Ölkə futbolu
Onlar hazırdı və qələbə gözləyirlər
Bu gün Avropa Liqasının qrup mərhələsinin 2-ci turunun oyunl…
Bu gün Avropa Liqasının qrup mərhələsinin 2-ci turunun oyunları çərçivəsində "Qarabağ" evdə "Anderlext"i qəbul edəcək. Bu matçla bağlı Ağdam klubunun azarkeşləri ilə əlaqə saxladıq.
Futbolinfo.az-a danışan fan-klub üzvləri oyuna hazırlıqla bağlı görülən işlərdən danışdı:
Elvin Süleymanov ("Qarabağ Ordusu" fan-klubu): "Bu oyuna hazırlaşmışıq, bannerlərimiz də var. Bundan başqa stadiona 31 min bayrağı da bizim fan-klubun üzvləri düzüb. Həmişəkindən fərqli olaraq, bu dəfə 27-ci sektorda yer alacağıq. Buna da səbəb "Anderlext" azarkeşlərinə daha yaxın olmaq istəyidi. Onları çalışdığımız dərəcədə susdurmağa çalışacağıq. Bu oyunda 700 nəfərlə komandamıza dəstək olacağıq. İnanıram ki, bu gün "Qarabağ" bizi sevindirəcək".
Qabil Hüseynov ("İmarət" fan-klubu): "Bu oyuna hazırlaşmışıq. Lakin matça maraq az olduğundan bəzi planlarımız baş tutmadı. Bizə ayrılan sektorların biletlərini özümüz satırıq. Amma hər azarkeşə də satmırıq. Yalnız oyunboyu dayanmadan komandanı dəstəkləyən azarkeşlərə satırıq. Lakin bu dəfə oyuna maraq az olduğundan hamısını sata bilmədik. Bu qarşılaşmada 400 nəfər azarkeşlə komandamızı dəstəkləyəcəyik. "Qarabağ" qələbə qazansa, oyundan sonra üstüaçıq avtobusla şəhər turuna çıxacağıq. Amma yenə də 90 dəqiqə komandamızı dayanmadan qələbəyə səsləyəcəyik. Bundan başqa oyunda qadınlardan ibarət "İmarət xan qızı" ilə də təmsil olunacağıq. Onlar da 30 nəfər olacaq və 38-ci sektorda yer alacaq".