Ölkə futbolu
Baş katibdən “İdman Azərbaycan”a cavab: “Bu qadağa tam qanunidi”
Dünən Azərbaycan Futbol Federasiyası Topaz Premyer Liqasının…
Dünən Azərbaycan Futbol Federasiyası Topaz Premyer Liqasının oyunlarında yayım hüququna malik “CBC Sport”dan başqa digər televiziya kanallarının çəkilişinə qadağa qoymuşdu. Bu qadağa “İdman Azərbaycan” kanalında “Premyer Liqa” verilişinin yayımının dayandırılmasına səbəb olub.
“İdman Azərbaycan” verilişin bağlanması ilə bağlı yaydığı açıqlamada AFFA və qurumun baş katibi Elxan Məmmədovu günahlandıraraq, futbolun inkişafına mane olduqlarını bildirib.
Futbolinfo.az xəbər verir ki, baş katib “Qafqazinfo”ya açıqlamasında qeyd edib ki, bu qadağa müqavilə şərtlərinə uyğun olaraq tam qanunidi:
“Bu ilin iyul ayında Azərbaycan Futbol Federasiyaları Assosiasiyası və Peşəkar Futbol Liqası Premyer Liqa oyunlarının televiziya vasitəsilə yayımı ilə əlaqədar tender elan edib. Tenderin şərtlərinə müvafiq ən real təklifi CBC kanalı irəli sürərək oyunların ilkin dövrdə CBC televiziya kanalında yayımlanacağını, "CBC Sport" kanalı üçün lisenziya alındıqdan sonra isə qarşılaşmaların bu kanal vasitəsilə yayımlanacağını bildirmişdi və tenderin qalibi olmuşdu.
Premyer Liqa oyunlarının yayım hüququna malik olan "CBC Sport"un başqa televiziyalar və ya saytlar vasitəsilə oyunların çəkilişinə, habelə oyunlardan hazırlanmış videoreportajların yayımlanmasına qadağa qoyması müqavilə şərtlərinə uyğun olaraq tam qanunidir və bu praktika dünyanın əksər ölkələrində tətbiq olunmaqdadı.
Məsələn, Azərbaycan milli komandasının Avro-2016-nın seçmə mərhələsindəki bütün oyunlarının yayım hüququ İctimai televiziyaya məxsusdur və millinin oyunlarında digər televiziya kanalları çəkiliş aparmır”.