Layihə
19 GÜN QALDI: “Çağırmasalar, nə edə bilərəm ki?”
17 yaşlılardan ibarət yığma komandalar arasında paytaxtımızda …
17 yaşlılardan ibarət yığma komandalar arasında paytaxtımızda keçiriləcək Avropa çempionatının final mərhələsinin startına günlər qaldı. Mayın 5-də başlanacaq turnirlə bağlı veteran futbolçu, tanınmış mütəxəssis Arif Əsədovun fikirlərini öyrəndik. Onu müsahib seçməyimiz səbəbsiz deyildi. Axı, Arifin belə yarışlarla bağlı zəngin təcrübəsi var. Vaxtilə 19 yaşlılardan ibarət yığmaməzən baş məşqçisi olmuş Əsədov həm də Avropa və dünya çempionudu. O, 1987-ci ildə SSRİ U-16 millisinin heəytində dünya, növbəti il ittifaqın 19 yaşa qədər yığmasının tərkibində qitə çempionatının qızıl medallarını qazanıb.
– Artıq püşk atılıb və U-17 yığmamızın rəqinləri bəllidi. Qrupda Portuqaliya, Belçika və Şotlandiya ilə mübarizə aparacağıq.
– Əvvəla, onu deyim ki, söhbət Avropa çempionatının final mərhələsindən gedir. Ona görə də burada zəif rəqib olmur. Bu mərhələyə vəsiqə qazanan komandalar güc nümayiş etdirib, buraya gəliblər. Əlbəttə ki, bizim qrupdakı rəqiblər içində Portuqaliya yığmasını fərqləndirmək olar. Çünki bu ölkənin yığmaları həmişə güclü oyun nümayiş etdiriblər. Təbii ki, digər ləqibləri də zəif hesab etmək olmaz. Hesab edirəm ki, qrupun favoriti Portuqaliya yığmasıdı. Bu rəqiblə işimiz bir az çətin olacaq. Lakin yığmamız 2-ci yeri tuta bilər. Yaxşı çalışsalar, yerli azarkeşlərin də dəstəyi ilə qrupu 2-ci yerdə başa vurub, növbəti mərhələyə adlaya bilərik.
– Hamı Portuqaliyadan çəkinir. Bu komandaya qarşı futbol camiəmizdə xof yaranıb. Təbii ki, bu amil yığmamızın futbolçularına da təsir edəcək. Sizcə, futbolçularımızdan həyəcanı götürmək üçün hansı addımlar atılmalıdı? Təklifiniz nədi?
– Həyəcan, çəkinmək həmişə olur. Lakin bu da daimi deyil. Futbolçu və məşqçi karyerama əsaslanaraq deyə bilərəm ki, həyəcan oyun başlayana kimidi. Ondan sonra hamısı yox olur və futbolçu rahat oyununu göstərir. Təbii ki, komandaları ilə bağlı ən yaxşı qərarı U-17 yığmamızın məşqçiləri verə bilər. Onlar bu məsələnin necə aradan qaldırılmalı olduğunu daha yaxşı bilirlər. Bundan əlavə, qrup oyunlarından əvvəl yoxlama matçları da keçiriləcək. Hesab edirəm ki, bu, da komandamıza müsbət təsir edəcək. Bütün bu sadaladıqlarım onlarda yarana biləcək həyəcanın, xofun aradan qaldırılmasına kömək edə bilər.
– Bəs bu turniri ölkəmiz üçün necə qiymətləndirmək olar? Hazırda oyunlara azarkeş yığmaq üçün də təbliğat işləri aparılır. Sizin bu barədə fikriniz maraqlı olardı…
– Bəli, bunlar mötəbər yarışlardı və ölkənin reklamına böyük töhvə verə bilir. Bu baxımdan AFFA rəhbərliyinə, təşkilatçılara alqışlar düşür ki, belə mötəbər yarışı Azərbaycanda keçirirlər. Təşkilati baxımdan… Artıq izləyirik, reklam çarxları da var. Baxmayaraq ki, yarışın startına hələ 3 həftə var, lakin təbliğat işlərinin yaxşı getdiyini demək olar. Hesab edirəm ki, ölkədə Avropa çempionatı ab-havası yaratmağı bacarıblar. Bu da insanları stadionlara cəlb etmək üçün önəmli amillərdən biridi. Ən vacib məsələ də odur ki, tribunalarda azarkeş olsun. Tribinada azarkeş, dəstək olanda futbolçularımızda da əlavə həvəs yaranır. Turnirin özü də futbolçular üçün önəmli yarışdı. Belə yarışları futbolçularda keçid dönəmi adlandırmaq olar. Çünki belə yarışlarda fərqlənməyi bacaranların çoxu yaxşı futbolçular olublar, sayılıb-seçilən klublarda oynayıblar. Bu da futbolçular və həmçinin məşqçilər üçün stimul olmalıdı.
– Hesab edirik ki, veteranların da dəstəyi komandamız, ümumilikdə turnir üçün də vacib olardı. Siz sabiq dünya və Avropa çempionu kimi, bu barədə dəstək üçün AFFA-ya müraciət etmisiniz?
– Azərbaycan futbolu üçün istər məşqçi, istərsə də futbolçu kimi əlimizdən gələni etmişik. Futbolçu kimi, dünya və Avropa çempionu olmuşuq. Bu, Azərbaycanın adına yazılıb. Hesab edirəm ki, məşqçi kimi də hardasa işlərimiz olub. Əgər ehtiyac varsa, əlimizdən gələni etməyə hazırıq. Amma yada salan olmayacaqsa, onda nə deyə bilərəm ki? Oyunları stadiondan izləyəcəyimi dəqiq deyə bilərəm. Amma digər məsələlərdə çağırmasalar, heç nə təklif edə bilmərəm. Yenə deyirəm, dəstək üçün həmişə hazırıq.
– Bir maraqlı məqam da var ki, turnir ölkəmizdə təşkil olunsa da, oyunlar ancaq Bakıda keçiriləcək. Sizcə, qarşılaşmalardan bir neçəsini regionlarda da keçirmək daha yaxşı olmazdımı?
– Qəbələdə yaxşı stadion var, bunu Lənkəranda da etmək olardı. Bu, təşkilatçıların işidi. Amma əlbəttə, bölgələrə salınması da yaxşı olardı. Məncə, belə yarışlar daha çox bir şəhərdə təşkil olunur. Amma bəzən görürsən ki, final mərhələlərini başqa şəhərdə keçirirlər.Yəqin ki, Bakı mərkəzdi deyə, belə qərara gəliblər.
ELMAR VƏLİYEV