Premyer-liqa
İkiheyətli favoritlər
Azərbaycanda Avropada olduğu kimi, mövsüm tədricən s&uum…
Azərbaycanda Avropada olduğu kimi, mövsüm tədricən sürət yığmaqdadı. Bir tərəfdən ölkə çempionatı, digər yandan millinin seçmə qrup mərhələsindəki oyunları. Bunlar azmış kimi, üstəlik avrokuboklardakı iştirakı davam etdirənlərimiz də var. Söhbət “Qarabağ” və “Qəbələ”dən ("QQ") gedir. Hazırda 2, Azərbaycan Kuboku start götürdükdən sonra, 3 cəbhədə vuruşmalı olacaq bu cütlük girdikləri yükün altından çıxmağa qadirdilərmi? Ümumiyyətlə, nəyə görə məhz "QQ"lər Avropa Liqasının qrup mərhələsinə vəsiqə qazana bildilər? Bunun üçün Premyer Liqa iştirakçılarının çempionat üçün təqdim etdikləri sifariş ərizələrinə baxmağa zərurət var.
Qış fasiləsinədək “Qarabağ” minimum 28, “Qəbələ” isə 27 futbolçunun xidmətindən yararlana bilər. Bu cütlüyə say baxımından “əlcək atmağı” yalnız “Zirə” bacarıb. “Qartallar”ın sifariş ərizəsində 27 futbolçu yer alıb. Ancaq burda keyfiyyət və kəmiyyət uzlaşmır. Yəni, Topaz Premyer Liqasının debütantının futbolçularını nə “Qəbələ”, nə də “Qarabağ”la müqayisə etmək mümkün deyil.
24 futbolçunu sifariş edən “Neftçi” də sözügedən duetlə ayaqlaşmaq iqtidarında deyil.”Ağ-qaralar” əsasən gənc yerli futbolçuların ümidinə qalıb ki, bu da cari mövsüm üçün hansısa ambisiyalardan danışmaq üçün yetərli deyil. Elə Avropa Liqasının 1-ci turundaca Çernoqoriya “Mladost”undan alınan acı məğlubiyyət dediklərimizin əyani sübutudu.
Ən acınacaqlı vəziyyət isə “Xəzər Lənkəran”dadı. Cənubluların sifariş ərizəsində vur-tut 14 futbolçunun adı qeyd olunub. Əlbəttə, bura əvəzedici heyətdən də oyunçu əlavə etmək mümkündü. Amma futbolçu əsas komandada oynamağa layiq olsaydı, əvəzedicidə nə gəzirdi? Başqa sözlə, “Xəzər Lənkəran”ın işi qalıb Allaha. Mais Mənsimov və Tuyqun Nadirovun səriştəsizliyi səbəbindən Lənkəran təmsilçisi qışadək bu eybəcər durumdan çıxa bilməyəcək.
“Qarabağ”ın baş məşqçisi Qurban Qurbanov və “Qəbələ”dən olan həmkarı Roman Qriqorçukun transferlərdən doymamasının səbəbi elə 3 cəbhədə mübarizə aparmalarıdı. Məsələn, Ruslan Abışov, Vüqar Nadirov və Vaqif Cavdovun son anda baş tutan transferləri Azərbaycandakı turnirlərə hesablanıb. Yerli kadrları cəlb etməklə, Qriqorçuk legioner limiti probleminə də əncam çəkmiş oldu. Cavadovun son zamanlaradək, digər iki oyunçunun isə millimizin Xorvatiya və Maltaya qarşı oyunlara belə cəlb edildiyini nəzərə alsaq, ölkə daxili üçün hər üç transferin kifayət qədər sanballı olduğunu iddia edə bilərik.
Elə avrokuboklarda da hər iki komandanın çıxışı göstərdi ki, ehtiyat qüvvənin varlığında, itkiləri unutdurmaq olur. Məsələn, Namiq Ələsgərov, Çumbinyo, Maksim Medvedevin yoxluğunda “Qarabağ” axsamadı. Eyni zamanda son iki mövsümün qalibi ölkə çempionatında da inamla irəliləyir. Ağdam təmsilçisi ancaq Avropa Liqasının qrupunda yer alan “Qəbələ”yə qarşı matçda xalları yarı bölüb.
Topaz Premyer Liqasında toplanılan xallar bir yana, məhz ehtiyat qüvvənin kifayət qədər olması, indidən məhz "QQ"lərin çempionluğa əsas namizəd olacaqlarını proqnozlaşdırmağa əsas verir. Hələ nəzərə alaq ki, yaza doğru – təki yanılaq – bu cütlüyün avrokubokdakı macəraları da böyük ehtimalla sona çatacaq. Belədə, hər iki klub bütün diqqətlərini çempionat və ölkə kubokuna yönəldəcək.
Bütün klublarımızı bu yöndə peşəkar davranmağa çağırırıq. Çünki belədə, rəqabət artacaq və çempionatın səviyyəsi yüksək olduqdan sonra, təbii ki, qitəmiqyaslı yarışlardakı nəticələr də daha ürəkaçan olacaq.
CEYHUN ƏLİYEV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Müsahibə2024-04-29 10:14
“Qalatasaray” rəsmisi: “Azərbaycana layiqli idmançılar yetişdirmək istəyirik”
- Ölkə futbolu2024-04-29 12:33
“Qarabağ” “Turan”a çata bilmədi