Ölkə futbolu
AFFA nümayəndəsi: “Premyer Liqa klublarına cəza tətbiq edilməlidi”
AFFA-nın Premyer Liqa klublarına payladığı lisenziyaların qeyri-…
AFFA-nın Premyer Liqa klublarına payladığı lisenziyaların qeyri-qanuni olması ətrafında sular tədricən durulur. Bu mövzuda 2 yazı dərc etmişdik və ardının gələcəyini vəd etmişdik.
Söhbət lisenziyanın B meyarlarından gedir. Bura ilk növbədə medianın normal fəaliyyəti üçün stadionlarda şəraitin yaradılmasından gedir. Bu dəfə bir çox oyunlarda AFFA nümayəndəsi kimi iştirak edən Namiq Məstanovla problem ətrafında müzakirə apardıq.
– Media otağının olmaması, media-tribunada elekrtik şəbəkəsinin olmaması, internetlə təchiz olunmaması nəyə görə AFFA nümayəndələrinin matçın protokolundakı qeydlərində öz əksini tapmır?
– Tək bu deyil, dopinq yoxlanışı otağı, hakimlər otağının internet və faksla təmin olunması da B meyarlı tələblərdi ki, əksər klublarda bunlara da riayət olunmur. Biz A meyarlarına diqqət yetiririk. Bura təcili yardım və yanğınsöndürən maşınların, ot örtüyünün nörmal vəziyyətdə olması kimi tələblər daxildi. Həmin tələblərə riayət olunmadıqda, ixtiyarımız var ki, oyunun başlamasına icazə verməyək.
– Biz demirik ki, start fitinin səslənməsini əngəlləyin. Sadəcə, KİV üçün şəraitsizlikdən danışırıq. Bunu oyunun protokolunda yazmırsınız, nəticədə də bu klublara qarşı heç bir ölçü götürülmür.
– Əvvəla onu deyim ki, bu klublara iştiraketmə hüququ verən lisenziyalar paylanıb. Bu isə o deməkdi ki, onlar bütün meyarlara cavab verirlər. Bəli, əsas “A” meyarları götürülür. Amma “B” meyarlarına cavab verilmirsə, lisenziyalaşdırma qrupu həmin klublara vaxt verməlidi ki, bu problem aradan qaldırılsın. Həmin vaxt keçdikdən sonra isə yoxlama aparıb, vəziyyətin nə yerdə olduğunu öyrənməlidilər. Məsələ həllini tapmayıbsa, müvafiq cəza tətbiq edilməlidi.
– Namiq müəllim, bütün bunları mövzuyla bağlı növbəti yazımızda araşdıracağıq. Hələliksə, nəyə görə matçın protokolunda bu çatışmazlıqlar barədə qeyd aparmamağınızı bilmək istəyirik…
– Bütün qeyd etdikləriniz məqamları ora bir-bir yazmaq üçün yer çatmaz. Çünki həmin qrafa çox kiçikdi. Amma adını çəkdiyiniz stadionlarda olarkən, protokolda “B” meyarlarına cavab vermədikləri barədə qeydlərimi aparmışam. Bundan sonrasına AFFA nümayəndəsi cavabdehlik daşımır.
Mövzunu davam etdimək üçün AFFA-nın Texniki-İdman şöbəsinin rəisi Zamiq Hüseynovla əlaqə saxladıq. Hüseynov iradlarımızın tamamilə haqlı olduğunu etiraf etsə də, bu məsələyə görə birbaşa məsuliyyət daşımadığını diqqətimizə çatdırdı.
– Doğrudu, Gəncə stadionunun qəbul edilməsində mən də iştirak etmişəm. Ancaq gəlin məsələyə başqa cür yanaşaq. Bu şəhərdə cəmi 1 stadion var. Nə etmək olar? Şərait yoxdu, hələlik mövcud durumla razılaşmalı oluruq. Biz də buna görə güzəştə getdik.
– “B” meyarlarına hakimlər otağının internet və faksla təmin olunması, dopinq otağının olması kimi tələblər daxildi. Bunu qoyduq kənara. Çünki medianın normal fəaliyyəti üçün bu tələblərə riayət olunmamasının heç bir maneçiliyi yoxdu. KİV-in yerinə siz necə güzəşt edə bilərsiniz? Bir KİV təmsilçisi kimi bu güzəşti biz edə bilərik. Amma etməyəcəyik!
– Əlbəttə, bu, sizin hüququnuzdu. Amma belədə, hansı tədbiri görə bilərik? Yeni komandalardı, müəyyən güzəştlər etmək lazımdı. Gələn mövsümədək çatışmazlıqları aradan qaldırarlar.
– Razılaşa bilmirəm. Çünki hər il neçə-neçə komanda fəaliyyətini dondurur, onların yerinə başqaları gəlir. Götürək elə “Zirə”ni. Təminat verə bilərsiniz ki, bu klub gələn il də yaşayacaq? Və ən əsası, bütün tələblərə cavab verməyən klubun Premyer Liqada nə işi? Oynasınlar 1-ci divizionda, nə vaxt tələblərə cavab verərlər, onda da oynayarlar…
– Bunu tələb etmək əlbəttə ki, sizin hüququnuzdu. Ancaq bir daha təkrar edirəm ki, bu, birbaşa mənə aid olan məsələ deyil.
CEYHUN ƏLİYEV
- Milli komanda2024-05-03 08:00
Vay(ss) bizim halımıza?
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Ölkə futbolu2024-05-03 14:00
“Neftçi”nin riskli seçimi: lazımsız legionerlə 4 illik müqavilə bağlayırlar