Layihə
16 GÜN QALDI: Başlamamış unutduğumuz yarış
Bakıda 17 yaşlılar arasında keçiriləcək Avropa çem…
Bakıda 17 yaşlılar arasında keçiriləcək Avropa çempionatına 2 həftədən bir qədər artıq vaxt qalır. Amma nədənsə bu yarışla bağlı təbliğat işlərində zamanın daralmasından irəli gələn tələskənlik, uğura hesablanan sistematiklik görmürük. AFFA bir neçə gün ərzində bir neçə aksiya keçirməklə normal ab-hava yaratsa da, bu günlər yenidən sakitlik hökm sürür.
Məktəblərdə keçirilən PR-aksiyalar maraqlı idi. Düzdü, daha yaxşı təşkil etmək olardı, amma istənilən halda təşkil edildi və marağa səbəb oldu. Bəs, davamı?
Ən pisi odur ki, ölkə mətbuatında da bununla bağlı nəyəsə rast gəlmirik. AFFA-nın rəsmi saytında verilən materiallar xəbər lentini bəzəyir, qurum bununla bağlı hər hansı iş görməyəndə isə sanki boşluq yaranır. Çox təəssüf ki, affa.az da artıq qitə birinciliyini “unudub”.
17 yaşlılardan ibarət millimiz məsul yarışa hazırlaşır. Komandanın gündəlik məşqlərindən fotoreportajlar, videoicmallar, istirahət vaxtlarındakı məşğuliyyətləri barədə materiallar çatışmır. Onları təzyiqdən qorumaq, əksinə, oyunlara daha məsuliyyətlə hazırlaşmalarını təmin etmək üçün maraqlı tədbirlər, veteranlarla, jurnalistlərlə, lazım gələrsə, qeyri-futbol sahələrinin adamları ilə görüşlər təşkil etmək lazımdı.
Düzdü, belə görüşlər onları psixoloji cəhətdən yükləyə də bilər. Amma unutmayaq kii, adi hazırlıqla bizi heç də fövqəladə uğur gözləmir. Çünki komandamızın da, rəqiblərinin də səviyyəsi, bacarığı bəllidi. İndiki məqamda futbolçuları meydandankənar amillərlə formada saxlamaq lazımdı. Şəhidlər xiyabanını ziyarət etməklə vətənpərvərlik ruhunu, tarixi qələbələrimizin videroliklərini izlətdirməklə oyun motivasiyasını, veteranlarla, həqiqi futbol ulduzlarımızla görüşlər təşkil etməklə həyat təcrübəsini artırmaq olar. Vaxtilə 17 yaşlıların yarışında iştirak edib, indisə dünya ulduzu olmuş Ronaldo, Runi və onlarca digər əcnəbinin həyat yolu haqda filmlər də stimul mənbəyidi.
U-17-nin üzvləri indidən başa düşməlidi ki, onların vurduğu hər qol kimləri – həmyaşıdlarını, valideynlərini, əzizlərini, sadə Azərbaycan vətəndaşlarını, qaçqınları, müharibədəki son olaylarda yaralanan əsgərləri – necə sevindirəcək, hər uğursuzluq onları necə məyus edəcək. Bu, olandan sonra yox, məhz indi başa salınmalıdı ki, futbolçular oyun səviyyəsinin, ustalığın yetmədiyi zamanda məhz bu kimi amilləri yada salıb əzmkarlıq hesabına ən yaxşı nəticəyə can atsın.
Bildiyimizə gğrə, komandaya psixoloq təhkim olunub – bu, yaxşı haldı. Amma heç bir psixoloq meydanda uğur qazanan, futbolçunu daha yaxından başa düşənləri əvəz edə bilməz. Ona görə də AFFA uğur simvoıuna çevrilmiş “Qarabağ”ın baş məşqçisi Qurban Qurbanovu, milli komandamızın kapitanı Rəşad Sadıqovu, böyük turnirlərdə qələbələr qazanmış veteranlarımızı, beynəlxalq təcrübəsi olan hakimlərimizi komanda ilə görüşdürməlidi.
Milli komandanın bütün üzvləri himni bilməli, oyunlar zamanı uca səslə oxumalı, bu hissin əlavə adrenalinə çevrilməsinə şahid olmalıdılar. Milli formanın dəyəri gənclərə aşılanmalıdı ki, sabah lazım gələndə onun üçün ayaq qoyulmalı yerə baş qoyulsun.
Təşkilat Komitəsi də çox işlər görməlidi. İndidən qonaq komandalar, jurnalistlər, turistlər üçün futbolumuzun, ölkəmizin təbliğatına hesablanan kitabçalar, büroşürlər hazırlanmalı, dilbər guşələrimizə, tarixi məkanlarımıza turlar təşkil olunmalıdı. Bəlkə də belə planlar var, amma bunun təbliğat işlərinə artıq başlanmalıydı.
Yarış günlərində kifayət qədər boş vaxtlar olacaq. Həmin zamanlarda qonaq jurnalistləri klublarımızın düşərgələrinə, məşq meydançalarına aparmaq, Premyer Liqa matçlarını izlətdirmək, uşaq liqalarındakı oyunlar, oyunçular ilə tanış etmək gərəkdi.
Planlar, görüləcək işlər həddən artıq çoxdu və bu yarış özünüreklam üçün əla fürsətdi. Yararlanmaq lazımdı.
FƏRİD