Ölkə futbolu
“Qəbələ”nin hədəsi, Hakimlər Komitəsinin bəraət görüşü
Gərginliyin yüksək həddi. Ölkənin aparıcı klubu naraz?…
Gərginliyin yüksək həddi. Ölkənin aparıcı klubu narazıdı, etiraz edir və haqlıdı.
Ölkə kubokunun yarımfinal mərhələsinin ilk görüşündə “Qəbələ”nin haqqı yeyildi. “Neftçi” ilə matçda hesab 1:1 olarkən qonaqların qapısına təyin olunmayan penalti “qırmızı-qaralar”ın haqlı narazılığına səbəb oldu. Ara qarışdı, məzhəb itdi.
Vəziyyət ciddidi. O qədər ciddi ki, hakimləri, onların qiymətlərini, cəza müddətlərini hamıdan gizlədən AFFA Hakimlər Komitəsi jurnalistləri görüşə çağırdı. Bu gün Topaz Premyer Liqasının və Azərbaycan Kubokunun görüşlərindən sonra hakimlərin qərarlarını müzakirə etmək üçün keçirilən ənənəvi toplantılardan növbətisi media üçün açıq olacaq. Deməli, komitə sədri Xaqani Məmmədov budəfəki səhvin böyüklüyünün fərqindədi. O, səhvə bəraət qazandırmaq istəməyəcək, bunun sadəcə, qərəz olmadığını isbatlamağa çalışacaq.
Ən pisi odur ki, işin içində FİFA referisi Əliyar Ağayev var. Ölkənin ən istedadlı referilərindən biri, “təmiz” olduğunu dəfələrlə sübut etmiş hakimin qalmaqala qarşıması yaxşı olmadı. Mövsümü çox uğursuz keçirən, səhvlərinə görə bir neçə dəfə cəzalanan Əliyar yenə də gərginliyin ortasındadı. Elə Xaqani Məmmədovun da səhvi ondadı ki, psixoloji cəhətdən durumu yerində olmayan, cəzadan yeni qayıdan birini taleyi kubokdan asılı olan iki komandanın ölüm-dirim görüşünə təyin edir. Və onu yandırır…
“Qəbələ”nin dünən yaydığı bəyanat onların ciddi narazılığından xəbər verir. Və bu narazılıq futbolçuların, məşqçilərin, klub idarəçilərinin narazılığının əksi deyil, daha ağır çəkilidi. Yazılma üslubundan, tonundan, bəyanatın terminalogiyasından bəlli olur ki, o, “başqa əl”dən çıxıb. Qısaca, bəyanatı klubun himayədarlarının hədəsi kimi qəbul etmək olar.
Hədə fayda verdi. Bugünkü görüş elə hakim səhvlərinə AFFA rəhbərliyi tərəfindən reaksiya verilməsinə gətirib çıxardı. Amma yarışlardan imtina etmək istəyi bəyanatın bir qədər şişirdilmiş hissəsidi. Ölkə futboluna bu qədər sərmayə qoymuşkən birdən-birə kənara çəkilmək hamının başını ağrıdar. Futbol akademiyasına cəlb olunan yüzlərlə uşağın taleyi ilə oynamaq, yaradılan infrastrukturdan, indiyədək çəkilən əziyyətdən qəfil imtina mümkünsüzdü.
Bu bəyanat daha çox yarımfinalın cavab oyununda, eləcə də mümkün final matçında daha ədalətli hakimlik görməyə, psixoloji basqı yaratmağa hesablanıb. Çünki titulsuz mövsümə görə çox adam cavab verməli olacaq.
“Qəbələ” rəhbərliyi etiraz etməkdə, bəyanat verməkdə haqlıdı. Qərəzli, ya qərəzsiz – onlara qarşı kobud səhv edilib. Və indiki halda haqlı durumdadılar, hesab istəyəcək mövqedədilər. Ağayev də, Hakimlər Komitəsi də məntiqli izahat verməli, vəziyyətə aydınlıq gətirməli, belə halların təkrarlanmaması üçün diqqətli olmalıdılar. Futboldan heç nə qazanmadan bura sərmayə qoyan insanları hansısa məsuliyyətsizlik üzündən incitmək, küsdürmək olmaz. Amma…
…Amma “Qəbələ” rəhbərliyi baş məşqçi Roman Qriqorçuka da bir bəyanat ünvanlamalıdı. Ukraynalının xidmətlərini unutmaq olmaz, ancaq Avropa Liqasının qrupuna qazanılmış vəsiqə örtüyünün altından çıxmaq vaxtıdı. Qriqorçuk, dünənə görə sağ ol, etmisən, qarşılığını böyük pullarla almısan, həm özünü, həm gətirdiyin legionerlərin həyatını təmin etmisən. Lakin bu gün həminki kimi qazanmağa layiq deyilsən. Yenə qazanırsan. O zaman ya qarşılığını ver, ya da səhvlərini etiraf et, üzr istə və çıx, get.
