Premyer-liqa
Musayevin Mustafası
Ramin Musayevin son açıqlamaları açıq səmada şimş?…
Ramin Musayevin son açıqlamaları açıq səmada şimşək effekti verdi. Zaman-zaman maraqlı, bəzən də qəribə fikirləri diqqət çəkdiyindən ilk vaxtlar kimsə Peşəkar Futbol Liqasının prezidentinin dediklərinə böyük önəm vermədi. Ancaq hadisələrin ssenarisinin sonrakı ardıcıllığı göstərdi ki, bütün bunlar çoxdan yığılıb qalmış problemlərin partlayışı, eyni zamanda əks-hücumdu.
Ramin bəyin klubların PFL-ə borclu olması, pulları ödənilməyəcəyi halda Premyer Liqa təmsilçilərinin xallarının silinəcəyi ilə bağlı dedikləri ilk vaxtlar ciddi qəbul olunmadı. Klublar bunun söz xatirinə deyildiyini düşündülər, hətta AFFA-nın hüquqşünası Rəmiş Malıyev proseduru izah etməyi lazım bildi. Belə ki, PFL bunun üçün öncə İntizam Komitəsinə müraciət etməliydi. Musayevin onun dediyi kimi etməsi isə açıqlamasında israrlı olduğunu göstərdi.
***
Artıq AFFA İntizam komitəsinin iclası keçirilib və Topaz Premyer Liqasında mübarizə aparan klubların borcu müzakirə olunub. Peşəkar Futbol Liqasının İntizam Komitəsinə ünvanladığı məktuba əsasən araşdırma aparılıb və qərar verilib. Elitada çıxış edən klubların (“Qarabağ” istisna olmaqla) legioner futbolçular üçün nəzərdə tutulan üzvlük haqqı və cərimələrdən ibarət olan PFL-ə ödənilməmiş borclarının olduğunu və borcların son ödəmə tarixinin 29 yanvar 2016-cı il kimi qeyd olunduğunu qurum müraciətində bildirib. Eyni zamanda PFL təyin edilmiş tarixə kimi borcunu ödəməyən klublara qarşı yeni (yerli və legioner) futbolçuların qeydiyyatını və hazırda heyətdə olan legioner futbolçuların növbəti turlarda iştirakına qadağa qoyulması ilə bağlı da İK-ya müraciət edib.
İntizam Komitəsi fakt qarşısında qaldıqdan sonra yanvarın 29-a kimi PFL-ə olan borcunu ödəməyən klublara qarşı sanksiyaları təsdiqlədi:
– Yeni (yerli və legioner) futbolçuların qeydiyyatına qadağa qoyulsun.
– Hazırda heyətdə olan legioner futbolçuların növbəti turlarda iştirakına qadağa qoyulsun (borc ödənilmədiyi tarixə kimi).
– Borcunu ödəmiş kluba qarşı cəzalar qüvvədən düşür.
– Hazırda heyətdə olan legioner futbolçuların növbəti turlarda iştirakına qadağa qoyulsun (borc ödənilmədiyi tarixə kimi).
– Borcunu ödəmiş kluba qarşı cəzalar qüvvədən düşür.
***
Maraqlı situasiyadı. Daim klublarla sıx münasibətlərdə olan Musayevə nə oldu ki, birdən-birə belə zəlzələnin səbəbkarı oldu? Axı, o, birbaşa yarışını təşkil etdiyi elita təmsilçiləri ilə bu şəkildə davranmağı istəməzdi. Neçə illərdi eyni problem var və hər dəfə də məsələ yoluna qoyulur, şişirdilmir, bağlı qapılar arxasında həll edilirdi. Yoxsa neft böhranının gətirdiyi çətinlik belə durumu ortaya qoydu?
Deyəsən, hə!
Hər il belə problemlər olurdu və futbola axan böyük pulların içərisində bu kimi amillər diqqət çəkmirdi. Xırdaçılığa da gərək qalmırdı, bəzən AFFA-nın öz imkanları hesabına borclar bağlanırdı. İndi isə SOCAR büdcəni azaldıb, assosiasiyaya gələn pullar isə birbaşa baş katib Elxan Məmmədovun nəzarətinə keçir. Bildiyimizə görə, PFL cərimələrin və rüsumların hesabına yaşamağa məcbur edilib. Çempionatın sponsoru “Topaz” da özü yaşamaq uğrunda mübarizə apardığından Musayevin rəhbərlik etdiyi qurum faktiki ortada qalıb.
Nəticədə pulsuz qalmağa məhkum edilmiş PFL vəziyyətdən çıxmaq üçün bu yola əl atmağa məcburdu. Klubların reaksiyası da maraqlıdı və onların açıqlamalarından sonra Elxan Məmmədovun atdığı daş bumeranq effekti ilə onun özünə dəyir. İndi məlum olur ki, AFFA-nın da klublara borcu var. Bu, ya yayıma, UEFA tərəfindən avrokuboklardakı çıxışa görə baş katibin klublara etmədiyi ödənişlərdi, ya da elə Məmmədovun himayəsində olan “Kəpəz”, “Sumqayıt” kimi klubların borclarıdı. İndi Musayev baş katibin ona qıymadığı pulları hüquqi müstəvidə əldə etməyə çalışır. Həm də Elxan bəyin nəzarətində olan qurmların əli ilə.
Ramin Musayev bir neçə gün ərzində saytlarda, qəzetlərdə, telekanallarda eyni açıqlamanı verməsinin də kökündə bu durur. “Mus-mus”un Mustafası odur ki, AFFA-dan PFL-ə heç bir məbləğ ödənilmirsə, o zaman biz qanunların verdiyi imtiyazlardan yararlanaraq ayaq üstə qalacağıq. O da maraqlıdı ki, borcu olmayan “Qarabağ”la yanaşı, “Qəbələ” də sudan quru çıxır. Klubun vitse-prezidenti Fariz Nəcəfova inansaq, hətta PFL-ə olan borcların “barter yolu ilə” silinməsindən sonra AFFA-nın onlara borcu qalır. Deməli, Musayevə problem yaradan məhz baş katibin nəzarətində olan klublardı, əli çatmayan elita təmsilçilərində vəziyyət normaldı.
Təbii ki, bu əzələ nümayişi Musayevə də başağrısı gətirəcək. Klublar indiyədək cərimələrə, vərəqə sayına bir o qədər önəm vermirdisə, bundan sonra daha diqqətli olacaqlar. Hətta vərəqə sayan klublar da olacaq. Necə ki, “Kəpəz” ötən həftə onlara kəsilən cəriməni ədalətsiz olduğunu iddia edib 5 min manatlıq cəriməni ləğv etdirməyə nail oldu.
FƏRİD
- Ölkə futbolu2024-05-15 15:38
AFFA 6 kluba lisenziya verdi
- Ölkə futbolu2024-05-15 09:42
Klublarımızın rəqibləri bəlli olur: yalnız “Neftçi” səpələnmişlərdə olacaq
- Ölkə futbolu2024-05-15 14:39
Premyer Liqanın ən reytinqli futbolçusu: ilk 6 yer “Qarabağ”ın oldu
- Müsahibə2024-05-15 08:00
Xvalko qərarını verməyib: “Həmin anda nəsə deməyin xeyri olmayacaqdı”