Ölkə futbolu
"Qarabağ" "üstüaçıq" gəzəcək
Dünən “Qarabağ”ı dəstəkləyən “İmarət&r…
Dünən “Qarabağ”ı dəstəkləyən “İmarət” fan-klubunun ənənəvi, ilin yekun tədbiri baş tutub. “Qafqaz Sport Otel”də reallaşan yığıncaqda fan-klubun üzvləri, “Qarabağ”ın futbolçuları, məşqçilər heyəti həmçinin klub rəhbərliyi iştirak edib.
Tədbiri giriş sözü ilə aparıcı Vasif Qurbanov açıb. O, fan-klubunun mahiyyətini, sözügedən azarkeş qrupunun yaradılmasında əsas məqsədin nə olduğunu və digər məqamları iştirakçıların nəzərinə çatdırıb. Ardınca Azərbaycanın Milli Qəhrəmanı, həmçinin “Qarabağ”da futbolçu və məşqçi kimi çıxış etmiş mərhum Allahverdi Bağırovun həyatından hazırlanmış videorolik nümayiş etdirilib.
Daha sonra söz “İmarət”in idarə heyətinin üzvlərindən olan Qabil Hüseynə verilib. O, iştirakçılara və media nümayəndələrinə bu il fan-klub olaraq fəaliyyətlərinin, tədbirlərin və s. aksiyaların hesabatını oxuyub. Ardınca “İmarət”in 2015-ci ildəki fəaliyyətinə aid videoçarx da nümayiş etdirilib.
Tanınan jurnalist Rövşən Binnətli Ağdam xatirələrini danışıb, Yunis İldırım isə Ağdam işğal olunduqdan sonra klubu necə yaşatmaqları barədə söhbətlər edib. Ardınca deputat Fazil Mustafa, klubun yaradıcılarından Adil Nadirov da çıxıçları davam etdirib.
Hesabat mərasimində müxtəlif ideyalar da səsləndirlib. Belə ki, qonaqlar arasında olan üstüaçıq avtobuslar kirayə verən “Citysightseeing Baku” firmasının rəhbəri Əfsun Əhmədov “Qarabağ”ın bu il də çempion olacağı təqdirdə təmənnasız olaraq, xaricdə olduğu kimi, bu cür avtobusda kubokla şəhər turu keçirmələrinə kömək edə biləcəyini deyib. Yavər Məmmədov isə sahibi olduğu qalstuk firmasının “Qarabağ”a aid hazırladığı məhsulu nümayiş etdirib. O, İtaliyada satılan bu qalstuklara “Qarabağ” adını həkk etdirdiklərini və hər satılan məhsulun üzərində işğal olunmuş ərazilərimizin tanıtımı ilə bağlı ingiliscə yazını da alıcılara təqdim etdirdiklərini bildirib.
Bundan başqa, klubun loqosunun üzərində “Qarabağ”ın yaranma ili olan 1987-ci ilin Ağdamda futbolun təməlinin qoyulduğu 1951-ci illə dəyişdirilməsi ilə bağlı müzakirələr aparılıb. Sonda prezident Tahir Gözəl bu məsələni müzakirə edəcəklərini söz verib.
Ən maraqlı ideydalardan biri isə “İmarət”in amiqosu Samir Məmmədovdan gəlib. O, Tahir Gözəldən Suraxanıda bu mövsüm istifadəyə verilmiş yeni stadiona Allahverdi Bağırovun adının verilməsini, həmçinin əslən Ağdam rayonundan olan Vüqar Nadirovun komandaya qaytarılmasını xahiş edib. Məmmədov komandanın fan-şopunun fəaliyyət göstərilməli olduğunun da vacibliyini vurğulayıb.
Bundan sonra isə söz komandanın baş məşqçisi Qurban Qurbanova verilib. O, “İmarət” haqqında fikirlərini bölüşdükdən sonra azarkeşlərin Nadirovla bağlı istəyinə də fikir bildirib. Təcrübəli mütəxəssis açıq şəkildə deməsə də, bu ideyaya müsbət baxmadığını hiss etdirib.
Tədbir qonaqlara hədiyyələrin təqdim olunması ilə yekunlaşıb.
ELMAR ABDULLA-ZADƏ
- Ölkə futbolu2024-05-15 09:42
Klublarımızın rəqibləri bəlli olur: yalnız “Neftçi” səpələnmişlərdə olacaq
- Ölkə futbolu2024-05-15 15:38
AFFA 6 kluba lisenziya verdi
- I Liqa2024-05-15 16:12
Məmmədov: “Premyer Liqaya vəsiqə qazanmasaq, bizim üçün faciə sayılacaq”
- Ölkə futbolu2024-05-15 14:39
Premyer Liqanın ən reytinqli futbolçusu: ilk 6 yer “Qarabağ”ın oldu