Layihə
23 GÜN QALDI: Millimizə birlikdə dəstək olaq!
Mayın 5-də Bakıda 17 yaşlı futbolçular arasında növb…
Mayın 5-də Bakıda 17 yaşlı futbolçular arasında növbəti qitə çempionatının final mərhələsi start götürəcək. Bir neçə gün öncə püşk atıldı, iştirakçılar rəqiblərini tanıdılar və son hazırlıqlar üçün işə başladılar.
Təbriz Həsənovun rəhbərlik etdiyi milli komandamız ev sahibi kimi qatılacağımız yarışın autsayderi hesab olunur. Amma buna baxmayaraq, püşk haqqında danışan əksər futbol adamları qrupdan çıxacaq gücdə olduğumuzu, millimizin sürpriz etməyə qadir olduğunu düşünür.
Təbii ki, bütün bunlar gəlişigözəl sözlərdi və daha çox nikbin əhval-ruhiyyə yaratmaq üçündü. Açılış oyununda 5 qat qitə çempionu Portuqaliyayla üz-üzə gələcəyimizi nəzərə alsaq, yarış bizim üçün yaxşı başlamaya da bilər. Çox əla heyəti olan Belçika və Şotlandiya ilə oyunlar da asan alınmayacaq.
Kağız üzərində nəinki qrupun, bəlkə də yarışın ən zəifiyik. Bunu etiraf etmək, amma qorxmamaq lazımdı. Daim favoritlər qalib gəlsəydi, heç oynamaq lazım olmazdı. Sürprizlər qaçılmazdı və meydan sahibi olduğumuzdan ən böyük gözlənilməzlik elə bizdən gəlməlidi. Uğur qazanmaq üçün isə təkcə məşqçi və futbolçu heyəti çalışmamalıdı, hamı bu işə töhfəsini verməlidi.
17 yaşlılar arasında Avropa çempionatı qıtənin ən mötəbər yarışı deyil. Amma gələcəyin ulduzlarının əksəriyyəti burada toplaşdığı üçün bütün qitə klublarının gözü Bakıda olacaq. 15 qonaq komandanın heyətinin bəlkə də yarısı bir neçə ildən sonra “Real”ın, “Barselona”nın, “Bavariya”nın, “Çelsi”nin və başqa klubların oyunçusu olacaq. Ona görə oyunların əhəmiyyəti böyükdü, rəqabət ən üst səviyyədədi. Bu, millimizin üzvləri üçün də eyni anlam daşıyır. Futbolçularımız millinin uğurunda pay sahibi olmaqla yanaşı, özləri üçün də qapı aça, skautların diqqətini çəkə bilərlər.
Komandamızın baş məşqçisi Təbriz Həsənovun yetirmələrini maksimal dərəcədə hazırlaşdırdığı, oyunlara köklədiyi şübhə doğurmur. AFFA rəhbərliyi də imkan daxilində komanda üçün şərait yaradıb. Ölkəmizi yaxşı təmsil etmək, komandamızın boyundan hündürə tullanması üçün mətbuatın, azarkeşlərin, futbol ictimaiyyətinin də üzərinə böyük yük düşür.
Mətbuat komandanı təzyiq altında saxlamamalı, onları ruhlandırmalı, çətin anlarda dəstək verməlidi. Onsuz da hamımıza aydındı ki, indiki halda Portuqaliya, Belçika və Şotlandiyanı uda bilməməyimiz normal qəbul olunacaq və başadüşülən olacaq. Amma məhz dəstəyimiz sayəsində komanda qrupdan çıxsa, bu, Avropaya da gözəl mesaj olar.
Azarkeşlər də boş dayanmamalı, oyunlara gəlməli, milli komanda ətrafında birləşməlidi. Yığma komandada oyunçusu olan klublar fan-klublarını təşkilatlandırmaqla ümumi uğurda rol oynaya bilər. Fanatlar məhz belə matçlarda 12-ci oyunçu funksiyasını yerinə yetirməklə ümumi uğura şərik olmalıdı.
Futbol ictimaiyyəti ilə işi AFFA aparmalıdı, amma bir çox insan özü də təşəbbüskar ola bilər. Məsələn, gənclər arasında dünya, Avropa çempionu olmuş insanların – Arif Əsədov, Tərlan Əhmədov, Vladislav Qədirov, Vəli Qasımovun bu işdə böyük rolu olmalıdı. Onlar növbəli şəkildə komanda ilə görüşməli, məsləhətlərini verməlidilər. Qitə çempionatı ölkədaxili oyunlardan fərqlidi – bunu isə məhz belə turnirlərdə təcrübəsi olan insanlar başa salmalıdı. Bundan başqa, məhz 17 yaşlıların yarışlarında ədaləti qorumuş sabiq FİFA referisi Tahir Süleymanov, onun yolunu davam etdirən Əliyar Ağayev də futbolçularımıza faydalı məsləhətlər verə bilər.
Yarışa 23 gün qalsa da, ölkədə qitə çempionatı ab-havası hiss olunmur. AFFA televiziya, mətbuat vasitəsi ilə PR işini genişləndirməli, əsl bayram əhval-ruhiyyəsi yaratmalıdı. Final mərhələsini təkcə komandamız da orada oynasın deyə qəbul etmirik. Qonaqlar üçün ölkəmizin imkanlarını açmalı, mədəniyyətini təbliğ etməliyik. AFFA yaxşı olardı ki, bu yarışı Bakıya məhkum etməzdi, qrup oyunları Qəbələdə, Lənkəranda da keçirilərdi. O zaman yarışın coğrafi miqyası böyüyər, turistik imkanlarımız reklam olunardı. Ancaq bu səhvə lap əvvəldən yol verilib, indi nəyisə dəyişmək mümkün deyil. Ona görə də mümkün olduğu qədər təbliğat işi aparmaq lazımdı.
Futbolinfo.az bugündən etibarən milli komandamıza dəstək üçün silsilə yazılara start verir. Ümid edirik, millimizin uğurlu çıxışında, qitə çempionatının yaxşı təşkilində hamımızın bacara bildiyi qədər rolu olacaq.
CAVAD
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-16 09:10
Lunyov “Qarabağ”dan ayrıla bilər
- Ölkə futbolu2024-04-17 09:23
Mirzov “Neftçi”dən ayrılır: Premyer Liqadan təklifləri var