Ölkə futbolu
Devalvasiya "Zirə"ni qarışdırdı
Topaz Premyer Liqasının debütantı “Zirə”də vəzi…
Topaz Premyer Liqasının debütantı “Zirə”də vəziyyət zilə çıxıb, zibilə dönüb. Futbolinfo.az xəbər verir ki, manatın devalvasiyasından sonra qəsəbə təmsilçisi ziyana düşməmək üçün futbolçuların məvaciblərini köhnə kursla ödəmək istəyir.
“Zirə”dəki hüquqi məsələlər digər klublardan fərqlənmir. Vüqar Astanovun prezidenti olduğu klub da futbolçularla 2 müqavilə bağlayıb. Özü də notariusdan keçməyən müqavilə ABŞ dolları ilə imzalanıb. “Qeyri-qanuni” müqaviləylə yerli futbolçular FİFA-ya şikayət etmək hüququna sahib olmasalar da, “Zirə”nin legionerləri bu addımı ata bilərlər.
“Zirə” rəhbərliyi “qara müqavilə”də misal üçün, aylıq məvacibi 5 min dollar göstərilən futbolçuya 5 min manat ödəməyi təklif edir. Bununla da, manatın devalvasiyasını faktiki olaraq, oyunçuların üzərinə atmaq niyyəti güdür. Ancaq bu cür davam etsə, klubu “Xəzər Lənkəran”ın aqibəti gözləyir.
Xəbərdarlıq edək ki, daha bir klubumuz FİFA-da rüsvay olmasın. Komandada yer alan bütün əcnəbilər dünyanın ali futbol qurumuna “qara müqavilə”ni əsas gətirərək, müraciət edəcək. Düşünməyin ki, Azərbaycandakı “analoqu olmayan notarial qaydalar” beynəlxalq aləmdə də tanınanacaq. Elə öz aləminizdə “geydirmə” hesab etdiyiniz bu müqavilə kifayət edəcək ki, FİFA futbolçunu haqlı çıxarsın. Nəticədə, qara qəpiyinə qədər hər bir oyunçunun məvacibini dollarla ödəyəcəksiniz. Üstəlik, sizi cərimələyəcəklər də.
Hələ bu, ən yaxşı halda. Borcların ödəməsində gecikməyə yol versəniz, nöqtə-vergülünədək “Xəzər Lənkəran” aqibətini yaşayacaqsınız. Əvvəla transfer qadağası mövzusunda, sonra isə “FİFA-nın qara siyahısı”na düşmək baxımından. Çünki bu gün “Xəzər Lənkəran” adı gələndə, FİFA-dakılar “maxinasiya edən komanda” imici formalaşmış bir klub barədə qərar çıxarmaq üçün çox dərinə getmirlər. Bax, buna görə də Mais Mənsimov – Tuyqun Nadirov tandeminin komandası daim FİFA-dakı mübahisəli məsələlərdən məğlub ayrılır. İndi də deyəsən onların yeni davamçıları peyda olmaqdadı… “Zirə”nin timsalında.