Ölkə futbolu
Zəhmətkeşlərin bayramı
4-cü çempionluq. Daha rahat, daha az əziyyətlə gələn …
4-cü çempionluq. Daha rahat, daha az əziyyətlə gələn növbəti titul.
Artıq ölkə futbolu üçün brendə çevrilən “Qarabağ” yenə ölkənin ən yaxşısıdı. Premyer Liqada rəqabət hər nə qədər zəif olsa da, iddialıların sayı azalsa da, kimsə ağdamlıların uğuruna kölgə sala bilməz. Çünki rəqabətin az olması Qurban Qurbanovun yetirmələrini rahatlaşdırmadı. Onlar hər oyunda yüksək səviyyəli futbol göstərib bu nəticəni qazandılar.
Mayın 1-ni sovet vaxtında zəhmətkeşlərin bayramı kimi qüeyd edərdik. Ardıcıl 3-cü qızıl medalın məhz ayın ilk günündə gəlməsinin hardasa rəmzi mənası da var. “Qarabağ” zəhmətinin nəticəsini məhz bayram günü gördü.
İndiyədək yalnız “Neftçi” ardıcıl 3 çempionluğa nail olmuşdu. “Qarabağ” “xalq komandası”nın uğurunu təkrarlamaqla yeni nümunə olduğunu təsdiqlədi. Hazırda hamı sabitliyə, uğur qazanmaq ruhuna görə Ağdam klubuna etalon kimi baxır.
Qurban Qurbanov baş məşqçi kimi çempionluq sayına görə yalnız Ağasəlim Mircavadovdan geri qalır. 3 dəfə qızıl medal qazanmış digər məşqçilərin aktiv karyerasını başa vurduğunu nəzərə alsaq, “Qarabağ”ın “sükançısı” tezliklə 5 “qızıl”lı Mircavadovun yeganə izləyicisinə çevriləcək. Yaş amilini nəzərə alsaq, onun ən titullu çalışdırıcı olmaq perspektivi də çoxdu. Sabit iş, düzgün seçim, əla komanda ruhu, ən əsası, yenilikçi olması Qurbanovun zirvədə qalmaq şansını çoxaldır.
“Qarabağ” budəfəki çempionluğu coşqu ilə qeyd etmədi. Bunun bir səbəbi uğurun ardıcıl olmasıdısa, ikincisi, hələ ilk turdan etibarən rəqiblərindən bir baş üstün olmasını sərgiləməsidi. Ağdamlılar faktiki mövsüm boyunca titulunu heç kimə verməyəcəyinə şübhə yeri qoymadı. Heyətdəki itkilər vaxtında, daha uğurlu transferlərlə dolduruldu, ciddi büdrəmələr olmadı. “Qarabağ” 3 cəbhədə mübarizə aparsa da, bir an belə tərəddüd etmədi, bütün oyunlara ciddi yanaşdı, baş məşqçinin heyətin rotasiyasındakı tutduğu mövqe həlledici rol oynadı.
Ağdam klubu sabahından narahat olmaya bilər. Qurbanov mövsüm ərzində həm də heyəti ələdi, yeni mövsümdə güvənəcəyi futbolçuları müəyyənləşdirdi. Rəqabətdə zəif olanlar tezliklə yola salınacaq, onların yerinə daha yaxşıları gətiriləcək. Onların arasında Dani Kintana və Migel Maderanın olmayacağı dəqiqdi. Bu legionerlər ağdamlıları Riçard Almeyda vəə Reynaldodan asılılıqdan qurtara bilib. Qurbanov onların adaptasiyası üçün göstərdiyi səbrin mükafatını iki ulduzu qazanmaqla aldı. Bu sıraya Coşqun Diniyevlə Mahir Mədətovu da salmaq olar. Coşqun orta sahədə, Mahir isə hücumda ciddi rəqabət yaradıb. Hələ icarədən qayıdacaq Namiq Ələsgərov da var.
“Qarabağ” bu gün müdafiədə müəyyən sıxıntılar çəkir. Amma Qurban bəyin bu mövqeyə də layiqli alternativlər tapacağına əminik. Xüsusilə müdafiənin mərkəzinə daha bir oyunçu alınsa və rəqabət gücləndirilsə, “Qarabağ”ın avrokuboklarda uğurlarını davam etdirməsi, artıq Çempionlar Liqası xəyalını gerçəkləşdirməyə daha ciddi cəhd etməsi asanlaşacaq. Ardıcıl 3 dəfə ölkə çempionu olan yeganə məşqçi kimi Qurban bəyin daha bir ilkə imza atacağına inam böyükdü.
Hələliksə çempionluğu qeyd etməyin zamanıdı. Zəhmətin nəticəsi olan qızıl medallar növbəti dəfə ağdamlıların boynundan asılacaq. Ölkə kubokunda da mümkün uğur reallaşsa, “qızıl dubl” uğurun zirvəsi olacaq. Finala vəsiqəni böyük ölçüdə həll etmiş “Qarabağ” bun həm layiq, həm də qadirdi.
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…