Ölkə futbolu
17 min və ya 3 məşqçinin "həmrəylik marşı"
Bu gün AFFA İntizam Komitəsinin (İK) növbəti iclası ke&…
Bu gün AFFA İntizam Komitəsinin (İK) növbəti iclası keçirilib. Futbolinfo.az xəbər verir ki, ümumilikdə 17640 manat pul cəzası ilə yanaşı, birdən-birə 3 klub məşqçisindən məhrum olub.
Cəzalanan klublar arasında ən çox ziyan “Sumqayıt”a dəyib. Komandanın məşqçisi Mübariz Orucovun hakimləri təhqir etməsi “Gənclik şəhəri” təmsilçisinə 5000 manata başa gəlib. Bundan əlavə, “sarılar” da Kamran Quliyevin komandasını 1200 manat geriyə salıb.
“Kəpəz”ə də ağır zərbə dəyib. Komandanın məşqçisi Xaliq Mərdanovun hakimləri təhqir etdiyinə görə 5000 manatlıq cəriməylə yanaşı, Gəncə təmsilçisi 1000 manat da “İnter”lə oyundakı 4 sarı vərəqəyə görə “tərləməli” olacaq. Bu məbləğ isə klubun aylıq büdcəsinin təqribən 10 faizi deməkdi.
Doğrudu, “Qarabağ”ın məşqçilərindən “fərqlənən” olmayıb. Ancaq ölkə çempionu da yamanca ziyana düşüb. “Azərsun Arena”nın açılışı Ağdam təmsilçisinə 3000 manata başa gəlib. Azarkeşlər tərəfindən stadiona atılan yad əşyalar, habelə pirotexnik vasitədən istifadə etmələri “Qarabağ”ı bu dəfə cərimələnənlər sırasında 3-cü pilləyə “yüksəldib”.
“Bakılı”nın bəxti onda gətirib ki, komanda 1-ci divizionda mübarizə aparır. Əks halda Misir Əbilov da 5000 manat ziyan edəcəkdi. Komandanın məşqçisi Əli Hüseynovun hakimləri təhqir etməsi 500 manata başa gəlib. Xaliq Mərdanov, Mübariz Orucov, Əli Hüseynov triosunu birləşdirən məqam isə hər birinin 5 oyunluq diskvalifikasiyaya məruz qalmasıdı.
Ümumilikdə, İK-nın pul cəzasının böyük hissəsi Premyer Liqa təmsilçilərinin payına düşüb. Onlar 17100 manat ödəyəcəkləri halda, 1-ci divizion klublarının cəriməsi vur-tut 540 manat təşkil edib. Cəzalananlar sırasında “Turan Tovuz”un ödəyəcəyi məbləğ də maraqlı görünür. Tovuz klubu icazə verilməyən yerdə yolu keçərkən piyadalara qarşı tətbiq edilən cərimə qədər məbləğ ödəyəcək – 20 AZN.
CEYHUN ƏLİYEV