Ölkə futbolu
Qarayev üçün cığır yaydan açılırdı
Qara Qarayevə Türkiyə Superliqasından təklif gəlməsi barəd…
Qara Qarayevə Türkiyə Superliqasından təklif gəlməsi barədə ölkə mətbuatı indi xəbər tutsa da, hadisələrin gedişatı göstərir ki, bu məsələ çoxdan gündəmdə olub. Dayaq yarımmüdafiəçisinin “Mersin İdmanyurdu”nun transfer siyahısında xeyli əvvəldən olması barədə fikir irəli sürmək üçün mövsümün startına baş vurmaq lazımdı.
Eyni ampluada çıxış edən, Qaradan heç də üstün olmayan Coşqun Diniyevi transfer edərkən, Qurban Qurbanov Qarayevin mövqeyində rəqabətdən çox, konkret kimi oynatmaq qayğısını həll edirdi. Aydın məsələdi ki, Riçard Almeydayla nə Qara, nə də Coşqun ayaqlaşmaq iqtidarında deyil. Braziliyalı yarımmüdafiəçinin fərdi bacarığı fitri istedadın təzahürüdü. Amma ikinci dayaq yarımmüdafiəçisi mövqeyi üçün Coşqun lap yerinə düşürdü. “Qarabağ”ın baş məşqçisi onu hətta avrokuboklarda da sınamaqla faktiki olaraq, qış fasiləsindən sonra güvənəcəyini büruzə verdi.
Qışda isə Qurbanov daha bir mərkəz yarımmüdafiəçisi – Rahid Əmirquliyevi də komandasına qatdı. Rahidin Coşqun və Qaradan fərqli olaraq, həm təcrübəsi daha çoxdu, həm də yaradıcılıq bacarığı daha üstündü. 2015-də millimizin liderinə çevrilən futbolçunun adlarını çəkdiyimiz oyunçularla müqayisədə, daha universal olması da baş məşqçinin seçiminə təsirinə göstərib. İndi Qurban bəy daha zəngin seçimə malikdi: komandası hesabda geri düşdükdə və ya qələbəyə oynadıqda, Rahid-Riçard tandemindən istifadə edə bilər. Eyni zamanda, komandasına hesabı qorumaq lazım gələrsə, Coşqun-Riçarda güvənə bilər. Elə Almeydaya istirahət vermək istəyərkən də, təcrübəli mütəxəssisin baş ağrısı olmayacaq. O, Rahiddən yaradıcı, Coşqundan isə dağıdıcı kimi yararlana biləcək.
Göründüyü kimi, Qara Qarayevin Türkiyəyə yollanması üçün əngəl yoxdu. Qurbanov hələ yaydan bunun üçün lazımi tədbirləri görməyə başlayıb, qışda isə son nöqtəni Əmirquliyevlə qoyub. Böyük ehtimalla Qarayevi avrokuboklarda oynatmaq üçün yayda buraxmayan çalışdırıcı, indi istədiyi heyətə sahib çıxıb və artıq yarımmüdafiəçinin qarşısında “yaşıl işıq” yanıb.
O, ayrı məsələ ki, “Mersin İdmanyurdu”nda hazırda maliyyə sıxıntaları yaşanmaqdadı. Amma çətin ki, bu, həyatında ilk dəfə legioner karyerası yaşamaq şansı qazanan Qarayevin qarşısını kəssin. Böyük ehitimalla, yaxın günlərdə 23 yaşlı futbolçu Türkiyə Superliqası təmsilçisi ilə rəsmən anlaşacaq. Çoxsaylı uğursuzluqlara rəğmən, ümid edək ki, bu dəfə azərbaycanlı futbolçunun legioner həyatı uzunmüddətli alınacaq.
CEYHUN ƏLİYEV