Bəyanatda – yəqin ki, Qriqorçukun raportu əsasında – komandanın hakim səhvləri nəticəsində xal itirdiyi oyunların siyahısı var. Mən hələ ora daha 2-3 matçı əlavə edərdim. Ancaq iş ondadı ki, “Qəbələ”nin layiq olmadan xal və xallar qazandığı oyunların da siyahısı genişdi. Həmin görüşlərdə də hakimlər səhv edib. Demək hakim səhvi hamı üçün var, sadəcə, onu necə qiymətləndirmək məsələsi önəmlidi.
Milyonlar qazanan məşqçinin komandası ən bahalı futbolçu heyəti ilə komandaların maddi durumu üzündən məhəllə çempionatına çevrilən Premyer Liqada bu qədər uğursuz olmamalıdı. Qriqorçukdan israrla istədiyi, amma oynatmadığı Pavel Paşayevin transfer edilmə səbəbi soruşulmalıdı. Rəhbərlik Ukraynadan gətirilən tibb personalının işini dəyərləndirməlidi. Hər cür şərait yaradıldığı halda nə üçün komandada bu qədər zədəli var? Aleksey Antonov AZAL-ın 3 futbolçusunun aylıq maaşını bir günə qazanır. Gündəlik 1500 dollar qazanan futbolçu 31 tura 10 qol vurmayıbsa, komandası həmin AZAL-dan cəmi 7 xal öndədisə, nədən danışırıq? Yararsız adama ödənilən 45 min dollara Qəbələ akademiyasında əlavə nələr etmək olmaz?
Düzdü, hakim səhvi olmamalıdı, kimsə bundan əziyyət çəkməməlidi. Heç kim Əlyar Ağayevə bəraət qazandıra bilməz. Güman ki, “Kəpəz” – “İnter” görüşündəki kobud səhvindən sonra qonaqlardan üzr istəmək cəsarəti olan referi bu gün də eyni addımı atacaq. Düzdü, bu, “Qəbələ”nin əlindən alınan qələbəsini geri qaytarmayacaq, amma Ağayevi hakimlikdən qovmaqla da heç nə dəyişməyəcək. “Qəbələ” ən yüksək səviyyədə etirazını bildirsin, narazılığını hətta hədəylə çatdırsın. Lakin daha böyük səhvlərə imza atan məşqçisindən, legionerlərindən, harınlamış bəzi futbolçularından da hesabat tələb etsin. Axı, 5-6 yüzfaizli qol epizodunu boşa verəndə Əliyar əlini topun qarşısına qoymamışdı.
Vəziyyət gərgindi. Hakimlər Komitəsi bu gün hesabat verəcək, Ağayev səhvlərinin səbəbini aydınlaşdıracaq. Bu, Xaqani Məmmədova ciddi dərs olmalıdı, insanların taleyi ilə oynamamaq üçün işini yüksək səviyyədə görməlidi. Bacarmırsa, Qriqorçuk kimi kreslonu qucaqlayıb oturmaq lazım deyil, psixoloji cəhətdən yüklənmiş bəzi hakimləri də yandırmaq olmaz, zamanı gələndə getmək baş ucalığıdı. Videoçarx nümayişi, hər epizodda haqq axtarmaq çıxış yolu deyil. Şəffaf çempionat, hamının məmnun qaldığı idarəçilik lazımdı. “Qəbələ”ni incitmək və ya onlarda səhv axtarmaq sədrin səlahiyyətinə aid məsələ deyil. Hər kəs öz eyiblərini görüb, onu aradan qaldırsa, kifayətdi.
FƏRİD
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə