Azarkeşlərin yaş problemi və tribunaları “qocaltmaq” yolları – LAYİHƏ

Ölkə klublarının fanat sarıdan “kasıb” olmasının səbəblərini araşdırarkən, daha bir xoşagəlməz faktlə üz-üzə qalırıq. Söhbət tribunalara gələn fanat dəstələrinin orta yaş həddindən gedir. Bu, xüsusilə paytaxtda müşahidə olunur. Onsuz da barmaqla sayılacaq qədər olan azarkeşlərin əksəriyyəti məktəblilərdi.

Bu yöndə “öncüllər” sırasında dayanan “Bakı”nın yararlandığı praktikanı xatırlatmamaq olmur. Komandanın ev oyunlarına cəlb olunan məktəblilərə 1 manat “şirnikləndirici” təklif edən klub rəhbərliyi bununla da guya fan-klub yaradırdı. Aydın məsələdi ki, “manatlıq fanat”la elə məskunlaşdıqları Biləcəridən o yana getmək mümkün deyil. Klubun bazası, uşaq futboluna diqqəti bir çoxlarına örnək olsa da, fanatlarla işləmək bacarığı “0”-dı. Axı, 1 manata tribunaya gətirilən məktəbli əlacsızlıqdan sənin tribunanda əyləşir və yalandan “Bakı”, “Bakı” çığırıb, 90 dəqiqənin tamamında dondurmasını almağa tələsir.

“Bakı” ən biabırçı misal olduğu üçün məhz bu klubun adını hallandırdıq. Bunabənzər praktika olduqca çoxdu və dərinliyə varanda, əksər klublarımızda vəziyyət eynidi. Bu, xüsusilə paytaxt klublarında müşahidə olunur. Əgər “Xəzər Lənkəran”, “Kəpəz” və “Sumqayıt”ın ev oyunlarına gələn azarkeşlərin orta yaş həddi 13-15 limitini xeyli arxada qoyursa, digərlərində bu problem qabarıq şəkildə özünü büruzə verir. İstisna hal kimi “Qarabağ”ı göstərə bilərik ki, Ağdam təmsilçisinin Suraxanıya daşınmasından sonra tribunalara bir neçə min fanat toplaşır. Ancaq göründüyü kimi, ölkə çempionunun ev oyunlarına tamaşaçı sayının artmasında başlıca rolu məhz məskəni dəyişməsidi.

İlk yaranan sual təxmini belə səslənə bilər: “Tribunalara yeniyetmələrin gəlməsinin nəyi pisdi ki?” Bunun bir neçə problemli tərəfi var.

İlk növbədə tribunadan səslənən şüarlar… “1:0 azdı, … qazdı” və bundan da kobud ifadələrə yer verilməsi əlbəttə ki, klubların azarkeşlərinin orta yaş həddiylə əlaqədardı. Aydın məsələdi ki, daha zəngin həyat təcrübəsinə sahib olan fanat yaşına uyğun da şüarlar səsləndirəcək.

Bu yöndə diqqət yönəldilməli xüsusi məqam fanatlarla işləməkdi. Özü də “1 manatlıqlar”la yox. Maarifləndirici görüşlərin təşkili mütləqdi ki, bunu da heç bir klub sistemli şəkildə həyata keçirmir. Özü də bu görüşlər həm klubun bazasında, həm də yerlərdə təşkil olunmalıdı. Söhbət ilk növbədə ali təhsil ocaqlarından gedir.  Görüşlərə klubların aparıcı oyunçuları, veteranları, məşqçi heyəti kimi qruplardan təşkil olunmuş nümayəndələri aparmaq lazımdı. Fanatlarla maraqlı müsabiqələr təşkil etməklə gözəl körpü də qurmaq çətin deyil. Münasibətlər yüksək həddə olduqdan sonra isə kluba dəstək vermək üçün birgə layihələrin təşkili də aksioma çevriləcək.

Tribunalarda mədəni davranışa nail olduqdan sonra düşünüləsi məqam fanatların 2 saata yaxın vaxtının səmərəli keçməsidi. İlk növbədə bu, hissələr arasındakı fasilə zamanı özünü büruzə verməlidi. Çünki stadiona gələn fanat elə bir enerji almalıdı ki, səbrsizliklə sevimli komandasının növbəti ev oyununu gözləsin və nəinki özü stadiona gəlsin, hələ ətrafındakı dostlarına da komandasının gördüyü iş barədə məlumat versin, onları tribunalara daşısın.

Futbolinfo.az Topaz Premyer Liqasında çıxış edən hər bir klubumuza bu yöndə yardımçı olmağa hazırdı. Yuxarıda sadaladığımız işlərin görülməsi yollarınının detallarını, habelə bu yöndə informasiya dəstəyi verməyi də öhdəmizə götürə bilərik. Qalır yeganə sual: klublarımız bunu istəyirmi?

FƏRİD