Milli komanda
Yenə "cırtdan" sevindirdik
Azərbaycan yığması Avropa Çempionatının seçmə qru…
Azərbaycan yığması Avropa Çempionatının seçmə qrup mərhələsində növbəti oyununu arxada qoydu. Tsiklın başa çatmasına 2 tur qalmış AFFA-nın neçə illərdi səsləndirdiyi “məqsədimiz AÇ-2016-nın final mərhələsinə yüksəlməkdi” şüar rəsmən puç oldu. Özü də bu, hansısa bir Avropa qrandı ilə yox, "cırtdan ölkə", dünənki matçadək cari seçmə oyunlarda cəmi 1 qola imza atmış Maltaya qarşı görüşdə rəsmiləşdi.
Xorvatiya ilə oyundan sonra dönə-dönə vurğuladığımız məqamdan Robert Prosineçki bu dəfə faydalanmışdı. Söhbət hazırda ölkəmizdə ən yaxşı sol cinah yarımmüdafiəçisi Cavid Tağıyevin meydana çıxmasından gedir. “Qarabağ”ın vingerinin start heyətində meydana çıxması Prosineçkinin həmvətənlərinə qarşı oyunda rüsvayçı çıxışla yadda qalan Məhəmməd Qurbanovun isə ehtiyatda oturması Maltayla görüşün əvvəlinin ən yaddaqalan məqamı idi…
Xorvatlara qarşı matçdan daha bir qeydi xatırlatmağa zərurət var: Rahid Əmirquliyevi oyunun ən yaxşısı kimi təqdim etmişdik. “Xəzər Lənkəran”ın kapitanı adalılarla matçda da özündən söz etdirməyi bacardı. Əmirquliyevin etdiyi dubl, faktiki olaraq, yığmamızı məğlubiyyətdən xilas etdi. Millimizin heyətində ən seçilən futbolçulardan biri olan mərkəz yarımmüdafiəçisi qol epizodlarından yararlanmağı bacarmayan komanda yoldaşları üçün nümunə oldu. Ancaq Rahidin dublu da Malta üzərində qələbə üçün kifayət etmədi.
Cavid Tağıyev gözlənilən oyunu ortaya qoymaqla, Prosineçkinin Xorvatiyaya qarşı matçda ona şans verməməsinin yanlış olduğunu isbatlamağı bacardı. “Qarabağ”ın yarımmüdafiəçisinin oyun ərzində bir dəfə də olsun top itkisinə yol verməməsi, dəfələrlə opponentlərindən sıyrılaraq, kəsərli hücumlar qurması göz oxşayırdı. Əks cinahda qərarlaşan Əfran İsmayılov da dünənki matçda daha diri görünürdü. Ancaq Əfranın fiziki durumunun hələ də idealdan xeyli uzaq olması dəfələrlə özünü büruzə verirdi. Sürət çatışmırdı. Texniki cəhətdən İsmayılov xoş təsir bağışlasa da, ayaqları düşünmə sürətinin dalınca hələ ki, çatmır.
Ruslan Qurbanov bu dəfə daha xoş təsir bağışladı. Bu, o demək deyil ki, dağıstanlı futbolçu 3 günə inkişaf etdi. Sadəcə, rəqibin keyfiyyətsiz olması onun “parlama”sını şərtləndirirdi.
Dmitri Nazarovun tənbəllik edərək, mərkəzdə topa tərəf 2 addım atmaması isə milliyə 2 xal bahasına başa gəldi. Elə ilk əvəzlənənin dəDmitrinin olması Prosineçkinin “Qazaxıstan motorlu” yarımmüdafiəçimizdən narazı qalmasınının göstəricisidi. Nazarovdan sonra növbə Əfrana da çatdı. Bu da təbii və başadüşüləndi. Yuxarıda qeyd etdiyimiz fiziki durumunun ideal olmaması Ağdam klubunun yarımmüdafiəçisinin əvəzlənməli olduğunu aksioma çevirmişdi. Əfranın yerinə döyüşə atılan Araz Abdullayev oyunda canlandırma yarada bildi. Amma “Neftçi”nin kapitanının ixtiyarına vur-tut 18 dəqiqə verilmişdi ki, bu da tam potensialını ortaya qoymaq üçün çox az vaxt idi.
Qapımıza vurulan ikinci qola gəlincə, burda Bədavi Hüseynovu günahlandırmaq qətiyyən doğru deyil. Top Effionqla onun arasında var-gəl etdiyi epizodda sadəcə, bəxt meydan sahiblərinin qaradərili hücumçusunun üzünə güldü. Yəni, Hüseynov nə mövqe səhvi etdi, nə də texniki qüsura yol verdi.
Prosineçkinin matçsonrası mətbuat konfransında işlətdiyi “milli ən yaxşı oyununu keçirdi” fikri ilə razılaşmamaq olmur. Ansambl şəklində yığmamız formalaşmış kollektivi xatırladırdı. Oyunun böyük hissəsini diqtə edən tərəf də qonaqlar idi. Ancaq unutmayaq ki, rəqib tsikldə keçirdiyi ilk 7 oyunda cəmi 1 qol vurmuş Malta idi. Və əgər bundan iki dəfə artıq qolu qapımızda görürüksə, bu, faciədi! Əlbəttə, bu gün bizə xaldan çox oyun lazımdı. Çünki “xəyal-plov bişirənlər”dən fərqli olaraq, millimizin qrup 3-cüsü olmaq şansının yoxluğu barədə çox yazmışdıq. Maltanı udsaydıq belə, dünənki oyunlardan sonra bu şans rəsmən yox olacaqdı. Əsas oyun modelidi ki, xorvatiyalı mütəxəssisin gördüyü iş müsbət dəyərləndirilməlidi. Çatışmazlıqlar var. Ancaq Prosineçki israrlıdı və əlindəki materialdan maksimum yararlanmağa çalışır. Təki kənardan Məhəmməd Qurbanovların oynamasına məcbur edilməsin.
CEYHUN ƏLİYEV