Premyer-liqa
"Qəbələ"nin enişində Qriqorçuk amili
“Qəbələ”nin çempionluq uğrunda mübarizəd?…
“Qəbələ”nin çempionluq uğrunda mübarizədə axsamaları düşündürməyə bilmir. Komanda mövsümə yaxşı start götürsə də, tədricən sürəti azaltdı. Vəziyyət o həddə çatıb ki, başa çatmaqda olan 2-ci dövrənin gedişatında “Qəbələ” hələ də heç kimi məğlub edə bilməyib. Sonuncu dəfə ilk dövrənin son turunda “Neftçi”ni son dəqiqə qoluyla üstələyən Roman Qriqorçukun yetirmələri bundan sonra 4 dəfə heç-heçə edib, bir dəfə də məğlub olub. Çempionluğa iddialı komanda üçün bu, faciədi!
Bəs, niyə belə oldu? Məgər “Qəbələ”nin Avropa Liqasında sıradan çıxardığı “Dinamo”, “Çukariçki”, “Apollon”, “Panatinaikos” çempionatda itkilərə məruz qaldığı “Zirə”, AZAL, “Kəpəz”, “Sumqayıt”dan zəif rəqiblər idi? Və heç kim inandırmağa çalışmasın ki, Avropa Liqasında legioner limiti yoxdu və yerlilərlə oynayanda komanda nəticə qazana bilmir. Çünki 1-ci dövrənin oyunlarına da elə həmin 6+5 çıxırdı…
Nə baş verdi? Nəyə görə 1-ci dövrədən sonra ilk pilləni bölüşən komanda 3-cü yerə yuvarlanmağı bir yana, liderdən 9 xal geri düşdü?
Səbəbləri araşdırarkən maraqlı mənzərəylə rastlaşırıq. Məlum olur ki, əslində, bu eniş gözlənilən idi və burada obyektiv səbəblərlə yanaşı, subyektiv, özü də xoşagəlməz təəssüratlar meydana çıxır. Başlayaq obyektiv səbəblərdən.
PFL-in saytında Topaz Premyer Liqasındakı iştirak ərizəsinə 25 futbolçunun adı daxil edilib. Bunlardan 11 nəfəri Azərbaycan pasportuna sahib insanlardı. Başqa sözlə, “11-liy”yə milliləşən Popoviç, Daşdəmirov, Mirzəbəyov da daxildi. Yerli statusuna sahib futbolçulardan Cavid Hüseynov məlum səbəblərə görə komandasına kömək edə bilmir. Bəs, digər yerlilər necə, avrokuboklar bir yana, ölkə çempionatında Qirqorçukun güvəndiyi isim olmağı bacarıblarmı?
Andrey Popoviç, Məhəmməd Mirzəbəyov, Asif Məmmədov, Vaqif Cavadov, Vüqar Nadirov haqda bu sözləri demək mümkün deyil. Xüsusilə son anda transfer edilən Cavadovla Nadirovun daha çox ehtiyatda qalması qabardılası məqamdı. Füzuli Cavadovun oğlunun “İnter”dən ayrıldıqdan sonra karyerasında düşüş yaşadığı hər kəsə bəlli idi. Amma “Qəbələ” heç bir iddialı klubun istəmədiyi Vaqifi rənglərinə qatdı. Qatdı və yalnız bundan sonra gözləri açıldı ki, “ay aman, bu oyunçu bizə yaraşmır”. Nadirov isə “Qarabağ”da rəqabətə davam gətirmədiyi üçün komandadan ayrılan bir futbolçu idi. Çempionluğa oynayan Ağdam təmsilçisinə yaramayan oyunçu “qızıl”a iddia edən klubun tələblərinə uyğun gələrdimi?
Gözlənilən də baş verdi. Bu iki transfer faktiki olaraq, havaya sovrulmuş vəsait oldu. Futbolçudan yararlanmırsansa, onu da məhv edirsən, klubun pulunu da.
Yerli futbolçulardan danışarkən, daha bir məqama toxunmaq istəyərdik. Söhbət Ruslan Abışovdan gedir. Ötən mövsümün sonunda xidmətindən imtina etdiyi müdafiəçini yenidən sıralarına qaytarmaq istəyən klub fakitiki olaraq, səhvini etiraf etdi. Abışovun cari mövsümdə sərgilədiyi futbol isə yazdıqlarımızı bir daha sübut edir.
