqlara baxmayaraq, xorvatların damaları millimizin qırmızı rəngli formasına bürünmüşdü. Rəqibi yaxşı analiz etməyimizin və kompakt oynamağımızın sayəsində 1 xal qazana bildik!
Nəyə ümid edək!
Ardıcıl qazanılan normal nəticələr, hazırkı uğurlu heyətdə zədəlilərin olmaması Malta səfərindən 3 xalla qayıdacağımıza zəmin formalaşdırır. Qələbə bizim haqqımızdır!
TİMUÇİN
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar