Ölkə futbolu
Fyuçers müqaviləsi – xilasedici
Manatın çökməsi ölkə klublarına ciddi zərbə vur…
Manatın çökməsi ölkə klublarına ciddi zərbə vurdu. Elə futbolçular da bundan əziyyət çəkəcək. Əlbəttə, 200-300 manat məvaciblə ailə saxlayanlardan fərqli olaraq, bu devalvasiya onlara eyni aqibəti yaşatmayacaq. Hər halda varlılar pulu daha çox sevir. Bu yazıda əvvəlki səhvləri buraxmamaq üçün hansı təbiri görməyin mümkünlüyündən bəhs edəcəyik.
İqtisadiyyatda “fyuçers müqaviləsi” adlı bir termin mövcuddu. Bunun açması “gələcəyin müqaviləsi” deməkdi. Sadə dilə çevirsək, bunu misalla izah etmək mümkündü. Məsələn, hansısa vətəndaş qışda parnikdə pomidor yetişdirməyi planlaşdırır. Hansısa iş adamına hər hektardan neçə ton pomidor alacağını rəqəmlərlə sübuta yetirir. Daha sonra pomidorun qiymətinə dair ortaq məxrəcə gəlirlər. Bu bitkinin apreldə satış halına gələcəyini də müəyyənləşdirdikdən sonra müqaviləyə imza atılır. Amma qiymət xeyli öncədən, dekabrdan müəyyənləşdirlir. Yəni, 5 ay öncədən tərəflər apreldə pomidorun hansı qiymətlə satılacağına dair müqaviləyə imza atırlar.
Bundan sonra fors-major hallara dair bənd də müzakirə mövzusu olur. Bura təbii fəlakətlər, habelə, müharibə başlanması və dövlət çevrilişi kimi bəndlər əlavə olunur. Ancaq fors-major hal yaşanmasa, hər iki tərəf aprelə dair dəqiq anlaşmasına sahib olur. Deyək ki, müqavilədə pomidorun 1 kiloqramının qiyməti 60 qəpik göstərilibsə, həmin tarixə bazardan pərakəndə alış dəyəri 40 qəpik olsa belə, sifarişçi sövdələşməyə riayət etməyə borcludu. Eyni zamanda, 60 qəpikdən müqavilə imzalanmasına dair satıcı da məsuliyyət daşıyır. Həmin vaxt topdansatış qiyməti 1 manata qalxsa belə, pomidoru 60 qəpikdən verməlidi.
İndi də gəlin “fyuçers müqaviləsi”ni futbolçularla klublar arasında imzalanan anlaşma dilinə çevirək. Məlum olduğu kimi, əcnəbilərlə imzalanan müqavilələr dollarla əks olunur. Futbolçuya ödənilən vəsait isə manatla hesablanır. Ödəniş baş tutan gün dolların manata qarşı olan məzənnəsi əsas götürülür. Manatımız da “üzə-üzə” gedir. Ancaq neftin qiymətinin qalxacağı təqdirdə, manatın dəyəri də avtomatik artacaq. Göründüyü kimi, iki tərəfdən biri kəskin şəkildə mənfi saldoya məruz qala bilər.
Bunun qarşısını məhz fyuçers müqaviləsi ilə almaq mümkündü. Söhbət əvvəlcədən sövdələşməyə imza atmaqdan gedir. Tərəflər müqavilə imzalanan gün manatın dollara qarşı olan kursunu əsas götürərək, zərəri iki yerə bölə bilərlər. Yəni, manat dollara qarşı bahalaşacağı təqdirdə, fərqi 2 hissəyə bölmək, dollar manata qarşı bahalaşacağı təqdirdə də həmçinin. Misal üçün, 30 dekabr 2015 tarixinə 1 dollar 1,5594 AZN-ə bərabər olub. Müqavilə imzalanarkən məhz bu məzənnəni əsas götürüb, anlaşmaya imza atmaq lazımdı.
Deyək ki, futbolçuyla 6 aylıq müqaviləyə imza atılır. Klub ona bu müddət ərzində 180 min dollar ödəməyi öhdəliyinə götürür. Bu, ayda 15 min dollar deməkdi. Məsələn, 2 aydan sonra kurs oldu 2 manat. Belədə, arada yaranan 44 qəpiklik fərqi tərəflər 2 yerə bölür. 15 min dollarlıq anlaşmada məzənnənin 44 qəpik dəyişməsi hər dollara görə tərəflərin 22 qəpiklik zərər ödəməsini təmin etmiş olur. Eyni minvalla manat qalxsa da, tərəflər zərəri 2 yerə bölməklə, ziyana şərik olarlar.
Yeni imzalanan müqavilələrə bu bəndləri salmaqla, həm klublar, həm də futbolçular özlərini mümkün devalvasiyadan 50 faiz qorumuş olarlar. Necə deyərlər, ziyanın yarısından qayıtmaq da igidlikdi.