Layihə
17 GÜN QALDI: Tərlan Əhmədovu oyunlara MTN işçiləri kökləyirmiş
Futbolinfo.az-ın ölkəmizdə 17 yaşlılar arasında Avropa &cce…
Futbolinfo.az-ın ölkəmizdə 17 yaşlılar arasında Avropa çempionatı ilə bağlı layihəsi davam edir. Budəfəki müsahibimiz uzun illər milli komandamızın kapitan sarğısını daşıyan, hazırda isə AZAL-ın baş məşqçisi olan Tərlan Əhmədovdu. Sabiq “4 nömrə”ni seçməyimiz heç də səbəbsiz deyil. Çünki Əhmədov 1990-cı ildə 18 yaşlılardan ibarət SSRİ yığmasının tərkibində Avropa çempionu olub. Kollektivlə böyük turnirdə çıxış etmiş və uğura nail olmuş birinin fikirləri yəqin ki, hamıya maraqlı olar.
– Sizcə, Portuqaliya, Belçika və Şotlandiyanın yer aldığı qrupda millimiz nəyə nail ola bilər?
– Düzdü, bəxtimizə düşən rəqiblər bir az güclüdü. Buna baxmayaraq, biz də zəif deyilik. Burada oynayıb, əzmkarlıq göstərib, məşqçinin tapşırığını yerinə yetirməklə nəyəsə nail olmaq olar. Amma ilk dəfə bu yarışda iştirak etmək, özü də doğma azarkeşlər önündə oynamaq stimul versə də, çətin olacaq. Fikrimcə, futbolçuların gələcəyi üçün ələ düşən bir şansdı. Qrup mərhələsini adlamaq haqda danışmaq çətindi. Futbol bir oyundu. Mən 18 yaşlılardan ibarət SSRİ yığmasının heyətində Avropa çempionu olmuşam. O vaxt biz qrupda İsveç, İngiltərə kimi yığmalarla qarşılaşmışdıq. Finaldakı rəqibimiz isə Portuqaliya idi. Həmin vaxt rəqibin heyətində Luiş Fiqu kimi gələcəyin ulduzları var idi. Bizim onda əsas məqsədimiz DÇ-yə vəsiqə qazanmaq idi. Amma biz sonda Avropa çempionu olduq. Gedişat nə göstərəcək – bilmirəm, ancaq arzu edərdim ki, komandamız qrupdan çıxıb, yoluna davam etsin. Futbol artıq elə bir dönəmə çatıb ki, zəif-güclü anlayışı qalmayıb. Məşqçi futbolçuları oyuna necə kökləyəcək – bu, sual altındadı.
– Qeyd etdiniz ki, siz artıq bu yolları keçmisiniz və uğur da qazanmısınız. Maraqlıdı, həmin vaxt sizləri oyuna necə kökləyirdilər?
– O vaxt komandada vətənpərvərlik var idi. Bizimlə MTN işçiləri söhbət edirdi, indiki kimi sərbəstlik yox idi. Qarşımıza ancaq futbol oynamaq məqsədi qoyulmuşdu, vətən, millət və s. bu kimi amillərlə bizi matçlara kökləyirdilər. Baxmayaraq ki, cavan idik, bizi oyunlara çox kökləməyə elə də ehtiyac yox idi. Çünki millidəki futbolçuların əksəriyyəti üzvü olduğu komandalarda əsas heyətdə çıxış edirdi. Məsələn, mən həmin vaxt “Neftçi”nin əsas heyətində çıxış edirdim. Sadəcə, bizim arzu, istəklərimiz var idi, futbolla yaşayırdıq. İndiki dövrdə oyunçulara sərbəstlik veririksə, futbolçu özü peşəkardısa, bu yarışa köklənməlidi.
– Doğma meydan amilinin millimizə xeyri dəyə bilərmi?
– Dünya və Avropa çempionatlarını analiz edəndə görürük ki, evdə çıxış edən komandalar həmişə büdrəyib. Amma arzu edək ki, bu yaşda futbolçularımız bizi sevindirsin.
– Qrup mərhələsini adlamaq bizim üçün böyük uğurdumu? Əksinə, qrupda qalmaq faciə sayıla bilərmi?
– Hər hansı yüksək nəticə bizim üçün uğurdu, həmçinin, qrup mərhələsini adlamaq. O ki, qaldı ilk mərhələdə mübarizəni dayandırmağa, hər şeyi faciə saymamalıyıq. Çünki həyat dayanmır. Nəyəsə nail olmağın yollarını axtarmalıyıq ki, gələcəkdə davamlı olsun. Həyatda faciə bir torpaq, bir də insan itkisidi. Hər il keçdikcə klublardan, millilərdən daha yaxşı nəticələr tələb olunur.
– Necə düşünürsünüz, yaxşı olmazdımı ki, çempionatın startı ərəfəsində siz, Arif Əsədov və ya bu uğura imza atmış digər futbolçulardan kimlərsə millinin düşərgəsində olsun, futbolçularla söhbət etsin?
– Bu, bizim şəxsi istəyimizdən asılı deyil. O vaxt Azərbaycan futbolunun 100 illiyində mənə dedilər ki, Avropa çempionu kimi tədbirdə adın çəkilib. Mən dedim ki, nə olsun çəkilib, mən orada olmamışam ki. Əvvəl dəvət olunmuşdum, sonradan dəvətnaməmi siyahıdan çıxardılar. Hər halda istəsələr, gəlib töhfəmizi verərik. İstəməsələr də, bu, artıq bizdən asılı deyil. Məndən başqa, Vəli Qasımov, Vladislav Qədirov, Arif Əsədov, İqor Ponamaryov kimi uğur qazanmış insanların görüşü futbolçulara motivasiya verə bilər.
– Sizcə, azarkeşləri stadionlara necə cəlb edib, milliyə dəstək olağa çağırmaq olar?
– Reklam olmalıdı. TV-də xırda yox, böyük reklamlar getməlidi. Futbolçular bir-bir təbliğ olunmalıdı. Ürəyində vətən sevgisi olan hər kəs milliyə dəstək verməldi. Düzdü, heç kimi ora məcbur yığmaq olmaz. Bu, artıq milliyə olan sevgiyə, məhəbbətə bağlı bir şeydi.
ELMAR ABDULLA-ZADƏ
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”