Tiflis “Dinamo”su ilə Avropa Liqasının 1-ci təsnifat mərhələsinin cavab qarşılaşmasında onun vurduğu qol olmasaydı, “Qəbələ” nəinki qrupdan, heç 2-ci mərhələdən belə danışa bilməzdi. Məhz Asif Məmmədovun dəqiq baş zərbəsi gürcüləri sözün həqiqi mənasında məhv etdi. Ancaq nədənsə yarımmüdafiəçi nəinki avrokuboklarda, heç ölkə çempionatında da ukraynalı mütəxəssisin güvəndiyi isimlər sırasına daxil olmur. Və yenə də ortaya eyni sual çıxır: lazım deyildisə, pul xərcləməyə nə ehtiyac?
Göründüyü kimi, pasport mənsubiyyətinə görə yerli sayılacaq 11 oyunçudan yalnız 5-i Roman Qriqorçukun etimad göstərdiyi isimlərdi. İndi də keçək “Qəbələ”nin legionerlərinə.
Burda “liderlik palması” heç şübhəsiz ki, George Floreskudadı. Avroliqada əla start götürən dayaq yarımmüdafiəçisi ən xoş sözlərə layiq futbol sərgiləsə də, əvvəlcə zədə, ardınca isə qeyri-müəyyənlik rumıniyalı oyunçunun “qara siyahı”ya düşməsini şərtləndirdi. Qriqorçukla aralarından hansı “qara pişiy”in keçdiyini deyə bilmərik, amma 31 yaşlı futbolçunun qışda yola salınacağına zərrə qədər də şübhə yoxdu. Amma subyektiv təəssüratı da bölüşməliyik. Baş məşqçinin dayaq yarımmüdafiəçisi mövqeyində “əsas silahı” Aleksey Qaydı. Birdən-birə 2 əcnəbinin eyni yerdə oynaması qeyri-məqbul sayılır. Seçimdə ukraynalı çalışdırıcının həmyerlisinə üstünlük verməsi xoşagəlməz düşüncələrə cığır açır. Söhbət alınacaq mükafatların ukraynalıya nəsib olmasını təmin etməkdən gedir.
Qapı xəttində 2 əcnəbinin olması da anlaşılan deyil. Dmitri Bezotosnının yoxluğunda “çərçivə” David Pyetrzkeviçə nadir hallarda etibar edilirsə, bu da bir şeydən xəbər verir: ona xərclənən pul da havaya sovrulub.
Aleksey Antonov haqda o qədər yazılıb, o qədər deyilib ki, yenidən bu mövzunu çox uzatmağa ehtiyac görmürük. Sadəcə, onunla kifayətlənək ki, hücumçu kimi gətirilən və faydalı iş əmsalı “0” olan ukraynalını Qriqorçuk “10 nömrə” mövqeyinə çəkdi. Bu qədər transferlərin qarşısında komandada “vuran ayağ”ın olmaması isə heç bir çərçivəyə sığmır. Çünki nə Ermin Zets əlahiddə nəyləsə yadda qalmayıb, nə də Sergey Zenyov hücumçu deyil ki, konkret nələrsə tələb edəsən. Elə Pakundo Fereyra da əslində yarımmüdafiəçidi.
Qış fasiləsi zamanı Antonovun da Floreskuya yoldaş olaraq, yola salınmasını eşitsəniz, təəccüblənməyin. Amma gedənlərin yerinə yenilər gətirilməlidi. “Qəbələ” rəhbərliyi çətin ki, Avropa Liqasının qrup mərhələsinə çıxan məşqçinin tələblərini yerinə yetirməsin. Amma mütləq bu sualları qaldırmalıdı. Heyətində 14 legioner olan komandanın qışda yenidən qapı-qapı düşməsi məşqçinin hansısa başqa maraqlarından xəbər verməyə bilməz. Rəhbərlik buna göz yumacaqsa, deməli, ya ukraynalı mütəxəssislə əlbirdi, ya da onun pulları havaya sovurmasına qarşı iş görmür.
Bütün yuxarıdakıları sadalamaqda məqsədimiz “Qəbələ”nin uğursuzluq zolağına düşməsinə aydınlıq gətirməkdi. Elə həmin Qay tükənib, yorulubsa, niyə Floreskuya şans verilməsin? Eyni heyəti 2 cəbhədə oynatmağın fəsadı əvvəl-axır özünü büruzə verməli idi, verdi də!
