Layihə
15 GÜN QALDI: "Mançester Yunayted", "Arsenal" və "Sevilya"nın skautları da…
17 yaşlılardan ibarət yığma komandalar arasında paytaxtımızda …
17 yaşlılardan ibarət yığma komandalar arasında paytaxtımızda keçiriləcək Avropa çempionatının final mərhələsi bir qədər də yaxınlaşdı. Görək, oyunları izləmək üçün nə qədər media nümayəndəsi qeydiyyatdan keçib? Yaxud paytaxtımıza hansı xarici ölkələrdən jurnalistlər təşrif buyuracaq? Bununla yanaşı, qonaqların məskunlaşacağı yer, qidalanma məsələsi, məşq meydançaları seçimi və stadionların durumu da öyrənilməlidi. Bu məsələləri dəqiqləşdirmək üçün AFFA-nın İnformasiya və İctimaiyyətlə Ələqələr Departamentinin baş mütəxəssisi Firuz Abdulla ilə əlaqə saxladıq.
Assosiasiya rəsmisinin sözlərinə görə, indiyə kimi 115 media nümayəndəsi qeydiyyatdan keçib. Xarici ölkələr arasında Portuqaliya, Şotlandiya, Bosniya və Hersoqovina, İsveç, İspaniya və Danimarkadan olan həmkarlarımız matçları izləmək üçün AFFA-ya müraciət ediblər.
Firuz bəy sözügedən bir neçə xarici ölkədən tanınmış klubların skautlarının da paytaxtımıza təşrif buyurmaq üçün AFFA-ya müraciət etdiklərini bildirdi. Onlar arasında İngiltərənin "Mançester Yunayted", "Arsenal" və İspaniyanın "Sevilya" kimi klubların nümayəndələri var.
Firuz bəy oyunları hansı ölkədən olan hakimləri idarə edəcəyi ilə bağlı isə bunları deyib: "Hələ ki, bizə hakimlərin siyahısı verilməyib. Əsasnaməyə görə, final mərhələsinin oyunlarında təşkilatçı ölkənin hakimləri iştirak edə bilməz. Elit raundda, ilkin mərhələdə bu, mümkündü, lakin final mərhələsində təşkilatçı ölkənin nümayəndələri olmur".
Təbii ki, burada qida məsələsi də önəmlidi. Görək, qonaqlar milli mətbəximizin təamlarından dadacaq, yoxsa özləri ilə aşpaz gətirəcəklər? AFFA rəsmisi bu məsələyə belə cavab verdi: "İndiyə kimi bizə gələn məlumata görə, İspaniya və İtaliya yığmaları özləri ilə aşpaz da gətirəcəklər".
O, ölkəmizə təşrif buyuracaq komandaların və hakimlərin qalacağı yerlə bağlı da məlumat verdi: "Komandalar paytaxtımızda yerləşən "Boulevard Hotel"də qalacaq. Bu, UEFA-nın tələbidi ki, komandaların hamısı eyni oteldə qalmalıdı. Qaydalara əsasən, hakimlər komandalarla eyni oteldə məskunlaşa bilməz. Onlar başqa məkanda – "Kempinski Hotel"də yerləşdiriləcəklər”.
Məlum olduğu kimi, matçlar Bakı Olimpiya Stadionu, "Dalğa Arena", "Bakcell Arena" və "Azərsun Arena"da keçiriləcək. Təbii ki, stadionların hazırkı durumu və oyunlar başlayana kimi necə olacağı da vacib məsələdi: "Ötən həftə həmin satdionlarda olmuşuq. Hamısında da vəziyyət normaldı. Oyunların keçiriləməyi ilə bağlı problem yoxdu".
Firuz bəy həmçinin komandaların harada məşq edəcəyi ilə bağlı da məlumat verdi. Məlum oldu ki, yığmaların məşq etməsi üçün Bakı Olimpiya Stadionunda 2, "Dalğa Arena"da 1, "Qarabağ"ın bazasında 1, "Neftçi"nin yeni tikilən təlim-məşq bazasında 3 meydança və Azərbaycan Dövlət Bədən Tərbiyəsi və İdman Akademiyasının stadionu nəzərdə tutulub.
ELMAR VƏLİYEV