Milli komanda
Həsənov səhvini düzəldəndə…
Eyforiyaya qapılmayaq. Belçika ilə oyunda qazanılan xal, vur…
Eyforiyaya qapılmayaq. Belçika ilə oyunda qazanılan xal, vurulan qolla missiynın bitdiyini, vəzifənin öhdəsindən gəlindiyini düşünməyək.
17 yaşlılardan ibarət milli komandalar arasında Avropa çempionatının final mərhələsində millimizin növbəti matçı bütün suallara aydınlıq gətirməsə də, çox mətləbi aşkar şəkildə ortaya qoydu. Bu xalqın övladlarına “futbol oynaya bilmirlər” damğası vurmağa çalışan məşqçilər, idarəçilər yapışdıqları saman çöpüylə xilas olmalarına görə məhz onlara minnətdar olmalıdı. Şotlandiya ilə oyunöncəsi qrupdan çıxmaq şansımız qalırsa, buna görə məhz futbolçulara minnətdar olmalıyıq.
Belçika ilə matçda döyüşkən, nə etdiyini bilən, aqressiv Azərbaycan yığması gördük. Portuqaliya ilə matçda 0:5 hesablı yenilgi hamını, o cümlədən baş məşqçi Təbriz Həsənovu silkələmişdi. İlk matçda hətta sarı vərəqəylə cəzalandırılacaq qədər cəsarətli olmayan yeniyetmələrimiz dünənki oyunda ayaq çatmayan yerə baş qoydu, xalı alın təri hesabına qazandı. Qapıçımızın timsalında hətta ölümü gözə alan futbolçularımız düzgün qurulan heyətin, taktikanın yerinə yetirilməsi üçün hər şey etdi.
Belçika Bakıya toplaşan millilər içində ən yaxşılardan biridi. Son turda Portuqaliyaya uduzmamaqla da qrupdan çıxması mümkün olacaq bu komandanı büdrətmək sıradan hadisə deyil. “Oyunçumuza qırmızı vərəqə verilsə və ya rəqibin zərbəsi dirəkdən dönməsəydi” tipli şərhlərə diqqət etməyin. Ona qalsa, bizimkilərin də daha real şansları var idi. Futbolçularımızın əməyinin üstündən xətt çəkmək olmaz, həqiqətən komandamız qələbəyə layiq oyub göstərdi.
Bəs, 2 günə nə dəyişdi ki, Portuqaliya qarşısında pərən-pərən düşən futbolçular belə futbol oynadı? Səbəbi yenə məşqçilərdə və idarəçilərdə axtarmalıyıq. Start heyətində edilən 3 dəyişiklik komandanın əsl gücünün müəyyənləşməsində birbaşa rol oynadı. Azərbaycanlı balalarının yerini əlindən almaq üçün rəhbərlik tərəfindən gətirilən türkiyəlilərin səviyyəsini müzakirə belə etməyə dəyməz. Çünki oyundakı artım Elçin Əsədovun müdafiənin önünə çəkilməsi və Yusif Həsənov, Süleyman Əhmədov, Pilağa Mehdiyevin start heyətinə daxil edilməsi nəticəsində reallaşdı. Deməli, tənqidlər hədəfə dəyib və nəticə çıxarılıb.
Heç birinin heyətdə oynaması lazım gəlməyən türklərdən birinin ehtiyatda göndərilməsi həlledici factor oldu. Bu zaman Pilağa hücumdakı oyunu canlandırdı, Murad Mahmudov qol vurdu və daha bir yüzfaizli şans qazandı. Halbuki ilk matçda “çərçivə”ni hətta “görə bilməmişdik”. Rəqibin vurduğu qolda da birbaşa legionerin günahkar olduğunu nəzərə alsaq, yerlifutbolçuların hansı tapşırığı alın aşıqlığı ilə yerinə yetirdiyini görərik. Yetər ki, öz insanımızın qədrini bilək.
Həsənovun ilk oyundan sonrakı mətbuat konfransında dediklərini heç cür bağışlaya bilmirəm. O, faktiki özümüzküləri aşağılayaraq, “bizdə bu səviyyədə oynayacaq futbolçular yoxdu” deməklə böyük səhvə yol vermişdi. Dünən azərbaycanlı balaları yəqin ki, onu utandırdı. Təbriz bəy səhvini düzəltdi, amma yaxşı olardı ki, bunu ictimai qınaqdan, mətbuatın tənqidindən sonra yox, özü görərək edərdi. İndi mən əminəm ki, milli komandaya çağırılmayan, tapşırılmayan neçə-neçə istedadlı gəncimiz bu yarışa tamaşaçı kimi baxmağa məcburdu.
Belçikayla oyun bitdi, lakin missya bitməyib. Dünənki matç göstərdi ki, bu səviyyədə qarşılaşmalarda qalib gəlməyə qadir futbolçularımız var. Şotlandiyanı yenmək daha asan olmalıdı. Həsənov komandanı yaxşı hazırlaşdırsa, düzgün seçimlər etsə, qrupumuzun autsayderini rahatlıqla yenməliyik. Həm də futbolçularımız elə hesaba nail olmalıdı ki, qrupdakı taleyimizin özümüzə aid olan hissəsini həll edək. Portuqaliya qələbə qazansa, bizimkilər lazımi nəticəni əldə edə bilməsələr, məsuliyyət yenə də məşqçilərin və idarəçilərin boynunda qalacaq. Ona görə də eyforiyaya qapılmaq üçün tezdi, hələ daha yaxşısına nail olmaq üçün şans var. Dünən əldən çıxan qələbəyə görə göz yaşı axıdan azərbaycanlı (legionerlər yox ha – red.) balalarını ruhdan salmağa heç kimin haqqı yoxdu.
FƏRİD
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”