Daha bir məqam düşünməyə vadar edir. Paralel aparmaq üçün “Qarabağ”a boylanmağı tövsiyə edərdik. Ağdam təmsilçisinin onurğa sütunu sayılacaq 6-7 futbolçusu var ki, bu gün çempionu onlarsız təsəvvür etmək mümkün deyil. Özü də söhbət ilk növbədə yerli futbolçulardan gedir. Əlbəttə, yaş öz işini görür və zaman-zaman “Qarabağ”da nəsildəyişmə prosesi qaçılmaz olur. Amma baş məşqçi Qurban Qurbanov gələcəyə hesablanmış addımları atmağa da macal tapır. Deyək ki, sabah Qara Qarayevi hansısa əcnəbi klub transfer etmək istədi. Belədə Qurbanovun əlinin altında Coşqun Diniyev var. Ansi Aqollinin yerinə Azər Salahlı yetişir. Cavid Tağıyev, Namiq Ələsgərov kimi gənclər də məhz Qurban Qurbanovun qurduğu strategiyanın bəhrələridi.
Amma “Qəbələ”də bu yöndə real iş yoxdu. Bir Ürfan Abbasovun adını çəkə bilərik ki, belədə də “tək əldən səs çıxmaz” məsəli ön sıranı tutur. Komandanın yerli oyunçulardan ibarət onurğa sütunu yoxdusa, futbolçularla 6 aylıq, 1 illik müqavilə imzalanırsa, gələcək barədə danışmaq absurddu. Deməli, sabah Qirqorçuk getsə, bir il ərzində qurulan komanda dağıdılmalı və yeni, ağ səhifədən başlamaq gərəkdi. Klub rəhbərliyi komandanın gələcəyini düşünürsə, bu cür varianta yol verməməlidi. Aydın məsələdi ki, menecerlərə futbolçuları ilə qısa müddətə imzalanan müqavilə daha çox sərf edir. Amma biz qlobal, klubun inkişafına xidmət edən məsələdən bəhs edirik, şəxsi mənafeyə qulluq edən strategiyadan yox.
“Qəbələ”nin əcnəbi futbolçularla bağladığı müqavilələrə də əl gəzdirməsinə ehtiyac var. Yenə də “Qarabağ” misalı çəkək. Reynaldo, Almeyda, Aqolli, Şehiç, Çumbinyo artıq neçə ildi ki, Ağdam təmsilçisinin formasını geyinirlər. Deməli, komandada artıq oturuşmuş “legioner dəstəsi” də var. Bəs Qəbələ təmsilçisində ən “qədim” əcnəbi kimdi? Dodo! Bəs sonra? Vəssəlam, şüttamam. Cəmi bir yerli və bir əcnəbi “köhnə məhsul” statusuna sahibdilər. Deməli, qalanlar gəldi-gedərdi. Çünki bunu “Qəbələ” rəhbərliyi özü bu cür qurub-yaradıb. Kötüyü olmayan ağac isə ən həfif küləkdən sonra belə qırılır.
Bu da son. Biz son iki mövsümün bürünc mükafatçısının son zamanlar yaşadığı uğursuzluğun kökünü araşdırmağa, bunun aradan qalxması üçün hansı addımların atılmalı olduğunu yazdıq. Qışda nələr baş verəcəyini deyə bilmərik. Amma dediklərimizdən dərs çıxarılmasa, istənilən uğur müvəqqəti xarakter daşıyacaq.
Bu qeydlər PAOK-la oyunöncəsi yazılmaya da bilərdi. Amma unutmayaq ki, bu cür oyunla “Qəbələ”nin qələbəsiz oyunlar seriyası uzanacaq. Dünənə kimi qəhrəman saydığımız Qriqorçuk yenə ən yaxşı məşqçilərdən biridi. Bunu kimsə dana bilməz. Ukraynalı qısa müddətdə çox iş görüb. Bununla belə, “dünənə görə çox sağ ol, bu gün nəyə qadirsən” deməyin vaxtıdı. Heydərovların pullarının hesabına gətirilən legionerlər ordusundan komanda möhkəm təməl olmayınca daimi iddialıya çevrilə bilməz. Sabah Qriqorçukun gedişi komandanın yenidən yığılması zərurətini yaradacaq. “Xəzər Lənkəran” elə bu səbəblərdən böyük komanda ola bilmədi. Bu səbəbdən, uğurlarına rəğmən, hərdən Qriqorçuku da silkələmək, ümumi strategiyaya yenidən nəzər salmaq lazımdı.
CEYHUN ƏLİYEV
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə