Premyer-liqa
TPL-dən salam: Hondurasdan Lüksemburqadək
Mart ayının sonuncu həftəsində milli komandalar üç&uu…
Mart ayının sonuncu həftəsində milli komandalar üçün “pəncərə” nəzərdə tutulduğundan Topaz Premyer Liqasında fasilə yaranmışdı. Bu müddət kəsiyində yalnız azərbaycanlı futbolçular deyil, ölkəmizdə çıxış edən bəzi əcnəbilər də təmsil etdikləri milli komandalara dəvət alıb. Futbolinfo.az xəbər verir ki, Topaz Premyer Liqasında çıxış edən 5 legioner futbolçu milli düşərgəyə dəvət alıb.
“Qarabağ”lılar – Ansi Aqolli və İbrahim Şehiç müvafiq olaraq, Albaniya və Bosniya Hersoqovina millisinə, “Zirə”nin hücumçusu Nelson Bonilla Salvador, “Qəbələ”li Sergey Zenyov Estoniya, "İnter"in yarımmüdafiəçisi Nika Kvekveskiri isə Gürcüstan yığmasına dəvətlilər sırasında olublar. Adıçəkilənlərin heç biri Azərbaycana əliboş qayıtmayacaq. Sözügedən oyunçuların hamısı milli formada meydana çıxıb, hətta aralarında fərqlənənlər də olub.
Ansi Aqolli: Albaniya millisinin şərəfini qoruyan sol cinah müdafiəçisi yığmasının Avstriya ilə səfər matçında meydana çıxıb. Meydan sahiblərinin 2:1 hesabı ilə qalib gəldiyi görüşdə “Qarabağ”ın futbolçusu 90 dəqiqə meydanda olub. Lüksemburqla (2:0) dünən keçirilən qarşılaşmada isə məşqçilər heyəti Azərbaycan çempionunun xidmətinə ehtiyac duymayıb.
İbrahim Şehiç: Bosniya və Hersoqovina milli komandasında Asmir Beqoviçin əvəzləyicisi olan qapıçı nəhayət ki, 5 illik fasilədən sonra ilk dəfə yığmasının heyətində çərçivəni qoruyub. O, Lüksemburqla (3:0) keçirilən yoxlama matçında fasilədən sonra meydana daxil olaraq, qapısının toxunulmazlığını qoruya bilib. Baş məşqçi Mehmed Bazdareviç dünən İsveçrə (2:0) ilə keçirilən görüşdə “Qarabağ”ın qapıçısına şans verməyib.
Nelson Bonilya: Salvadorlu hücumçu digərlərindən fərqli olaraq, rəsmi oyunlarda meydana çıxıb. 2018-ci ildə Rusiyada keçiriləcək dünya çempionatının seçmə oyunları çərçivəsində Hondurasa qarşı həm evdə, həm də səfərdə keçirilən hər iki matçda 90 dəqiqə meydanda olan forvard qol vurmağa da macal tapıb. “Zirə”nin hücumçusu komandasının doğma meydanda 2:2 hesabı ilə bərabərə qaldığı oyunun 89-cu dəqiqəsində millisini məğlubiyyətdən xilas edib. Cavab matçında isə Bonilla da millisinə kömək edə biləyib – 0:2.
Sergey Zenyov: “Qəbələ”li oyunçu şərəfini qoruduğu Estoniya yığmasının heyətində 2 görürşdə də start heyətində yer alıb. Futbolçu Norveçlə qolsuz başa çatan görüşdə oyunu əvəz olunmadan keçiribsə, Serbiya ilə qarşılaşmada (0:1) 82 dəqiqə tər töküb.
Nika Kvekveskiri: "İnter"in orta sahə oyunçusu ötən gecə şərəfini qoruduğu Gürcüstan yığmasının Qazaxıstanla yoxlama matçının ikinci hissəsində meydana çıxdı. Qarşılaşma isə 1:1 hesabıyla başa çatıb.
Qeyd edək ki, adıçəkilən futbolçular dünən axşam da millinin düşərgəsində olduqlarından Topaz Premyer Liqasının bu gün keçiriləcək 27-ci turunun oyunlarını buraxacaqlar.
ELMAR ABDULLA-ZADƏ