Layihə
21 GÜN QALDI: Qorxulu Portuqaliya və Belçika, münasib şotlandlar
17 yaşlılardan ibarət yığma komandalar arasında paytaxtımızda …
17 yaşlılardan ibarət yığma komandalar arasında paytaxtımızda keçiriləcək Avropa çempionatının final mərhələsinin startına 21 gün qaldı. Budəfəki yazını Təbriz Həsənovun yetirmələrinə rəqib olan komandalar barədə geniş məlumat verməyə həsr edəcəyik.
Belçika
Birinci seçmə qrup mərhələsində Sloveniya, Türkiyə və Farer adaları ilə mübarizə aparan “qırmızı iblislər” yalnız qardaş ölkənin gənclərini məğlub etməyi bacarmadı. Sloveniya üzərində 2:1 hesablı qələbə qazanan Belçika adalılara da şansı tanımadı – 4:1. Yalnız Türkiyəylə xalları bölən (0:0) Tyerri Çikenin yetirmələri qrup qalibi olaraq, elit-raunda vəsiqə əldə etdi.
Maraqlıdı ki, ən yaxşı qrup üçüncüsü kimi bu mərhələyə vəsiqə əldə edən Sloveniya yenidən Çikenin komandası ilə üz-üzə gəldi və bu dəfə qapısının toxunulmazlığını qoruya bildi. Qrupun favoriti hesab olunan İspaniya isə yekunda paytaxtımıza lider kimi gəlmək hüququ əldə edə bilmədi. Özü də bu dramatik şəkildə baş verdi. İsraili 1:0 hesabı ilə üstələyən “buğalar” da Sloveniya ilə qolsuz bərabərə qaldı. Belçikanın da yəhudiləri 1:0 məğlub etməsindən sonra yeganə vəsiqənin taleyinə son turda aydınlıq gəlməli idi. Maraqlıdı ki, Sloveniya son görüşünü də qolsuz bərabərliklə başa vurduqdan sonra 1-ci pillə şansları yalnız İspaniya ilə Belçikada qaldı. Qarşılaşma qolsuz bərabərliklə başa çatdığı üçün qrup qalibi matçsonrası penaltilərlə müəyyənləşməli oldu. Daha sərrast olan belçikalılar final mərhələsinə vəsiqə qazandı.
Bu komandanın əsas silahı müdafiə xəttinin etibarlı oynamasıdı. Final mərhələsinədək keçirdikləri 6 görüşdə cəmi 2 dəfə məyus olan “qırmızı iblislər” 7 qola sevinib. Ümumi statistikanı götürdükdə isə Belçika yığması indiyədək 17 yaşlılar arasında Avropa çempionatlarında (seçmə mərhələlər də daxil olmaqla) 93 oyuna çıxıblar. Bu qarşılaşmaların 36-da qələbəyə sevinən yığmamızın ilk rəqibi 22 dəfə də məğlubiyyət acısı dadıb. Digər oyunlarda isə komanda bərabərliyə razılaşıb.
Şotlandiya
Qrupda ən münasib rəqib Şotlandiya yığmasıdı. Biz britaniyalıları aşağılamaq niyyəti güdmürük. Sadəcə, göstərdikləri nəticələr bu ölkənin 17 yaşlılardan ibarət komandasının qrupda gənclərimizin qələbə qazanmaq üçün ən real rəqibi kimi görünür.
Britaniyalılar hələ 1-ci seçmə mərhələdə büdrəməyə yaxın idilər. Onlar yalnız ən yaxşı qrup 3-cüləri sırasına düşərək, elit-raunda vəsiqə əldə etdi. İtaliya, Bolqarıstan və Makedoniya ilə eyni qrupda yer alan Skot Qemillin yetirmələri ilk oyunda Makedoniyanın müdafiəsində daşı daş üstə qoymadılar – 3:0.
Növbəti oyunda britaniyalılar İtaliya qarşısında “ağ bayraq qaldıran” Bolqarıstana uduzdular – 0:2. Son turda isə “skuadra adzurra”yla xalları yarı bölən (1:1) “yubkalılar” son turdakı rəqibindən 1 xal az toplayaraq, qrup 3-cülüyü ilə barışdılar. Bəhs etdiyimiz yığma bolqarla eyni – 4 xala sahib olsa da, şəxsi görüşdə məğlub olduğu üçün yalnız Makedoniyanı arxada qoydu.
Elə elit-raund da Şotlandiya üçün mürəkkəb qrafiklə keçdi. İlk oyundaca Qremillin drujinası ağır zərbəylə üzləşdi. Danimarkayla görüş Şotlandiyanın fiaskosuyla nəticələndi – 0:4. Növbəti oyunda Çexiyanı 2 cavabsız qolla keçən britaniyalılar İsveçrəylə “sülh bağladı” – 1:1.
Qrup qalibi 6 xal toplayan Danimarka oldusa, 2-ci yerin sahibini müəyyənləşdirmək üçün əlavə göstəricilərə nəzər yetirilməli oldu. Çexiyayla eyni – 4 xal toplayan Şotlandiya şəxsi görüşdə qalib gəldiyi üçün Bakıya vəsiqə əldə etdi.
Maraqlıdı ki, seçmə tsikllərdə keçirdiyi oyunlarda Şotlandiya ilk qolu buraxdığı təqdirdə məğlubiyyətdən yaxa qurtara bilməyib. Bu da komandanın psixoloji cəhətdən zəif olmasından xəbər verir. Keçirdiyi 6 oyundakı qolların saldosu da şotlandlar üçün ürəkaçan deyil: vurduqları 6 qola cavab olaraq, 9 dəfə meydanın mərkəzinə dəvət olunublar.
Şotlandiyanın U-17 yığması tarixi ərzində 87 dəfə AÇ-nin oyunlarına çıxıb. 35 qələbə qazanan komanda, 28 dəfə meydançanı boynubükük tərk edib. Digər 16 qarşılaşmada isə xallar yarı bölünüb.
Portuqaliya
Qrupun aşkar favoriti Portuqaliyadı. Kriştiano Ronaldonun həmvətənləri zəfər yürüşünü Ermənistan üzərində 7:0 hesablı darmadağınla başlayıblar. Pireneylilərin növbəti qurbanı San-Marino komandası olub – 5:0. Yalnız qrupdakı son görüşdə portəgizlər qapılarında top görüb, qələbədən məhrum olublar. İngiltərə ilə qarşılaşma 1:1 başa çatıb. Yalnız top fərqinə görə “Dumanlı Albion” təmsilçisindən geri qalan Eliu Souzanın yetirmələri qrup 2-cisi kimi elit-raunda yüksəliblər.
Bu mərhələdə isə Portuqaliya qabağına çıxanı nokauta göndərib. İsveç və Uelsi quru hesabla məğlubiyyətə uğradan qrupumuzun favoriti (müvafiq olaraq 2:0 və 1:0), son oyunda Xorvatiyanı 4:2 hesabı ilə yenərək, Bakıya vəsiqəni 1-ci yerlə təmin edib.
Portuqaliyanın 17 yaşlılar arasında tarix ərzində 5 dəfə Avropu çempionu olması çox şeydən xəbər verir. Ancaq unutmayaq ki, bu ölkənin əsas yığmasının “at oynatdığı” dövrlərdə Luiş Fiqu və dostları millimizlə 1:1-lik bərabərliyə uşaq kimi sevinirdilər…
AĞA